Read Zou GAMLAH VANA 33 Bible Online

GAMLAH VANA 33 - Zou bible

GAMLAH VANA 33

¹Moses le Aaron makaina tawh Egypt gam pan Israel-te a honin a pei lai-un, galkap kivaipuoh dan tawh a khuolzinna uh mun teng pen tam teng ahi hi.

²Moses in TOPA’ thupiehna tawh phuol khat pan phuol khat a amau’ kipatna munte a giel hi. Tam teng pen amau’ kipatna mun tawh kizui-in a giephuolte uh ahi hi.

³A hla masa, tua hla ni sawm le ni nga ni-in Rameses panin a dingkhie uhi; peisan pawi a manzaw a zing ni-in Egypt-te’ mitmu-in Israel-te hangsan tahin a peikhie vua,

⁴TOPA in amate lahah a satlia a tacil uh zosie Egypt-te in a vui laitah uh ahi hi. TOPA in a pasien-te uh tung nangawnah thu a khen hi.

⁵Tuaci’n Rameses pan Israel-te ding khie-in Succoth-ah giephuol a sat uhi.

⁶Succoth pan ding khie-in senel gam mong Etham-ah giephuol a sat uhi.

⁷Etham panin amate dingkhie-in Baal-ephon tawh kimaingat Pi-hahiroth lamah a kiheikia uhi; amate in Migdol mai-ah giephuol a sat uhi.

⁸Pi-hahiroth pan dingkhie-in tuipi kantanin senel gamah a pei vua, Etham senel gamah nithum sung lamah pei-in Marah-ah giephuol a sat uhi.

⁹Marah pan dingkhie-in Elim a tung uhi; Elim-ah tuinah sawm le ni le lutu kung sawmsagi om a, khum munah giephuol a sat uhi.

¹⁰Elim panin a dingkhie vua, amate in San Tuipi[102] gei-ah giephuol a sat uhi.

¹¹San Tuipi[103] pan a ding khie vua, Sin senel gamah giephuol a sat uhi.

¹²Sin senel gam pan amate a dingkhie vua, Dophkah-ah giephuol a sat uhi.

¹³Dophkah pan amate dingkhie vua, Alush-ah giephuol a sat uhi.

¹⁴Alush pan a ding khie vua, mite dawn ding tui a om lona Rephidim-ah giephuol a sat uhi.

¹⁵Rephidim pan a dingkhie vua, Sinai senel gamah giephuol a sat uhi.

¹⁶Sinai senel gam pan a dingkhie vua, Kibroth-hattaavah-ah giephuol a sat uhi.

¹⁷Kibroth-hattaavah pan a dingkhie vua, Hazeroth-ah giephuol a sat uhi.

¹⁸Hazeroth pan a dingkhie vua, Rithmah-ah giephuol a sat uhi.

¹⁹Rithmah pan a dingkhie vua, Rimmon-perez-ah giephuol a sat uhi.

²⁰Rimmon-perez pan a ding khie vua, Libnah-ah giephuol a sat uhi.

²¹Libnah pan a dingkhie vua, Rissah-ah giephuol a sat uhi.

²²Rissah pana dingkhie vua, Kehelathah-ah giephuol a sat uhi.

²³Kehelathah pan a dingkhie vua, Shepher Muol ah giephuol a sat uhi.

²⁴Shepher Muol pan a dingkhie vua, Haradah-ah giephuol a sat uhi.

²⁵Haradah pan a dingkhie vua, Makheloth-ah giephuol a sat uhi.

²⁶Makheloth pan a dingkhie vua, Tahath ah giephuol a sat uhi.

²⁷Tahath pan a dingkhie vua, Terah-ah giephuol a sat uhi.

²⁸Terah pan a dingkhie vua, Mithkah-ah giephuol a sat uhi.

²⁹Mithkah pan a dingkhie vua, Hashmonah-ah giephuol a sat uhi.

