Read Zou GAMLAH VANA 24 Bible Online

GAMLAH VANA 24 - Zou bible

GAMLAH VANA 24

¹Tu-in Israel-te thupha pieh ding TOPA a lungkim lam Balaam in mu a, tuaci’n a hun dangte bangin aisan dingin a kuon nawn sih a, ahi vangin senel gam lam a maingat hi.

²Balaam a khuodah leh Israel-te a bebe-in giephuol sata om a mu hi. Tua ciengin a tungah Pasien’ hlagau tung a,

³ama in a thuphuon tam bangin a gen hi: Beor’ tapa Balaam’ thuphuon, a mit ciim[79] khuomu theipa’ thuphuon,

⁴Pasien’ thute a za pa’ thuphuon, Vanglienpa’[80] mangmu pa thuphuon, lum hit hiet napi a mit siing lo pa’ thuphuon:

⁵Jacob aw, na puonbuhte bang za-in etlawm a, Israel aw, na giephuolte bangza-in hoi ahei!

⁶A gamlapi-a kihlung, lutu singna tawh kibang a, gun gei-a om umte tawh kibang hi. TOPA suonsa aloes panamtui kungte tawh kibang a, lui gei-a po taamtah kungte tawh kibang hi.

⁷A phelkhai sung panin tui luong ding a, ama’ khaici in tui nieng tahin nga-in, a kumpipa uh Agag sangin thupizaw ding a, ama’ kumpi gam khu a kitawisang ding hi.

⁸Egypt pana amate a peipi Pasien khu amate adingin gam bawngtang’ kite tawh a kibang hi. Ama in a galte ahi minamte valmangin, ama in a gu a tangte a hliehtawng ding hi. Ama in a thaltang[81] tawh amate a kap ding hi.

⁹Humpi apa bangin bawhin a lumsuh hi. Humpi anu bangin ama a lumsuh hi. Koi in ama khu phong ngam ding ahei? Nang thupha ang pie poma in thupha nga hinlen, nang ang samsie poma in samsiet nga taheh,” a ci hi.

¹⁰Tua ciengin Balaam tungah Balak lungthahin a khuttum a ziel hi. Balak in Balaam kungah, “Ka galte samsie dinga kang hlat ahi a, ahi vangin nang in amate thumvei tah thupha na pie zawsop hi.

¹¹Tu-in na inn ah kipei ta’n! ‘Patatman tampitah hing pie vang,’ kang ci ngel hiven, hinanle TOPA in na patatman ang khahtan hi,” a ci hi.

¹²Balaam in Balak kungah, “Keima kunga nang sawl na kamtaite kungah,

¹³‘Balak in kham le ngun inndim khat ei pie phiel nanle TOPA’ gen kalvalin kei dei bangin a sie ahi a, a pha ahi zongin ka bawl thei sih hi; TOPA’ gente beh ka gen ding hi,’ ci-in gen zo hi lo ka mah?

¹⁴Tu-in ka mite kungah ka pei ding hi; nidang hun ciengin tam mite in na mite tungah bang teng bawl ding uh ahei, ci thu kang kikuppi ding hi,” a ci hi.

¹⁵Tuaci’n ama in a thuphuon tam bangin a gen hi: “Beor’ tapa Balaam’ thuphuon, a mit ciim[82] khuomu theipa’ thuphuon,

¹⁶Pasien’ thu a za pa’ thuphuon, Sangpen Pa’[83] pilna a thei pa’ thuphuon, Vanglienpa’[84] mangmu pa thuphuon, ama puasuhin, hinanle a mit siing lo pa’ thuphuon:

¹⁷Ke’n ama ka mu a, ahi vangin tu hi nai lo hi; ke’n ama ka en a, ahi vangin ama nai pah nai lo hi. Jacob sung pan aasi khat ang suoh ding a, Israel sung pan kumpi ciengkhut khat ang pieng ding hi. Tua in Moab’ gamgi dung teng[85] satguoi ding a, ama in Seth-te’ gam[86] zosie satcim ding hi.

¹⁸Edom pen mi’ neisa suoh ding a, Seir zong a galte’[87] neisa a suoh ding hi. Tua laitahin Israel mite in hangsan tahin sem ding uhi.

¹⁹Jacob sung panin uhpa khat ang pieng ding a, Ir khuopi sunga a suohtate kisusie ding hi,” a ci hi.

²⁰Tua ciengin ama in Amalek gam enin, a thuphuon tam bangin a gen hi: “Amalek, mi namte lahah a masa pen ahi a, ahi vangin a tawpna-ah kumtawn manthaina a thuoh ding hi,” a ci hi.

²¹Tua ciengin ama in Ken mite enin, a thuphuon tam bangin a gen hi: Na tenna munkip ahi a, suongpi kawmah na bu kikoi hi;

²²ahi vangin Ken ahile haltum dinga kisesa ahi hi. Asshur in bang tanvei galmatin ang nei ding ahei?” a ci hi.

²³Ama in thuphuon tam teng a genkia hi: “Kadei sei! Pasien in tamte a sep cieng, koi hing zo ding ahei?

²⁴Ahi vangin Kittim panin tembawte ang pei-in Asshur le Eber genthei bawl ding hi; ama zong kumtawnin mangthai ding hi,” a ci hi.

²⁵Tua ciengin Balaam tho-in a inn ah kilekia a, Balak zong a lampi-ah a pei hi.