Read Zou ZECHARIAH 3 Bible Online

ZECHARIAH 3 - Zou bible

ZECHARIAH 3

¹Tua ciengin ama in TOPA’ vantungmi mai-a a ding siempu lien pa Joshua ei lah a, tuale ama mawsah dingin a ziet lamah Satan[8] a ding hi.

²TOPA in Satan[9] kungah, “Satan aw,[10] TOPA in nang ang phawhsie hi! Jerusalem a teel TOPA in nang ang phawhsie hi! Tam mipa pen mei kuolai pana kiladawh singba hi lo amah?” a ci hi.

³Tu-in Joshua in puon nieh mama silin vantungmi mai-ah a ding hi.

⁴Vantungmi in ama mai-ah a ding mite kungah, “A puon nieh sutpieh un,” a ci hi. Tuale ama kungah, “En in, nangma kung panin na khielna ka ladawh ta hi, tuale puon hoite kang silsah ding hi,” a ci hi.

⁵Tuale keima in, “Amate in a lu tungah diel siengtho khat khimsah uheh,” ka ci hi. Tuaci’n amate in a lu tungah diel siengtho khat khimsahin puon a silsah uhi; tuale ama kungah TOPA’ vantungmi a ding hi.

⁶Tua ciengin TOPA’ vantungmi in Joshua hlamuon a,

⁷“Vanglien TOPA in tam bangin ci hi: Ka lampite tawnin ka deinate na zui leh, ka inn uhin ka huong sung teng na sai ding a, tam sunga a ding mite lahah sungtum pusuo theina thu na nei ding hi.

⁸Siempu lien pa Joshua aw, tu-in nangma le na mai-ah a to na guolte in ngai un! Bangzieh ahei cile amate pen mailam thuhoi nading lim ahi uhi: Keima in Singba a kici ka nasempa kang peisah ding hi.

⁹Azieh pen Joshua mai-ah, mai sagi a nei suong khat ka phut zo a, tua suong tungah lai ka giel ding a, ni khat sungin tami gam’ khielna ka lamang ding hi, Vanglien TOPA in ci hi.

¹⁰Khum ni ciengin na lenggui ule na theikung uh nei-ah a pei dingin khatlekhat na kiciel ding uhi,” Vanglien TOPA in ci hi.