Read Zou HAGGAI 2 Bible Online

HAGGAI 2 - Zou bible

HAGGAI 2

¹Kumpi Darius a kumpi sep a kum nina, a hla sagina, a ni sawmni le khat ni-in Haggai tungtawnin TOPA’ thu tam bangin tung a:

²Judah gam a uhpa Shealtiel’ tapa Zerubbabel le siempu lien pa Jehozadak’ tapa Joshua, le mi a omlai teng tu-in hopi in. Note lahah

³nidang lai-a tam biehinnpi a minthanna a mu kha ngai koi teng na omlai vuoi mah? Tu-in tami bangci na sa vuoi? Na muna vuah bangma lo bang ta hi lo amah?

⁴Hizongle Jerubbabel aw, tu-in kihangsah in, TOPA in ci hi; siempu lien pa Jehozadak’ tapa Joshua aw, hangsan in; no gamsung mipi zosie aw, kihangsah un, TOPA in ci hi; note kang ompi ziehin na sem un, Vanglien TOPA in ci hi.

⁵Egypt gam panin nang pei lai-un note kang thuciem dung zui-in note lahah ka hlagau a teng hi; zau sih un.

⁶Azieh pen Vanglien TOPA in tam bangin ci hi: Keima in a sawt loin vanpi leipi, tuipi, le leigawte ka lawhthing kia ding hi.

⁷Minam zosie’ gou teng ang tun thei nadingin keima in minam zosie ka lawhthing ding a, minthanna tawh tami biehinn a kidim ding hi, Vanglien TOPA in ci hi.

⁸Ngun le kham keima-a’ ahi hi, Vanglien TOPA in ci hi.

⁹A kilam nukhia inn pen a kilam masa sangin thupizaw ding hi, Vanglien TOPA in ci hi; keima tami munah note cithei nopsahna kang pie ding hi, Vanglien TOPA in ci hi.

¹⁰Kumpi Darius a kumpi sep a kum nina, a hla sagi na, a ni sawmni le khat ni-in kamsang Haggai tung panin TOPA’ thu tung a:

¹¹Vanglien TOPA in tam bangin ci hi:

¹²Mi khat in a puon kihlip kawmah sa siengtho puo hinlen, tua puon kihlip tawh anlum khat popo ahi a, zu ahi a, a kihuon an khat popo ahi zongin a thamkhah leh, tua khu an siengtho suoh thei ding amah? Siempupa in, “An siengtho suoh thei lo ding hi,” ci-in a dawng hi.

¹³Tua ciengin Haggai in, “Misi luong khat a suhkhah ziehin a sieng lo mi khat in tamte khat popo a suhkhah leh, tua a suhkhahte a bua a suoh diei mah?” a ci hi.

¹⁴Haggai in, keima mai-ah tam minam le tam gam tua tawh kibang hi, TOPA in ci hi; tuale a khut utawh a sep zosie uzong tua bang hi ding hi; tua sunga a piehte uh a bua hi ding hi.

¹⁵Ahi vangin tami ni-a kipanin bang ang tung diei, ci tu-in ngaisun un. TOPA’ biehinnpi sungah suong khat tungah suong khat a kikoi masangin,

¹⁶na omdan kingaisun un.[1] An tena sawmni a opna munah mi khat a pei ciengin tena sawmkhat beh a na pha hi; lenggazu tena beelpi sawmnga a opna ah mi khat a pei ciengin tena sawmni beh a na pha hi.

¹⁷Huisapi, maaibuoh natna, le gielpi tawh note kang vatmai vangin keima lamah note nang kihei sih uhi, TOPA in ci hi.

¹⁸A hla kuona, a ni sawmni le lini ahi, tuni-a kipanin ngaisun un. Khum ni khu TOPA’ biehinn khuombul a kiphu ni ahi ziehin ngaisun un:

¹⁹Ansal sungah anci a kinuasie lai ei mah? Lenggui, theikung, mang kawlsing, le olive kungte khat beh a ga nai sih amah? Keima in tu ni-a kipanin note thupha kang pie ding hi.

²⁰Tuami hla ni sawmni le ni li ni-in Haggai tungah tam bangin TOPA’ thu a niveina a tung hi:

²¹Judah gam uhpa Zerubbabel hopi-inlen ama kungah gen in, keima in vanpi le leipi thingkhe-in,

²²kumpi gamte’ mang tophate ka khuleh ding a, namcin kumpi gamte’ hatna susie-in a sakol leengte le a hawlte ka khuleh ding hi; sakolte le a hawlte koipo a guolpa’ namsau tawh a si ding uhi.

²³Khumi ni-in Vanglien TOPA in a cina-ah, ka nasempa Shealtiel’ tapa Zerubbabel aw, nangma kang la ding hi, TOPA in ci hi. Tuale seal tupna khutsip bangin kang bawl ding hi; azieh pen keima in nangma kang teel zo hi, Vanglien TOPA in ci hi.