Read Zou ZEPHANIAH 1 Bible Online

ZEPHANIAH 1 - Zou bible

ZEPHANIAH 1

¹Judah kumpi Amon’ tapa Josiah Kumpipa hun laitahin Hezekiah’ tapa Amariah, Amariah’ tapa Gedaliah, Gedaliah’ tapa Cushi, Cushi’ tapa Zephaniah kungah TOPA’ kammal a tung hi.

²Lei maitang panin na vannuoi ka phietmai ding hi, TOPA in ci hi.

³Mihingte le ganhingte ka phietmai ding hi; vana leng vate le tuipi sunga ngate ka phietmai ding a, migilote ka kipaisah[1] ding hi. Lei maitang panin mihingte ka sumaimang ding hi, TOPA in ci hi.

⁴Judah langkhatah ka khut zahin, Jerusalem-a teng zosie langkhatah ka khut ka zah ding hi. Tam mun panin Baal a omlai zosie le milim biehna siempute’[2] min,

⁵inn khumvum tungah tuongin vantung na zosie bie-in a kunte, TOPA tungah kiciem napi Milcom pasien[3] tunga zong a kiciem mite,

⁶TOPA zuina panin kinua hei-in TOPA a sui lote, ahi sihle ama thu a dong lote, ka sumaimang ding hi.

⁷TOPA Pasien mai-ah sip khinkhian un; bang ding ahei cile TOPA’ ni ang nai ta hi. TOPA in biehpiehna siem zo a, ama in a zinte siensuo zo hi.

⁸TOPA’ biehpieh ni-in kumpi uliente, kumpi’ tapate le, gamdang puon tawh a kizem zosie dan ka tuohsah ding hi.

⁹Khum ni ciengin sangkil kan zosie, tatsietna le zuouthu tawh a pu pa’ innsung a kidimsah zosie, dan ka tuohsah ding hi.

¹⁰Khum ni ciengin Nga Tunkot panin kaana awging, Veng Nina panin mauna le muoltangte panin sil kisukha a ging vapuoh kiza ding hi, TOPA in ci hi.

¹¹Mortar Venga tengte aw, kap unlen mau un. Bangzieh ahei cile sumbawlte a kisie sieng ta vua, ngun tawi a te mite zosie kisumaimang zo hi.

¹²Khum hun ciengin Jerusalem, meivah tawh ka long ding a, amate in a te uh ahi ngunte tungah nuomtaha[4] a om hit hiet mite, a lungsim sung vuah, “TOPA in na hoi sem loin, sietna zong sem lo ding hi,” a cite dan ka pie ding hi.

¹³Amau’ neisate kisutmang ding a, a innte uzong kisie gawp ding hi. Amate in innte lam nan ule a sungah a teng sih ding uhi; amate in lenggui suon nan ule a zu a dawnkha sih ding uhi.

¹⁴TOPA’ ni thupi ni ang nai ta a, ang nai a, ang kinaw mama hi. TOPA’ ni husa gin awging khu a thuoh hamsa mama a, khum munah galhangte a awng vapuoh uhi.

¹⁵Khum ni pen thangpai ni, lungkham sinkham ni, manthai ni le kisiet ni, khuo miel ni le lungzin ni, meiipite kai-in khuo a miel keikui ni,

¹⁶kulpi nei khuopite le a thupi gal panna munte sim nadinga pengkul kimut ni le, gal kikap kikona ni ahi hi.

¹⁷Keima in mite tungah tua bang lungkhamna ka tungsah ding a, amate pen mittaw lam pei tawh a kibang ding uhi; bangzieh ahei cile TOPA tungah a khiel zo uhi. Leivui bangin amau’ sisan kisungsuh ding a, tuale a tahsate uh pen eh tawh kibang ding hi.

¹⁸TOPA’ thangpai ni ciengin, a ngun le a khamte un hunkhie zo lo ding a, a thangpaina meikuong sungah leitung bup katum ding hi; ama in leitunga teng mi zosie tungah a zauhuoi manthaina a tungsah ding hi.