Read Zou NAHUM 3 Bible Online

NAHUM 3 - Zou bible

NAHUM 3

¹Sisan luonna khuopi, zuouna le van lahpiehna tawh a kidim, misuomte a ven lona khuopi aw! gimna na thuoh ding hi!

²Sakol kisat ging le lengkang kigawt ging, sakol koptaite ketot ging le sakol leeng kitomte ging khu!

³Sakol galkapte in a phe valeh namsau le a tee lihleh teipite tawh gal a do vua, a kiseng misi lomtang teng, tuolluong lum misi teng, misi luongte a tawp thei sih a, siluongte tungah a kipai uhi!

⁴Tamte zosie simzawh lo, numei pahtat nu’ a thanghuoi gamtatna zieha pieng hi a, ama etlawmin ngaibang a, mibum siemnu zong ahi a, mi thangtatnate’ tungtawn le a mi bumna tungtawnin ama in minamte salin a bawl[12] hi.

⁵Nang kang langpan hi, Vanglien TOPA in ci hi, na maitangah na nih ka lemto ding hi; tua hile minamte in guohtanga na opna le kumpi gamte in na zumhuoina kang ensah ding hi.

⁶A kidahhuoi buathah tawh kang sep ding a, hing simmaw bawlin, mite’ et dingin kang bawl ding hi.

⁷Tua ciengin ang mu zosie nuakinin, “Nineveh khuopi kisie ta hi; koi in ama a kaa ta ding ahei? Ang henem ding mi hei-ah sui ding ka hei?” ci ding uhi.

⁸Nile gun gei-ah om a, tui in a kimkot, a leicien tuipi le a kulpi tui ahi, Thebes[13] sangin nang a thupizaw na hi amah?

⁹Ethiopia[14] le Egypt zong ciengtan nei lo ama’ thahatna ahi hi; Put mite le Libya mite pen ama[15] a panpite ahi uhi.

¹⁰Hinanle ama gambel a suoh a, saltang dingin a pei hi; gawlzin bul cintengah a tasente nangawn a ki-ehmal hi; a miliente adingin ai kisan a, a mithupi zosie siakol kibul hi.

¹¹Nang zong zu khamin a kiphuol[16] dingin na pei ding a, galte kung panin kibuhna na sui ding hi.

¹²Na kulpite zosie a ga a min masa pen theikung bang ding a, a kithin leh a ne ding pa’ kam sungah tuate a kiesuh ding hi.

¹³Na galkapte en in: Na mai-ah amate numei ahi uhi. Na galte adingin na gam tunkotte a kigol hon mama hi; na tunkotgolh zawlte mei in a katum ta hi.

¹⁴Ei ki-im hun sung teng adingin tui tawi-in na kulpite detsah in; tehlei khen nadingin buon pawi inlen, tehlei kisehna kuong a baisa-in koi in!

¹⁵Khum munah mei in hing katumin, namsau in nang ang bansan ding hi. tua in kauphe bangin ang netum ding hi. Kauphe bangin na khang a, khuombai bangin na pung hi!

¹⁶Na sumbuhte vana aasi sanga a tamzaw dingin na khangsah hi. Kauphe in a vun khelin a lengmang ta hi.

¹⁷Nang ang cingte ahile, khuombai tawh a kibang vua, na laitheite, khuodam ni-a daithaw tunga a tu, nisuo cienga a lengmang kauphe hon[17] tawh kibang uhi; amau’ tunna le banna mun koima in thei lo hi.

¹⁸Assyria kumpipa aw, na tuucingte a kimu uhi; na mi thupite a lusu uhi. Muol tungah na mite a kithezah vua, a khawmtuo ding koima om lo hi.

¹⁹Na liemna a nuom tuomsah ding mi a om sih a, na hima pen a dam thei lo nam ahi hi. Na thu a za mi zosie in a khut a beng ding uhi. Azieh pen a tawp thei lo na gitlona panin koi suohta ngai ahei?