Read Zou NAHUM 2 Bible Online

NAHUM 2 - Zou bible

NAHUM 2

¹Nang ang sim dingin a susie ding pa[4] khat ang kuonto zo ta hi. Na kul cing inlen, lampi zong vil in; a kawng gah inlen, na tha nei zosie san in.

²(Azieh pen a susie mite in amate susie-in amau’ baate a suhsiet vangun, TOPA in Israel’ thupina bangin Jacob’ thupina zong a ngai bangsahkia ding hi.)

³A galhangte’ lumte khu a san ahi hi; a galkapte in puonsan a sil uhi, Gal sim dingin amate a kiguolsah ni-in sakol leengte tunga siate te lihleh hi; gal sakolte[5] in gal sim ding ngahla-in a keng uh a sai vapial uhi.

⁴Gawldung cin tengah sakol leengte a mot tai vua, tuol-awng tengah amate suhtai totai kawikawi uhi; a melpuoh uh meisel kuong tawh kibang a, tunphe bangin a phe leplep uhi.

⁵Ama in a uliente hlan hi; mailamah a pei ciengun kipalpua uhi; kulpi a kidenna vua, a lum[6] utawh a kidal uhi.

⁶Gun tunkotte kihong a, kumpi innpi kiling hi.

⁷Sala pei dingin khuopi[7] thukip kipie[8] a, a sila numeite kikaimangin, vahui bangin mau-in a awm a beng uhi.

⁸Nineveh khuopi pen a tuite[9] a kang sieng buol tawh kibang hi. “Khawl un! Khawl un!” a kici vangin koima kinuahei lo hi.

⁹“Ngunte lahpieh unlen, khamte lahpieh un! A goute un tawp hun nei lo hi! Van manpha cinteng tam valuh sam e!” ci hi.

¹⁰Suhsietna, hawmsuona, le kisietna! Lung tawpin khupte tun a, kawng zosie kilingin, maitang zosie a muolmang hi!

¹¹Koima in nawngkaisah loin, humpite le humpi note a va kawikawina mun khu hei sungah om a, humpite kuo le humpi khanglaite’ leihawm[10] bang suoh a ta ahei?

¹²Humpi in a note adingin a khamkhop ding uh sa ehmal a, humpi anute adingin a samat a lawlmeh pieh hi; leihawm sungah sa dimsah a, a ki-ehmal satelte tawh a kuo sung kidimsah hi.

¹³En in, nang kang langpang hi, Vanglien TOPA in ci hi. Keima in na[11] sakol leengte haltumin meikhu kitung ding a, namsau tawh na humpi khanglaite ka vatmai ding hi; leitung panin na kiva nading sate ka sumaimang ding a, tuale na kamtaite’ awging kiza ngai nawn lo ding hi.