Read Zou GAMLAH VANA 35 Bible Online

GAMLAH VANA 35 - Zou bible

GAMLAH VANA 35

¹Jericho khuo Jordan gun gei Moab zanglei-ah TOPA in Moses hopi-in tam bangin a gen hi:

²Amate in luo-in a nei ding uh sung panin Levi-te a sunga a ten nading khuopite a pieh nadingun Israel-te thu pie in; khuopite kimvela lonona mun teng zong Levi-te na pie ding hi.

³Khuopite pen amau’ tenna hi ding a, lonona munte zong amau’ tuuhonte le bawnghonte, amau’ ganhonte le amau’ ganta zosie-a’ hi ding hi.

⁴Levi-te na pieh ding uh khuopi lonona munte in khuopi kul panin a kimkot tong tulkhat huom ding hi.

⁵Khuopi pulam te inlen nisuona lampang tong tulni, leitaw lampang tong tulni, nitumna lampang tong tulni, leilu lampang tong tulni hi ding a, a laikimah khuopi om ding hi; tam pen amau’ khuopi lonona munin a nei ding uhi.

⁶Levi-te na pieh uh khuopite sungah kibuhna khuopi guh kihal ding a, khum munah mi thatpa na taisah ding vua, tua banah khuopi sawmli le ni na piehbe ding uhi.

⁷Levi-te na pieh ding uh khuopi zosie a unpi-in sawmli le giet hi ding a, lonona gamte tawh hi ding hi.

⁸Israel-te’ neisa lah panin na pieh ding uh khuopite tawh kisai-in, mi citamte tung panin tampitah na la ding uhi; mi citawmte tung panin tawmkhat beh na la ding uhi. Amau’ luo gamh tawh kizui-in Levi-te tungah a khuopite uh a pie ciet ding uhi.

⁹TOPA in Moses hopi-in tam bangin a gen hi:

¹⁰Israel-te hopi inlen a tung vuah tam bangin gen in: Jordan galkai-in Canaan gam na tun ciengun, sawm lopi-in

¹¹khum munah mi khat a thatkha pa a tai thei nading, noma ading kibuhna khuopi dingin khuopite na tel ding uhi.

¹²Mihonpite mai-ah thukhenna a thuoh masangin, tua mithatpa a si lo nadingin khuopite pen phula pa kung pana na kibuhna uh hi ding hi.

¹³Noma adinga na ciemte uh khuopite ahile khuopi guh hi ding hi:

¹⁴Kibuhna khuopi dingin Jordan galkhatah khuopi thum, Canaan gam sungah khuopi thum na ciemte ding uhi.

¹⁵Sawm lopi-in mi khat a that khate khum munah a tai thei nadingin tam khuopi guhte pen Israel-te, note lahah a teng gamdang mite ahi sihle bakhat sung a peemte adingin kibuhna hi ding hi.

¹⁶Ahi vangin mi khat in sia vanzah khat tawh midang khat satin tua mipa a si leh ama tuolthat ahi hi; tua tuolthat pa kithat ding hi.

¹⁷Ahi sihle mi khat in mi si thei nading ahi a khut sunga a tawi suong tawh midang khat sepin a si leh, ama tuolthat ahi hi; tua tuolthat pa kithat ding hi.

¹⁸Ahi sihle mi khat in mi a si thei nading ahi sing tawh kibawl hiem khat tawh midang khat satin a si leh, ama tuolthat ahi hi; tua tuolthat pa kithat ding hi.

¹⁹Tua tuolthat pa pen sisan phulapa in that ding hi; ama gel a kimu ciengun sisan phulapa in tuolthat pa that ding hi.

²⁰Tua ma bangin mudana ziehin mi khat in adang khat sawnpua-in, ahi sihle na buhdapin bangkhat tawh khaw-in a si a,

²¹tua ahi sihle kigalbawlin a khut tawh tumin tua mipa a si leh, tua mitum pa kithat ding hi; tua mipa pen tuolthat ahi hi; ama gel a kimu ciengin sisan phulapa in tuolthatpa that ding hi.

²²Ahi vangin kigalbawlna om lopi-in midang khat thakhatin sawnpua-in, ahi sihle buhdap loin bang khat tawh sepin,

²³ahi sihle si thei nading suongtum khatpo tawi-in, a galte zong hi beh lo, suhliem zong sawm lo hi tama le sawm lopi-in[107] midang khat tungah tua suongtum in khieh kha-in tua mipa a si leh,

²⁴mi honpite in tuolthat pa le sisan phulapa’ kikalah tam ngaina kipte tawh kituohin thu khen ding uhi;

²⁵sisan phula pa khut sung panin mihonpi in tuolthat pa hunkhie ding uhi. Tua ciengin a kibuh masahna khuopi-ah tuolthat pa puohkia ding uhi. Sathau siengtho kinu siempu lien pa a si masangsie tua khuo-ah tuolthat pa a teng ding hi.

²⁶Ahi vangin tuolthat pa in hun khatpo-ah a buhna masa khuopi’ gamgi kansanin a pei a,

²⁷sisan phula pa in a kibuhna khuopi pulamah ama mukha-in phula pa in tua tuolthat pa a tha leh, ama in sisan suona ziehin mawna a puo sih ding hi.

²⁸Azieh pen siempu lien pa a si masangsie tua mipa pen kibuhna khuopi sungah a om ding hi; ahi vangin siempu lien pa a si zaw ciengin tuolthat pa inn ah pei thei ding hi.

²⁹Tam teng pen na khang tawntung vua na tenna uh mun zosie-ah thukham le ngaina kipte hi ding hi.

³⁰Mi khat in midang khat a tha leh tecite’ theina siasanin tuolthat pa kithat ding hi; ahi vangin teci khat beh’ tecipanna tungtawnin koima khat beh kithat lo ding hi.

³¹Tua banah sina dan thuoh dinga kilawm mipa khat a kitatna ding sum na sang sih ding uhi; tuolthat pa kithat ding hi.

³²Kibuhna khuopi-a a taisa mi khatpo, siempu lien pa a si masangin kilekia-in gam sungah a ten thei nadingin kibuhna khuopi-a galtai pa kitat nading sum na sang sih ding uhi.

³³Na tenna uh leitang na buasah sih ding uhi, sisan in leitang buasahin a sisan suohsah pa’ sisan longal tua leitang siensuo thei ding adang om lo hi.

³⁴Na tenna uh leitang na buasah sih ding vua, keima’ tenna leitang zong na buasah sih ding uhi; azieh pen keima TOPA Israel-te lahah ka teng hi, a ci hi.