Read Zou GAMLAH VANA 20 Bible Online

GAMLAH VANA 20 - Zou bible

GAMLAH VANA 20

¹A hla masa penin Zin gamlah-ah Israel mihonpi zosie a tung vua, Kadesh-ah a om uhi. Khum munah Miriam si a, khum mun ma-ah kivui hi.

²Tu-in mihonpi ading tui a om sih hi; tuaci’n Moses le Aaron langpang dingin amate a kikhawm uhi.

³Moses tawh mite kihau-in, “TOPA mai-a i sanggamte a na si lai-un eite zong na kisidawh tazaw leih izaw!

⁴Bang dinga kote le ka ganhingte a siton dinga TOPA’ mihonte, tami mun gamlaha nei peipi ahei?

⁵Bang dingin Egypt gam panin tami sietna mun tut dinga nei peipito ahei? An ahi a, thei ahi a, lenggui ahi a, mang kawlsing ahi zongin a opna mun a hi sih hi; tui dawn ding nasan a om sih hi,” a ci uhi.

⁶Tua ciengin mihonte lah panin kikhopna puonbuh lutna-ah Moses le Aaron a pei uhi. Ama gel zong a kunsuh vua, tuaci’n a tung vuah TOPA’ vanglietna kilang hi.

⁷TOPA in Moses kungah tam bangin a gen hi:

⁸Ciengkhut la-in, nang le na sanggampa Aaron in mihonte khawm unlen, a mitmu vua suongpi in tui a pulsah nadingin tua suongpi thupie un; tua bangin suongpi panin a dawn ding uh tui na pie ding uhi,” a ci hi.

⁹Tuaci’n ama’ thupiehsa bangin Moses in TOPA mai-ah ciengkhut a la hi.

¹⁰Moses le Aaron in suongpi mai-ah mihonte kaikhawmin a kung vuah, “Ngai un, no langpangte aw, tami suongpi panin note ding tui kang pulsah ding uh amah?” a ci hi.

¹¹Tua ciengin Moses in a khut lamto-in a ciengkhut tawh tua suongpi nivei a sat hi; tui tampitah pulkhie-in mihonte le ganhingte in a dawn uhi.

¹²Ahi vangin TOPA in Moses le Aaron kungah, “Israel-te muna-ah keima in ka sienthona ka lah thei nadingin nei muon lo zieh gelin amate ka piehsa gam sungah tam mihonte na tunpi sih ding gel hi,” a ci hi.

¹³Tam teng pen, Meribah[59] tui phuola TOPA tawh Israel-te a kiselna, amate lahah amama a siengtho-a a kilahna muna thupieng ahi hi.

¹⁴Moses in Kadesh panin Edom kumpipa kungah kamtaite sawl a, “Na sanggampa Israel in tam bangin a gen hi: Nangma in ka tung vua ang tungsa hahsatna zosie na thei hi:

¹⁵Egypt-ah ka pu ka pate a na peisuh vua, tuaci’n Egypt-ah sauveipi ka na teng uhi; Egypt mite in ko le ka pu ka pate ei na bawlsie uhi.

¹⁶TOPA kungah ka kiko ciengun ama in ka aw uh ei za a, vantungmi khat hing sawlin Egypt panin ei peipi a, tu-in nangma’ gam ning Kadesh khuo-ah ka om uhi.

¹⁷Tu-in na gam ei nawhsah in. Lolai hile, lengga umte hile ka nawhkha sih ding vua, tuikhuh khatpo-a tui zong ka mawh dawn sih ding uhi; Kumpipa’ Lamlienpi dung zui-in ka pei ding vua, na gam sung ka kal masangun ziet le vei-ah ka piel sih ding uhi,” a cisah hi.

¹⁸Ahi vangin Edom in ama kungah, “Ka gam sung na nawh thei sih ding uhi; nang nawh paupau uleh no ang do dingin namsau tawh kang kuon ding uhi,” a ci hi.

¹⁹Israel-te in, “Lamlienpi tawnin ka peito ding uhi; ko le ka ganhingte in na tui uh ka dawn uleh a manh kang pie ding uhi. Tam pen thu neuno khat ahi lel bo hi; keng tawh ei nawhsah maimai in,” a ci uhi.

²⁰Ahi vangin ama in, “Na nawh thei sih ding uhi,” a ci hi. Edom mite, galkap tampi le galvan tampi tawh amate do dingin a kuon uhi.

²¹Tua bangin Edom mite in a gam uh nawh ding a phal sih uhi; tuaci’n amate kung panin Israel mite a kiheikia uhi.

²²Kadesh panin a ding vua, Hor muol-ah Israel mipi buppi a tung uhi.

²³Tua ciengin TOPA in Edom gamgi Hor muol-a Moses le Aaron kungah,

²⁴“Aaron a mite kung zuonsah ta gel in. Bang ding ahei cile Meribah tuiphuol-ah no gel in ka thupieh nei ledo zieh gelin Israel mite tunga ka piehsa leitangah ama lut lo ding hi.

²⁵Aaron le a tapa Eleazar zawpi inlen, Hor muol-ah peipi to in;

²⁶Aaron puonsilte suodawh inlen a tapa Eleazar silsah in. Ahi vangin Aaron a mite[60] kungah kigawm ta ding a, khum munah si ding hi,” a ci hi.

²⁷TOPA’ thupieh bangin Moses gamta a, mihonte’ mitmu-in amate Hor muol-ah a kato uhi.

²⁸Moses in Aaron’ puonte suopiehin a tapa Eleazar silsah hi; tuale tua muol dawnah Aaron a si hi. Muol dawn panin Moses le Eleazar a kumsuh uhi.

²⁹Mihon buppi in Aaron si a mu bepun Aaron ziehin Israel’ innkuon sung mi zosie ni sawmthum sung a kap uhi.