Read Zou ZECHARIAH 5 Bible Online

ZECHARIAH 5 - Zou bible

ZECHARIAH 5

¹Ka enkia leh a leng laiziel khat ka mu hi.

²Tuale ama in kei kungah, “Bang na mu ei?” ei ci hi. Keima in, “A leng laiziel khat ka mu hi; adung tong sawmni, avai tong sawm pha hi,” ci-in ka dawng hi.

³Tua ciengin ama in kei kungah, “Tam pen leitung maitang buppi-ah a vah kawikawi samsietna ahi hi; azieh pen laidal lang khata a kigiel bangin guta zosie kisumaimang ding a, a dal lang khata a kigiel bangin a manlopi-a[12] a kiciem zosie kisumaimang ding hi.

⁴Vanglien TOPA in a genna-ah, keima in tua laidal ka sawl zo ta a, gutate’ inn sung le a man lopi-a ka min tawh a kiciem mite’ inn sungah a lut ding hi; tua inn sungah teng den ding a, a sing a suong pumin tua inn a susie ding hi,” a ci hi.

⁵Tua ciengin kei lamah ei hopi vantungmi ang pei-in keima kungah, “Khuodah inlen tua ang pusuoh pen bang ahei en in,” ei ci hi.

⁶Keima in, “Tuami bang ahiei?” ka ci hi. Ama in, “Tua ang pusuoh pen law[13] ahi hi,” ei ci hi. Tuale ama in, “Tam pen gam sung zosie-a amau’ khielna[14] ahi hi,” ei ci hi.

⁷Tua ciengin hanawh tawh kibawl a husin ang kidomto leh tua law[15] sungah numei khat na to hi!

⁸Tuale ama in, “Tam pen Gitlona ahi hi,” ei ci hi. Tuaci’n ama in law sungah tua numei sawnsuhkia-in tua law’[16] kam tungah hanawh gihna tawh a nensuh hi.

⁹Tua ciengin ka khuodah leh kei lamah numei ni ang pei ka mu hi. Ama gel’ hlate sungah hui a om hi; ama gel in gun vapi’ hla tawh a kibang hla a nei vua, van le lei kikalah tua law[17] a lenpito uhi.

¹⁰Tua ciengin keima ei hopi vantungmi kungah, “Tua law[18] hei lama a lenpi to uh ahiei?” ka ci hi.

¹¹Ama in keima kungah, “Tuami ading inn khat lampieh dinga Shinar gama a lenpi uh ahi hi,” ei ci hi. Tua inn a kizaw ciengin amate in a kitunna ding munah tua law[19] a tung ding uhi,” ei ci hi.