Read Zou HABAKKUK 2 Bible Online

HABAKKUK 2 - Zou bible

HABAKKUK 2

¹Ka galvilna tausang tungah dingin, leicien tungah ka pang ding hi; ama in keima kungah bang ei gen ding a, ama[4] in ka phunna tungtang bang ei ci dawnkia ding ahei, ci ka en ding hi.

²Tua ciengin TOPA in kei ei dawng hi: A tai mipa khat’ sim thei dingin suongpehte tungah a kicienin, tua mangmuna giel in;

³azieh pen a kise hun adingin mangmuna khat om lai hi; tua in hun tawp ding thu gen ding a, zuou lo ding hi. A kiheh tuoh lezong ngah in; ang tung valon ding a, ang kiheh sih ding hi.

⁴Mi kisatheite en vawi! A lungsim puoh uh a man sih hi, ahi vangin midihte ahi uleh amau’ upna ziehin a hing ding uhi.[5]

⁵Tua banah hauna[6] a zuou thei hi; mi kiliensahte kip lo hi. Misikhuo bangin a lawlte uh gol hi; amate in Sina ma bangin pha zo, ci hun a nei ngai sih uhi. Amate adingin minam zosie a khawmtuo vua, amau-a’ bangin minam zosie a kaikhawm uhi.

⁶Mi zosie in tua bang mite pen simmawna kam ahi thu hahsate tawh a tawh vua, “Amau-a’ ahi lopi nei le lam a vum a vala kholte in gimna a thuoh ding hi!” ci-in amate thu gen lo ding uh amah? Ang kipong vante tawh bang tanvei no le no hau sawm na hi uh ahei?

⁷Na sum ang leitawite thakhatin ang kuonin, hing phongin, hing citunsah lo ding uh amah? Tua ciengin amau’ tomgam van na suoh ding hi.

⁸Minam tampite bulu zo na hi ziehin, a hinglai mi zosie in nang ang bulu ding hi. Leitunga khuopite le a sunga teng zosie tungah tatsietna tawh na bawl zieh le mi sisan na suosah ziehin, nang ang kibulu ding hi.

⁹“Na innsung adingin a man lo tawh sum a nga, sietna in ang bat lo nadingin a sangna muna bu a tom nang in gimna na thuoh ding hi!” a ci hi.

¹⁰Mi tampi suhsietna tawh na innsung maizum nading gelin na hinna na tanlaw hi.

¹¹Kul panin suongte kiko ding a, innsingte panin a kizut za[7] in dawngkia ding hi.

¹²“Sisan suona tawh khuopi a lam le khielna tawh khuopi a sat nang in gimna na thuoh ding hi!” a ci hi.

¹³Mei kahvam ding bepin mite in na a sem vua, minamte in kimanna a nei lo, gim nading bepa a sep uh pen, Vanglien TOPA kung pana ang pei hi lo amah?

¹⁴Hinanle tuite in tuipi a tuom bangin, TOPA’ minthanna theitheina tawh leitung a kidim ding hi.

¹⁵“A guohtanga a op uh na et nop ziehin na innvengte zu tekhamin, a kham masangsie uh na lungthahna[8] a buohsuh nang in gimna na thuoh ding hi!” a ci hi.

¹⁶Minthanna tangin simmawna tawh nang na kilungkimsah ding hi. Nang le nang in dawn inlen zukhamin hawipua in![9] TOPA’ ziet lama hai na tungah ang tung ding a, na minthanna tungah maizumna ang tung ding hi!

¹⁷Azieh pen leitunga khuopite le a sunga tengte zosie, tatsietna tawh a kibawl zieh le mihing sisan a kisuo ziehin, Lebanon tunga a kibawl tatsietna in ang nuoicip ding a, ganhingte kisuhsietna in nang ang zausah ding hi.[10]

¹⁸Hunkhat lai-in a bawlpa in a lem milim khu bangin kimang a, a kikhengtawm zuou milimte le zuou thuhil siete bangin kimang ahei? Azieh pen a bawlpa in a piensah na pen a ham thei lo milim khat ahi lel vangin, a bawlsa na tungah ama in muonna a nei hi!

¹⁹Sing kungah, “Khanglo ven!” ci-in, a ham theilo suong kungah, “Tho ven!” a ci pa in gimna a thuoh ding hi! Tua in a hil thei ding amah? En in, tua khu ngun le kham tawh kizut ahi a, a sungah hinna hu a om sih hi.

²⁰Ahi vangin a inn sungah TOPA om a, ama mai-ah leitung zosie sip dide-in om ta uheh!