³⁰Hashmonah pan a dingkhie vua, Moseroth-ah giephuol a sat uhi.

³¹Moseroth pan a dingkhie vua, Bene-jaakan-ah giephuol a sat uhi.

³²Bene-jaakan pan a dingkhie vua, Hor-haggidgad-ah giephuol a sat uhi.

³³Hor-haggidgad pan a dingkhie vua, Jotbathah-ah giephuol a sat uhi.

³⁴Jotbathah pan a dingkhie vua, Abronah-ah giephuol a sat uhi.

³⁵Abronah pan a dingkhie vua, Ezion-geber ah giephuol a sat uhi.

³⁶Ezion-geber pan a dingkhie vua, Zin senel gam ah giephuol a sat uhi (tua khu Kadesh mun ahi hi).

³⁷Kadesh pan a dingkhie vua, Edom gammong-Hor Muol ah giephuol a sat uhi.

³⁸Egypt pan Israel-te a peikhiet zaw uh a kum sawmlina, a hla ngana, a ni masa ni-in TOPA’ thupiehna tawh Hor Muol tungah siempu Aaron kato a, khum munah a si hi.

³⁹Hor Muol tungah Aaron a si laitahin kum za le kum sawmni le kum thum pha hi.

⁴⁰Canaan gam Negeb-a a teng Canaan mi Arad kumpipa in Israel-te ang pei hi ci thu a za hi.

⁴¹Hor Muol panin a dingkhie vua, Zalmonah-ah giephuol a sat uhi.

⁴²Zalmonah pan a dingkhie vua, Punon-ah giephuol a sat uhi.

⁴³Punon pan a dingkhie vua, Oboth-ah giephuol a sat uhi.

⁴⁴Oboth pan a dingkhie vua, Moab gam sung Iye-abarim ah giephuol a sat uhi.

⁴⁵Iyim pan a dingkhie vua, Dibon-gad ah giephuol a sat uhi.

⁴⁶Dibon-gad pan a dingkhie vua, Almon-diblathaim-ah giephuol a sat uhi.

⁴⁷Almon-diblathaim pan a dingkhie vua, Nebo tun masang Abarim muolte-ah giephuol a sat uhi.

⁴⁸Abarim muolte pan dingkhie-in Moab zanglei Jordan gungei Jericho-ah giephuol a sat uhi;

⁴⁹amate in Jordan gei Beth-jeshimoth panin Moab zanglei-a om Abel-shittim dongin giephuol a sat uhi.

⁵⁰Moab zanglei Jordan gungei Jericho khuo-ah TOPA in Moses hopi-in tam bangin a gen hi:

⁵¹Israel-te hopi inlen a kung vuah tam bangin gen in: Jordan gun kansanin Canaan gam na tun ciengun,

⁵²na mai panun tua gama a teng zosie notmang sieng unlen, a suong milim zosie uh suhsiet piehin, a kisung a milimte uh na susie ding vua, a munsang zosie uh na phelmang ding uhi.

⁵³Khum gam pen na nei ding vua kang pieh ahi ziehin tua leitang note in tang unlen a sungah teng un.

⁵⁴Na be na phung utawh kizui-in aisanna tawh tua leitang na hawm ding uhi; mici tamte a golzaw pie-in mici tawmte a neuzaw na pie ding uhi; mi khatpo tunga ai a tuhna popo ama-a’ hi pai ding hi; na be na phung sung vua na pate uh nam tawh kizui-in khum gam na luo ding uhi.

⁵⁵Ahi vangin na mai panun khum gama a na tengsa mite na nawmang sih uleh, na opsah lai uh mite pen note dingin na mit uh ang do, na pang uh ang sun ling tawh a kibang ding uhi; amate in na tenna gam vuah ang lung gimsah ding uhi.

⁵⁶Amate tungah bawl dinga ka ngaisut bangin na tung vuah kang bawl ding hi, ci-in gen in,” a ci hi.