Read Zou ZECHARIAH 12 Bible Online

ZECHARIAH 12 - Zou bible

ZECHARIAH 12

¹Thuphuon Khat. Israel tawh kisai-in TOPA’ thugen tam bang ahi hi: Vante zahin leitung bulpi phut a, mihingte sungah hlagau a guon TOPA in tam bangin ci hi:

²En in, Jerusalem khu a kimvela om mite in khamin a hawipua thei nading uh zuhai-in ka bawl ding hi; Jerusalem sung a ki-imtawm ciengin Judah zong ki-imtawm ding hi.

³Khum ni ciengin mi zosie adingin Jerusalem suongtum gih mama khatin ka bawl ding hi; tua suongpi a dom mi zosie amau le amau kinah liemsuo mama ding uhi. Ama a do dingin leitunga minam zosie a peiton ding uhi.

⁴Khum ni ciengin keima in sakol zosie ka patausah ding a, a sakol tung tuongte ka mawsah ding hi. Ahi vangin keima in mi zosie’ sakol mit ka tawtsah ciengin mitphe loin Judah innkuonte ka en ding hi.

⁵Tua ciengin Judah bete amau le amau in, “Jerusalem-a tengte in Vanglien TOPA, a Pasien uh tungtawnin thahatna a nga uhi,” ci ding uhi.

⁶Khum ni ciengin keima in Judah bete, singkhuo tunga beel kisuong a so pielpual le butu lahah meila kuong ka bangsah ding hi; tuale amate in a kimvel a ziet a vei-a om mi zosie a valtum ding vua, Jerusalem-a ama’ mun ma-ah mite a tengkia ding uhi.

⁷Judah tungah David innkuon’ vang le Jerusalem-a tengte’ vang a kitawisang lo nadingin TOPA in Judah puonbuhte tungah guolzawna pie masa ding hi.

⁸Khum ni ciengin TOPA in Jerusalem-a tengte dal ding ahi ziehin, tuaci’n amate lahah a thanem pente Judah bang ding a, David innkuonte Pasien tawh kibangin amate mai-ah TOPA’ vantungmi bang ding uhi.

⁹Khum ni ciengin keima in Jerusalem a sim minam zosie suhsiet dingin ka sui ding hi.

¹⁰Keima in David innkuon le Jerusalem-a tengte tungah lainatna le thungetna lungsim ka sungsuh ding a, tuaci’n a sutpailetsa uh mipa khat[42] enin a tapa neisun kaa bangin a kap ding vua, a tapa masapen kaa bangin nasie tahin a kaa ding uhi.

¹¹Khum ni ciengin Megiddo zanglei-a Hadad-rimmon kaana za ma-in Jerusalem-a kaana lien mama ding hi.

¹²Tua gam kap ding a, David innkuonte a tuomin, a zite a tuomin, Nathan innkuonte a tuomin, a zite a tuomin,

¹³Levi innkuonte a tuomin, a zite a tuomin, Shimei innkuonte a tuomin, a zite a tuomin,

¹⁴a omlai a kinuasie innkuonte a tuomin, a zite a tuomin a kap ciet ding uhi.