Read Zou HAGGAI 1 Bible Online

HAGGAI 1 - Zou bible

HAGGAI 1

¹Kumpi Darius in kumpi a sep kum ni a cin kum, a hla guhna, a ni masa ni-in kamsang Haggai tungtawnin Judah gam uhpa, Shealtiel’ tapa Zerubbabel le siempu lien pa Jehozadak’ tapa Joshua kungah TOPA’ thu tam bangin a tung hi:

²Vanglien TOPA in tam bangin ci hi: Tam mite in TOPA’ inn lamkia ding hun nai lo hi, a ci uhi.

³Tua ciengin kamsang Haggai tungah TOPA’ thu tungin tam bangin a gen hi:

⁴Tam innpi kisie gawpin a op laitahin inn hoipipi sungah na ten ding hun ma uh amah?

⁵Tua ziehin tu-in Vanglien TOPA in tam bangin ci hi: Na opdan uh kingaisun un.

⁶Khaici tampi na tu vua, an tawmno khat beh na la uhi; an na neh vangun na gil uh a va ngai sih hi; na dawn vangun na khamin na dawn ngai sih uhi; puonsil ding na nei vangun koima in lum na sa sih uhi; tuale sum thalaw pa in sum-ip tawvang khat sungah a koi dinga a thalaw ahi lel bo hi.

⁷Vanglien TOPA in tam bangin ci hi: Na opdan uh kingaisun pha un.

⁸Tua sungah keima nuomtahin tengin ei kipatawi thei nadingin muol tungah kato-in sing va sui ta unlen, inn lam un, TOPA in ci hi.

⁹Note in tampitah na lamet vangun halno khat beh a pha hi; tuale innah tuate na tut uh ciengin kang semmang pieh ding hi. Vanglien TOPA in bang ding in lah? ci hi. Keima’ inn a kisiet gawp ziehin na inn ciet uh na nawdel uhi.

¹⁰Tua ahi ziehin note tunga vantungte in daitui kangsah a, leitang in ga gasah lo hi.

¹¹Keima in gam le muolte tung, ankung tung, lenggazu tha tung, sathau tung, leitang pana a piengte tung, mihing ganhing le amau’ nasepna zosie tungah guotui ka kangsah zo hi.

¹²Tua ciengin Sheatiel’ tapa Zerubbabel le siempu lien pa Jehozadak’ tapa Joshua in mi a omlai teng zosie tawh TOPA a Pasien uh’ thugente le TOPA a Pasien uh’ sawl ahi kamsang Haggai’ thugente a mang uhi; tuale mipite in TOPA a giing uhi.

¹³Tua ciengin TOPA’ kamtai Haggai in mite tungah TOPA’ thugente gen a, note kang ompi hi, TOPA in ci hi, ci-in a gen hi.

¹⁴TOPA in Sheatiel’ tapa Zerubbabel’ lungsim, Judah gam uhpa’ lungsim, siempu lien pa Jehozadak’ tapa Joshua’ lungsim le mi a omlai teng’ lungsim a thosah hi; tuale amate pei-in Vanglien TOPA a Pasien uh’ inn ah na a sem uhi.

¹⁵Khum ni pen Kumpi Darius in kumpi a sep zaw a kum nina kum, a hla guhna a ni sawmni le ni li ni ahi hi.