Read Zou MICAH 7 Bible Online

MICAH 7 - Zou bible

MICAH 7

¹Gim ngapa hi tang e! Bangzieh ahei cile, khal lai-a singga a kilaw zaw le, lengga sangh a kikhop zaw ka bang ta a, ka neh ding lengga bawh ka mu ta sih hi; ka dugaw thei min masa zong a om ta sih hi.

²Gam sung panin mi citahte a mangthai ta vua, mi thuman koima a om nawn sih hi; sisan suo nadingin mi a buh kawikawi vua, khatlekhat lenthang a kisie uhi.

³A sie bawl ding pen a khut siem thei mama uhi; uliente le thukhente in guhgol a ngen vua, thuneite in amau’ dei teng a kigen vazieu uhi; tua ci bangin amate in thutang a lehei vazieu uhi.[27]

⁴Mihoi pena kineite ling tawh kibang a, thuman pena kineite daithaw-imna ling tawh kibang hi. Amau’[28] galvilte ni, amau’[29] dan thuoh ding ni, ang tung zo hi; tu-in amau’ buoizah hun ang nai mama ta hi.

⁵Na guolpa muong sinlen, na itte zong muong sin; na angkawi na zi tung panin na kam kotkhahte kemcing in;

⁶bangzieh ahei cile tapa in a pa simmaw bawlin, tanu in a nu langpan a, a monu in a innpi nu a langpan hi; na innkuonpi teng ma na gal a suoh hi.

⁷Ahi vangin kei ka hile TOPA ka en ding a, ka hutdamna Pasien ka lamen lenlon ding hi; ka Pasien in kei ei za ding hi.

⁸Ka galpa aw, kei tungah kipah sin; ka pua ciengin ka thokia lel ding hi; khuomiel ah ka to ciengin, TOPA pen khuovah ahi ding hi.

⁹Ama tungah ka maw zo ziehin kei lamah ama hing pangin, ama in kei adingin thu a khen masangsie, TOPA’ lungthahna ka thuoh kul ding hi. Ama in kei khuovah ah ei peipi ding hi; ama in dih ei tansahna ka mu ding hi.

¹⁰Tua ciengin ka galte in mu-in, ka kungah, “Na Pasien hei-a om ahei?” ci-a ei dong nu maizumna in khucip ding hi. Ka mit in ama’ puana[30] mu ding hi; lamdunga buonnawi a kitotcil bangin tu-in ama kituoncil ding hi.

¹¹Na kulbang a kicienkia ni ang tung ta hi! Khum ni ciengin gamgi kigolkeh mama ding hi.

¹²Khum ni ciengin Assyria gam panin[31] Egypt gam dong, Egypt gam panin Gunpi dong, tuipi khat pan tuipi khat dong, muolsang khat pan muolsang khat dongin, nangma kungah amate ang pei ding uhi.

¹³Ahi vangin a tunga teng mite le amau’ sepna ga ziehin, leitung gamkhing le gamdai suoh ding hi.

¹⁴Na ciengkhut tawh na mite tuu bangin cing in, nangma-a’ ahi na tuuhonte, um lei laikim gamlahah a guohtangun teng uhi. Tanglai hun ma bangin Bashan le Gilead ah amate an maisah in.

¹⁵Egypt gam pan nang peito lai bangin, na lamdangte ko[32] ei lah in.

¹⁶Minamte in a mu ding vua, amau’ thahatna zosie a zumpi ding uhi; a kam sung vuah a khut uh koi-in, a bil uh a bing ding hi.

¹⁷Gul bangin leivui a lieh ding vua, leitunga a bawhva teng tawh kibang ding uhi; a kulpite panun citun kawmin ang pusuoh ding uhi; a zau seng ziehun TOPA i Pasien lam ang kihei ding vua, amate in note zong ang giing ding uhi.

¹⁸Nangma’[33] neisa a omlai teng’ khielna maisahin, amau’ thupalsatnate a maisah thei nang bang Pasien a om amah? Hepina lah ding ama dei lam ahi ziehin, kumtawnin ama a lungthah zing sih hi.

¹⁹Ama in eite tungah lainatna ei neikia ding hi; i mawnate uzong a keng nei-ah tuoncil ding hi. Kote’[34] mawna zosie, tuipi thuh sungah na sepmang ding hi.

²⁰Tangtawng panin ka pu ka pate tunga na ciem bangin, Jacob tungah thumanna le Abraham tungah a kip citahna na lah ding hi.