Read Zou GAMLAH VANA 22 Bible Online

GAMLAH VANA 22 - Zou bible

GAMLAH VANA 22

¹Israel-te vai a ding vua, Jericho gei Jordan gungal Moab zanglei-ah giephuol a sat uhi.

²Zippor’ tapa Balak in Israel-te in Amor-te tunga a bawl teng zosie mu hi.

³Amate a tam seng ziehun Moab-te in tua mite a giing mama uhi; Israel-te a giin ziehun Moab-te a zausi uhi.

⁴Moab-te in Midian upate kungah, “Bawngtang in lolai-a lopa a lie bangin tam mipite in tu-in i kimvel vua om zosie a liehtum ding ahi ta uhi,” a ci uhi. Zippor’ tapa Balak pen khum hun laitahin Moab kumpipa ahi hi.

⁵Ama in Amaw[72] gama om Euphrates gun gei Pethor khuo-a teng Beor’ tapa Balaam kungah kamtai sawl a, “Egypt gam panin mihon khat ang pei uhi; lei maitang tengah a kithezah vua, kei banah a teng uhi.

⁶Kei sanga a thahat zawh ziehun tu-in hing pei inlen tam mite ei samsietpieh in; tua hile amate ka zo kha thei ding a, khum gam panin ka notmang zo kha thei ding hi; azieh pen na thupha pieh poma in thupha nga a, na samsiet poma samsietin a om hi, ci ka thei hi,” a ci hi.

⁷Tuaci’n Moab upate le Midian upate in a khut sung vuah aisan man ding tawi-in a kuonkhie uhi; Balam kungah amate tungin Balak’ thu vaihlah teng a sung uhi.

⁸Ama in a kung vuah, “Tu zanin tanah gieh unlen, kei tunga TOPA in ei hopi bang lienin na kung vuah thu kang puohkia ding hi,” a ci hi; tuaci’n Balaam kungah Moab uliente a gieh uhi.

⁹Balaam kungah Pasien pei-in, “Nang tawh a omton tam mite koi ahei?” a ci hi.

¹⁰Balaam in Pasien kungah, “Moab kumpipa Zippor’ tapa Balak in ka kungah tam bangin mi ang sawl hi:

¹¹‘Egypt panin mihon khat ang pei vua, lei maitang tengah a kithezah uhi; tu-in hing pei inlen, tam mite ei samsietpieh in; tua hile keima in amate simin ka notmang zo kha thei ding hi,’ ei ci hi,” ci-in a gen hi.

¹²Pasien in Balaam kungah, “Amate na zui sih ding hi; tua mite na samsie sih ding hi, azieh pen amate thupha kipie ahi hi,” a ci hi.

¹³Tuaci’n zingmawng ciengin Balaam tho a, Balak’ uliente kungah, “Na gam ciet vuah pei ta un, azieh pen TOPA in note tawh zawton ding ei phal lo hi,” a ci hi.

¹⁴Tuaci’n Moab uliente dingkhie-in Balak kungah a pei vua, “Balaam in kote ei zui nuom lo hi,” a ci uhi.

¹⁵Balak in tuate sanga a tamzaw le a zatahhuoizaw uliente khatvei sawlkia hi.

¹⁶Balaam kungah amate a tung vua, a kungah, “Zippor’ tapa Balak in tam bangin gen hi: ‘Kei kunga nang pei ding bangma in kikai-awhsah sin;

¹⁷azieh pen patawina lienpi kang pie valon ding a, ka kunga nang gen popo kang bawlpieh ding hi. Hing pei inlen tam mite ei samsietpieh in,’ ci hi,” ci-in a gen uhi.

¹⁸Hizongle Balaam in Balak’ nasemte kungah, “Balak in ngun le kham a inndim ei pie ding hi phiel le zong TOPA’ thupieh kalvalin a tawmzaw ahi a, a tamzaw ahi zongin ka bawl thei sih hi.

¹⁹TOPA in kei kungah bang thu ang genbe lai diei mah ci thu ka thei nadingin adangte ma bangin tuzan tanah gieh tadi un,” a ci hi.

²⁰Khum zanin Balaam kungah Pasien pei-in, “Nang ang hlan dinga tua mite ang pei ahi uleh tho inlen zui in; ahi vangin kang sawlte beh bawl in,” a ci hi.

²¹Tuaci’n zingmawngin Balaam tho a, a laaphaw pha-in Moab lamkaite tawh a zawhton hi.

