Read Zou ZEPHANIAH 2 Bible Online

ZEPHANIAH 2 - Zou bible

ZEPHANIAH 2

¹A maizum thei lo minamte aw, kikhawmtuo unlen,

²ansi[5] a kisep mang bangin ang kisemang masang, TOPA’ lungthahna le TOPA’ thangpaina ni, na tung vuah ang tun masangin, kikhawm un.

³Ama’ thupieh bang semin a kiniemkhieh gammi zosie aw, TOPA sui un. Dihna sui unlen, nunnemna zong sui un; TOPA’ thangpai ni ciengin ang kiphuol zo thei kha ding hi.

⁴Bangzieh ahei cile Gaza kitaisan ding a, Ashkelon hawmsuoh ding hi; suntang laipi-in Ashdod-te kidelmangin, Ekron kiphungkal ding hi.

⁵Tuipi gei-a a teng no Chereth-te in gimna na thuoh ding uhi! Philistia-te gam Canaan aw, TOPA’ kammal in na langkhatah thu a gen hi; a teng ding koima khat zong a kinuasie lo dongin, nangma kang susie ding hi.

⁶Tuipi gei-a gam aw, nang pen gan cinna mun, tuucingte adingin lonona mun le tuuhuong na hi ding hi.

⁷Judah innkuon a omlaite in tuipi gei-a om gam a tang ding vua, amate in khum munah gante cingin nitah lam ciengin Ashkelon-a a innte sung vuah amate a lum ding uhi. Azieh pen TOPA a Pasien un amate ve ding a, a nei a lam teng uh a ngai bangin a kipiekia ding hi.

⁸Moab-te’ zakona, Ammon-te’ mi gensietna, ka mite a zakona ule, amau’ gam sim dinga a kisah thei hamte uh ka za zo hi.

⁹Tua ahi ziehin keima a nungta Israel’ Pasien, Vanglien TOPA ka hi ma bangin, Moab-te khu Sodom bang ding a, Ammon-te, Gomorrah bangin, lahkhaite le cikhuhte in a gam sung uh luo ding a, kumtawna a kinuasie mun a suoh den ta ding hi. Ka mi a omlai teng in amau’ neisate a lahpieh ding vua, ka minam a hing laite in amau’ gam a luo ding uhi.

¹⁰Vanglien TOPA’ mite simmaw-in a kilietsah ziehun, amau’ kiletsahna zieha a thuoh ding uh gimna tami hi ding hi.

¹¹Amate adingin TOPA pen giinhuoi mama ding hi; leitung pasien-te zosie kizieltumsah ding a, minamte’ tuipi gam le tuikul gam zosie in a mun ciet uh panin ama a bie ding uhi.

¹²Ethiopia-te[6] aw, note zong ka namsau tawh ang kithat ding hi.

¹³Tuale ama in leilu lam langkhatah a khut zahin, Assyria susie ding hi. Nineveh gamkhing suohsah ding a, senel gam bangin a gawta ding hi.

¹⁴A sungah ganhonte le gamsa[7] vannuoi a lum ding uhi. Senel gam simbu[8] le a hamging simbute[9] in innkhuom dawnte giena-in a nei ding uhi. Tawlet ah simbu[10] ham ding a, sangkilah va-ah[11] ham ding hi.

¹⁵“Keima sim lo adang koi om ahei?” ama le ama kici-in, lungmuong taha a teng, lungdama a kipah khuopi hi lo amah? Bang dingin gamlah suohin, gamsate kuolna ahi ta vanuh adiei! Khum mun a zawt kha poma in ehneh ho-in khut a lelu uhi.