Read Zou GAMLAH VANA 32 Bible Online

GAMLAH VANA 32 - Zou bible

GAMLAH VANA 32

¹Tu-in Reuben-te le Gad-te in ganhon tampi a nei uhi. Jazer gam le Gilead gam pen gan khawi nadingin a hoi lam a mu ciengun,

²Gad-te le Reuben-te pei-in Moses, siempu Eleazar, le mihon makaite hopi-in,

³“Ataroth, Dibon, Jazer, Nimrah, Heshbon, Elealeh, Sebam, Nebo, le Beon-

⁴Israel mihonte mai-ah TOPA in a na lah gamte pen gan cinna gam hoi ahi hi; na nasemte in gan ka nei uhi,” a ci uhi.

⁵Amate in, “Na muna-ah maipha ka nga uleh na nasemte’ luo dingin tami gam ei pie in; Jordan gal ei kaisah da mai in,” a cibe lai uhi.

⁶Ahi vangin Moses in Gad-te le Reuben-te kungah, “Note tam munah to ziuzieu-in na sanggamte gal sima kuon ding ahi uh amah?

⁷TOPA in a piehsa gam a pei nading vuah Israel-te bang dinga lungkiesah dinga kisa na hi uh ahei?

⁸Kadesh-barnea panin gam van dingin ka sawl lai-in na pu na pate un tam bang ma ci uhi.

⁹Eshcol Kuom tungto-in tua gam a mu ciengun, TOPA in a piehsa gam a pei nading vuah Israel-te a lungkiesah uhi.

¹⁰Khum ni-in TOPA lungthahna kikuontaw a, tuale kiciemin,

¹¹‘Amate in a lungsim tahpi utawh kei ei zui lo uh ahi ziehin Egypt gam pana ang peito mite lah panin kum sawmni pan a tungsie koima khat beh in Abraham, Isaac, le Jacob tungah pieh dinga ka ciem gam-

¹²Kenaz mi Jephunneh’ tapa Caleb le Nun’ tapa Joshua-te longal in a mu sih ding uhi, azieh pen amahawn lungsim tahpi tawh TOPA a zui sih uhi,’ a ci hi.

¹³Israel-te tungah TOPA’ lungthahna kikuontaw a, TOPA mai-ah sietna a bawl tua khangmi zosie a manthai sieng masangsie-un, gamlahah amate kum sawmli sung vaivasah uhi.

¹⁴No mawneite’ suonte, na pu na pate uh’ tangin Israel-te tungah TOPA’ a huoisie lungthahna a pungsah dinga ang khang na hi uhi!

¹⁵Ama zui loin na piel uleh ama in gamlah-ah amate nuasiekia ding hi; note na hi uleh tam mi zosie a susie na hi ding uhi,” a ci hi.

¹⁶Tua ciengin ama kungah a pei vua, “Ka gante vua dingin tuuhuong bawlin ka tate vua dingin khuo ka sat ding vua,

¹⁷ahi vangin a tun nading mun uh amate ka tut masangsie-un, Israel-te mai-ah galhiem tawi-in a madawhin[99] ka pei ding uhi. Tua kikal sungin tam gama a teng mite ziehin ka naupangte uh kul tawh ki-im khuopite sungah a teng ding uhi.

¹⁸Israel-te zosie in a luo ding uh a nga sieng masangsie-un ka inn vuah ka kinuale sih ding uhi.

¹⁹Jordan galkhat le a bansie pen amate tawh ka luoton sih ding uhi. Bangzieh ahei cile tam lam gal Jordan nisuona lam teng pen kohaw’ luo ding ahi hi,” a ci uhi.

²⁰Tuaci’n Moses in a kung vuah, “Tam bangin note gamta-in, gal do dingin galhiem tawi-in TOPA mai-ah na pei vua,

²¹ama in a mai panin a galte a nawdawh masang galhiem a tawi nohaw zosie in TOPA mai-ah Jordan gun na galkai vua,

²²TOPA mai-a leitang a kilah masangsie - TOPA tung le Israel-te tungah na sep ding teng uh a zo suohin na kilekia thei ding vua, tam leitang pen TOPA mai-ah noma’ neisa ahi ding hi.

²³Hinanle tami na bawl sih uleh TOPA tunga a khiel zo na hi ta vua, na khielna un ang sulzui ding khu kitheitel un.

²⁴Na naupangte vua dingin khuopite sat unlen, na gante vua dingin tuuhuong bawl un; ahi vangin na kamciemsa bangun bawl un,” a ci hi.

²⁵Tua ciengin Gad-te le Reuben-te in Moses kungah, “Ka pu uh’ thupieh bangin na nasemte ka gamta ding uhi.

²⁶Ka naupangte uh, ka zite uh, ka tuuhonte uh, ka ganhon zosie uh pen Gilead gam khum munah a om suoh ding uhi;

²⁷hinanle ka pu ei thupieh bangin na nasemte in galhiem tawi-in TOPA ading gal sim dingin ka galkai ding uhi,” a ci uhi.

²⁸Tuaci’n amate tawh kisai-in Moses in siempu Eleazar, Nun’ tapa Joshua, le Israel minamte’ pupa innkuon lutang teng tungah thu a pie hi.

²⁹Moses in a amate kungah, “Gad-te le Reuben-te, galvante silin gal sim dingin TOPA mai-ah a kithawisa poma in note Jordan gun hing galkaipi-in na mai vuah gal ang zawpi ding vua, tua ciengin note in zong amau’ nei dingin Gilead gam na pie ding uhi;

³⁰ahi vangin note tawh hiem tawi-in a galkai sih uleh zong Canaan gam sunga note lahah gam nga veve ding uhi,” a ci hi.

³¹Gad-te le Reuben-te in a dawngkia vua, “TOPA gensa bangin na nasemte tungah ka gamta ding uhi.

³²Hiem tawi-in TOPA mai Canaan gam ka galkai ding vua, ahi vangin kohaw’ luo ahi ka neisa uh pen Jordan tam lam pangah[100] a om ding hi,” a ci uhi.

³³Moses in Gad-te, Reuben-te, le Joseph’ tapa Manasseh minam alangte tungah, Amor kumpi Shihon’ gam le Bashan kumpi Og’ gam, a gamsung le a khuopite, a gamgi huop sunga khuopi zosie tawh amate a pie hi.

³⁴Gad-te in Dibon, Ataroth, Aroer,

³⁵Atroth-shophan, Jazer, Jogbehah,

³⁶Beth-nimrah, le Beth-haran, kul tawh ki-im khuopite, le tuuhuongte a lamkia uhi.

³⁷Reuben-te in Heshbon, Elealeh, Kiriathaim,

³⁸Nebo, le Baal-meon (min pawlkhat kikhel), le Sibmah khuopite a lamphakia uhi; a lamphat uh khuopite min tha a phuo uhi.

³⁹Manasseh’ tapa Machir’ suonlehlahte, Gilead-ah pei-in tua gam a la vua, khum sunga om Amor-te a suonmang uhi;

⁴⁰tuaci’n Moses in Manasseh’ tapa Machir tungah Gilead pie a, khum munah ama a teng hi.

⁴¹Manasseh’ tapa Jair pei-in a khuotate uh la a, tuate Havvoth-jair[101] ci-in min a phuo hi.

⁴²Nobah pei-in Kenath le a khuotate la a, ama’ min tapin Nobah a phuoh hi.