²²Ama a pei ziehin Pasien lungthah mama a, ama do dingin TOPA’ vantungmi lampi ah na pang hi. A laa tungah ama tuong a, a nasemte ni a zawpi hi.

²³Tua laa in a khut sungah namsau dawsa-in lampi-a a ding TOPA’ vantungmi a mu hi; tuaci’n lampi panin tua laa pielin gamlahah a pei hi; tuale Balaam in lampi-a a peikia nadingin a laa a sat hi.

²⁴Tua ciengin lengga lo kikal, a pang tuohah phung a opna lam kawcih laitahah TOPA’ vantungmi na ding leuleu hi.

²⁵Laa in TOPA’ vantungmi a mu ciengin phungbang phu-in tua tawh Balaam’ keng a gawtkha hi; tuaci’n ama in a laa a satkia hi.

²⁶Tua ciengin a masangah TOPA’ vantungmi na pei-in zietlam ahi a, veilam ahi zongin kihei nading om lona mun kawcih khatah na ding leuleu hi.

²⁷Laa in TOPA’ vantungmi a mu bepin Balaam’ nei-ah a lumsuh hi; tuale Balaam lungthah mama a, a ciengkhut tawh a laa a sat hi.

²⁸Tua ciengin TOPA in a laa kam a honpieh a, Balaam kungah, “Thumvei tahpi nei sat va-ia nadingin nang bang kang law ahei?” a ci hi.

²⁹Balaam in a laa kungah, “Nang in kei nei motbawl zieha khu! Ka khut sungah namsau tawi poma leng maw! Kang tha pai lien ding a khula!” a ci hi.

³⁰Ahi vangin laa in Balaam kungah, “Na khang tungtawnin tuni dong na tuonna na laa hi lo ka mah? Na tungah tam bang danin kang bawl ngai ta amah?” a ci hi. Ama in, “Ei bawl ngai sih teh,” a ci hi.

³¹Tua ciengin TOPA in Balaam’ mit a honpieh a, ama in a khut sungah namsau dawsa-in lampi-a a ding TOPA’ vantungmi a mu hi; tuale ama zong a lu kunin lei-ah a bawhsuh hi.

³²TOPA’ vantungmi in ama kungah, “Bang dinga na laa thumveitah na sat ahiei? Nangma’ lampi pen ka mai-ah letatna[73] ahi ziehin nang ang langpang dinga ang kuon ka hi hi.

³³Laa in kei ei mu-in thumvei dong ei pel hi. Ei pel lo khat hi poma leh tu mama-in kang that zo tahtah ta ding a, na laa ka suohtasah ding hi,” a ci hi.

³⁴Tua ciengin Balaam in TOPA’ vantungmi kungah, “Kei ei pang dingin lampi-ah na din ding lam ka thei lo ziehin ka khiel zo hi. Tua ahi ziehin kei tungah na lungkim sih leh tu-in inn lam ka kilekia ding hi,” a ci hi.

³⁵TOPA’ vantungmi in Balaam kungah, “Tua mite tawh zawh in; hizongle kang sawl teng beh na gen ding hi,” a ci hi. Tuaci’n Balak uliente tawh Balaam a zawhton hi.

³⁶Balaam ang pei zo ta ci thu Balak in a zah ciengin gamgi mong a gamla pena a om, Arnon in gamgi-a a bawl mun Ir-moab-ah ama tawh kimu dingin a pei hi.

³⁷Balak in Balaam kungah, “Nang ang hlan dingin mi hing sawl hi lo ka mah? Bang dinga ka kunga hing pei lo na hei? Nang ang patawi la ding ka hi amah?” a ci hi.

³⁸Balaam in Balak kungah, “Tu-in na kung kang tung zo hi. Ahi vangin thu khatpo ka gen thei nading ken thu ka nei amah? Ka kam sunga kikoi Pasien’ thute beh a gen ding ka hi bo hi,” a ci hi.

³⁹Tua ciengin Balak tawh Balaam zawh a, Kiriath-huzoth khuo-ah a tung uhi.

⁴⁰Bawngtangte le tuute tawh Balak kithoi a, Balaam le a ompi uliente kungah tuate a puoh hi.

⁴¹A zing ciengin Balak in Balaam zawpi a, Bamoth-baal munah a peipito hi; tuale ama in khum mun panin Israel mite[74] pawlkhat a mu thei hi.