Read Zou ZECHARIAH 14 Bible Online

ZECHARIAH 14 - Zou bible

ZECHARIAH 14

¹En in, TOPA’ ni ang tun ciengin na kung pana van kilate note lahah kihawm ding hi.

²Jerusalem sim dingin minam zosie ka khawm ding a, khuopi kila-in innte kibulu ding a, numeite kibuon gawp ding hi; khuopi alang salin kikai ding a, ahi vangin khuopi sunga a omlai teng kisumaimang lo ding hi.

³Tua ciengin TOPA kuonin gal kido huna kido bangin tua minamte a do ding hi.

⁴Khum ni ciengin Jerusalem nisuona lama a om Olive Muol tungah a keng tawh ama a ding ding hi; nisuona lam pan nitumna lam dong Olive Muol phal ni kisuo ding hi; tuaci’n Muol alang khat leilu lamah kikhinin, alang khat leitaw lamah kikhin ding a, kuompi gol mama khat pieng ding hi.

⁵Note na hi uleh, TOPA’ muol[45] kuom tawnin na tai ding uhi, azieh pen muol tegel kikala om tua kuom in Azal[46] dong ban ding hi; tuale Judah Kumpi Uzziah hunin zil lingin na taimang bangun na taimang ding uhi. Tua ciengin TOPA ka Pasien hing pei-in a misiengthote zosie ang zawpi ding hi.

⁶Khum ni ciengin khuodam ahi a, vuokieh[47] ahi zongin a om sih[48] ding hi.

⁷A kizom ni om ding a, (tua pen TOPA in a thei ni khat hi ding a) sun hun, zan hun ci om lo ding hi, azieh pen nitah hun ciengin khuovah om ding hi.

⁸Khum hun ciengin Jerusalem panin hinna tui luongkhie ding a, alang pen nisuona lam tuipi ah, alang khat pen nitumna lam tuipi ah luong ding hi; phalbi lai bangin khuokhal lai-in zong luong den ding hi.

⁹Leitung zosie ah TOPA, pen kumpi a suoh ding hi; khum ni ciengin TOPA khat beh hi ding a, a min zong khat beh hi ding hi.

¹⁰Geba panin Jerusalem leitaw lam Rimmon dongin gam buppi zanglei suoh ding hi. Ahi vangin Jerusalem pen Benjamin’ Tunkot panin tunkot masa le Kiu Tunkot dong, le Hananel Tausang panin kumpipa’ lenggazu suhna dongin a tuomin a opna ngai-ah om ding hi.

¹¹Tua khuopi ah kiteng ding hi, bangzieh ahei cile tua khuopi kisusiekia ngai nawn lo ding hi; Jerusalem lungmuongtahin a om ta ding hi.

¹²TOPA in Jerusalem tunga gal bawl mite zosie tami pul natna tawh vatmai ding hi: A keng utawh a ding laipima-in a sa uh muottop ding hi; A mitbu sung vuah a mittangte uh muotin, a kam sung vuah a lei uh a muottop ding hi.

¹³Khum ni ciengin TOPA tung panin amate tungah patauna lienpi khat tung ding a, tuaci’n mi khat ciet in a vengpa khut man ding a, mi khat in adang khat dona-in a khut uh a lam ciet ding uhi;

¹⁴Judah minamte nangawn in Jerusalem ah a do ding uhi. Amau’ kimvela a om minamte’ hauna zosie-kham, ngun, le puonsilte tampi tah kikhop siengpieh ding hi.

¹⁵Tam pul natna tawh a kibang pul natna pen sakolte, kalaohte, laate tung, le giephuolte sunga om ganhing zosie kungah tung ding hi.

¹⁶Tua ciengin Jerusalem a sim minamte lah panin a suohta lai zosie in Vanglien TOPA bie ding le buh[49] pawi sim dingin kumsimin Jerusalem ah kato ding uhi.

¹⁷Vanglien TOPA Kumpipa bie dingin leitunga om innkuonte a koimapo Jerusalem ah a kuonto sih uleh, amate tungah guo a zu sih ding hi.

¹⁸Egypt innkuonte kuonto loin amate mama a va op sih uleh, TOPA in buh[50] pawi sim dinga a kuonto lo minamte tunga a tunsah pul natna, amate tungah a tung ding[51] hi.[52]

¹⁹Tua bang pen buh[53] pawi sim dinga a kuonto lo minamte zosie le Egypt-te’ thuoh ding dan hi ding hi.

²⁰Khum ni ciengin sakol lawngte tungah, “ TOPA dingin a Siengtho,” ci-in kigiel ding hi. TOPA’ inn sunga an beelte, maitam mai-a kuongkumte bangin[54] siengtho ding hi;

²¹tuale biehpiehna pie mi zosie pei-in biehna sa huon nadingin tuate a zah thei nadingun Jerusalem khuo sung le Judah gam sunga anbeel zosie Vanglien TOPA adingin a siengtho ding hi. Khum hun ciengin Vanglien TOPA’ inn sungah sumbawlte[55] om nawn lo ding hi.