Read Zou GAMLAH VANA 36 Bible Online

GAMLAH VANA 36 - Zou bible

GAMLAH VANA 36

¹Joseph’ suon Manasseh, Manasseh’ tapa Machir, Machir’ tapa Gilead, Gilead’ suon pupa innkuon lutang teng in nai-in Moses le Israel-te’ pupa innkuon lutang teng mai-ah a hopi uhi;

²“Aisanna tawh Israel-te luo ding leitang a pieh nadingin TOPA in ka pu thu a pie hi; a tanute tungah ka sanggampa uh Zelophehad’ gamhluote a pieh nadingin TOPA in ka pu thu a pie hi.

³Ahi vangin Israel minam dangte’ tapate khat penpen tawh a kinun uleh ka pate uh’ gamhluo panin amau’ gamhluo teng kila ding a, a pasal neina uh minamte’ gamhluo-ah kigawm in; tuaci’n ka ngasa uh gamh lah panin kilakhie ding hi.

⁴Israel-te’ jubilee a tun ciengin amau-a’ teng a pasal neina minamte tungah kigawm ding hi; ka pate uh’ gamhluote lah panin amau’ gamhluo kilakhie ding hi,” a ci uhi.

⁵Tua ciengin Moses in TOPA genna dung zui-in Israel-te thu pie a, “Joseph’ suonlehlahte’ thugente a dih ahi hi.

⁶Tam pen Zelophehad’ tanute tawh kisai-in TOPA’ thupieh hi a, ‘Hoi a sah pente utawh kinung uheh; ahi vangin a kinunpi ding uh pen a pa uh’ be le phung mite beh hi ding a,

⁷tuaci’n phung khat pan adang phung khatah Israel-te’ gamh kituon thei lo ding hi; azieh pen Israel-te zosie in a pate uh’ gamh a kemcing ding uhi.

⁸Israel-te zosie in a pate uh’ gamh a tan suoh thei nadingun Israel-te lahah gamhluo ding a nei tanu poma in a pate uh’ be sung panin pasal khat tawh kinung ding hi.

⁹Gamh pen phung khat panin adang phung khatah kituon thei lo ding hi; azieh pen Israel minam zosie in amau’ gamh ciet a kemcing ding uhi,’ ci hi,” ci-in a gen hi.

¹⁰TOPA in Moses a thupieh bangin Zelophehad’ tanute gamta uhi.

¹¹Mahlah, Tirzah, Hoglah, Milcah, le Noah-te, a pate uh’ sanggamte’ tapate tawh kinung uhi.

¹²Joseph’ tapa Manasseh suonte’ bete tawh kinungin, tuaci’n a pa uh’ minam le be sungah a gamhluo uh om suoh den hi.

¹³Tam teng pen Moab zanglei, Jordan luigei-a Jericho mun, Israel-te kungah Moses tungtawnin TOPA in a gensah thupiehnate le ngaina kipte ahi hi.