Read Zou GAMLAH VANA 34 Bible Online

GAMLAH VANA 34 - Zou bible

GAMLAH VANA 34

¹TOPA in Moses hopi-in tam bangin a gen hi:

²Israel-te thupie inlen a kung vuah tam bangin gen in: Canaan leitangah na lut ciengun (Canaan gam, na luo ding vua gamgi hielsa a kang piehte tam teng ahi hi)

³na leitaw lampang uh pen Zin senel gam panin Edom pang teng hi ding hi. Na leitaw lam gamgi uh pen nisuona lamah Si Tuipi[104] mong pan kipan ding hi;

⁴na gamgi uh Akrabbim katona leitaw lamah kawi-in Zin kansan ding a, a mong tawpna pen Kadesh-barnea leitaw lam hi ding hi; tua ciengin Hazar-addar dong pei suohin Azmon kansan ding hi;

⁵Azmon panin Egypt Lui lamah gamgi kawi-in Tuipi-ah tawp ding hi.

⁶Nitumna lam gamgi dingin Tuipi Lien le tua[105]’ gun dung teng na tang ding uhi; tam pen nitumna lam na gamgi uh hi ding hi.

⁷Leilu lam na gamgi uh tam hi ding hi: Tuipi Lien panin Hor Muol dong na gamgi uh na ciemte ding uhi;

⁸Hor Muol panin Lebo-hamath dong na ciemte ding vua, gamgi mong in Zedad dong ban ding hi;

⁹tua ciengin Ziphron dong gamgi kihlung ding a, a mong pen Hazar-enan ah tawp ding hi. Tami khu leilu lam na gamgi uh hi ding hi.

¹⁰Nisuona lam na gamgi uh Hazar-enan panin Shepham dong na ciemte ding uhi;

¹¹gamgi pen Shepham panin Ain nisuona pang lama om Riblah dongah peisuh ding a, tua gamgi peisuhin Chinnereth tuipi nisuona lam gamken dong bansuh ding hi;

¹²Jordan dongin gamgi peisuh ding a, a mong pen Si Tuipi[106] ah tawp ding hi. Tam pen a kimvela gamgi nei na gam uh hi ding hi, ci-in gen in,” a ci hi.

¹³Moses in Israel-te thupie-in tam bangin a gen hi: Tam pen minam kuo le minam alangte tungah pieh dingin TOPA in a thupieh, aisanna tawh na luo ding uh leitang ahi hi;

¹⁴azieh pen Reuben minamte, amau’ innkuonte, le Gad minam amau’ pupa innkuonte in a gouluo uh a la zo ta vua, Manasseh minam alangte in zong a la zo ta uhi;

¹⁵Minam ni gel le minam alangte in a gouluo dingun nisuona lam, Jordan gal Jericho nisuona lam teng a la uhi,” a ci hi.

¹⁶TOPA in Moses kungah tam bangin a gen hi:

¹⁷Na luo ding uh leitang ang hawmpieh dingte min pen siempu Eleazar le Nun’ tapa Joshua-te ahi uhi.

¹⁸Na luo ding uh leitang hawm dingin minam simah makai khat ta na la ding hi.

¹⁹Tam teng pen amau’ min ahi hi: Judah minam sung panin Jephunneh’ tapa Caleb ahi hi.

²⁰Simeon minam sung panin Ammihud’ tapa Shemuel ahi hi.

²¹Benjamin minam sung panin Chislon’ tapa Elidad ahi hi.

²²Dan minam sung panin makai khat, Jogli’ tapa Bukki ahi hi.

²³Joseph’ tapate sung panin: Manasseh minam makai khat, Ephod’ tapa Hanniel ahi hi.

²⁴Ephraim minam sung panin makai khat, Shiphtan’ tapa Kemuel ahi hi.

²⁵Jebulun minam sung panin makai khat, Parnach’ tapa Eli-zaphan ahi hi.

²⁶Issachar minam sung panin makai khat, Azzan’ tapa Paltiel ahi hi.

²⁷Asher minam sung panin makai khat, Shelomi’ tapa Ahihud ahi hi.

²⁸Naphtali minam sung panin makai khat, Ammihud’ tapa Pedahel ahi hi.

²⁹Tam teng pen Israel-te adingin Canaan gamah leitang hawm dinga TOPA in thu a pieh mite ahi uhi,” a ci hi.