Read Zou ZECHARIAH 8 Bible Online

ZECHARIAH 8 - Zou bible

ZECHARIAH 8

¹Vanglien TOPA’ thu ka tungah tam bangin ang tung hi:

²Vanglien TOPA in tam bangin gen hi: It luotna lienpi tawh Zion ka lainat a, thangpaina lienpi tawh ama ka lainat hi.

³TOPA in tam bangin gen hi: Zion ah ka kilekia ding a, Jerusalem laikimah ka teng ding hi; Jerusalem pen a muonhuoi khuopi kici ding a, Vanglien TOPA’ muol pen muol siengtho kici ding hi.

⁴Vanglien TOPA in tam bangin gen hi: A kum a tam seng ziehun puvuoite le pivuoite in a khut ciet vuah ciengkhut a tawi ding vua, Jerusalem lampi tengah a tokia ding uhi.

⁵Tuale khuopi sunga gawlzing lampi tengah a ki-apmai naupangte le numeite a dim ding uhi.

⁶Vanglien TOPA in tam bangin gen hi: Tu hun ciengin a omlai tam mite adingin tam thu pen a hi thei lo ding tawh a kibah vangin, keima adingin ahi thei lo ding tawh a kibang ding amah?

⁷Vanglien TOPA in tam bangin gen hi: Keima in nisuona lam gam le nitumna lam gam panin ka mite ka hundam ding hi;

⁸tuale Jerusalem-a teng dingin amate ka puoh ding hi. Amate pen munhuoina sung le dihna keima’ mi ahi ding vua, tuale keima zong amau’ Pasien ka hi ding hi.

⁹Vanglien TOPA in tam bang ci hi: Vanglien TOPA’ inn ahi biehinnpi a kilamkia nadingin khuombulpi a kiphu hun lai-in a na om kamsangte’ kam sung panin a gen uh thute tu nai-a tua thu a za note in na khut uh khausah un.

¹⁰Bangzieh ahei cile khum hun masangin mihing ganhing thaman a om sih a, a sungtum le a pusuoh mite adingin galte panin lungmuonna khat zong om loin, amate khatlekhat ka kidosah hi.

¹¹Ahi vangin tu-in nidanglai huna ka bawl bangin a omlai tam mite tungah ka bawl nawn sih ding hi, Vanglien TOPA in ci hi.

¹²Bangzieh ahei cile lungmuongin khai kitu ding hi; lenggui in a ga ga ding a, leitang in ga piengsahin vantungte in daitui pie ding uhi; tuale tami nate zosie pen tam mipi a oplai teng in ka ngasah ding hi.

¹³Judah innkuon le Israel innkuonte aw, minamte lahah hamsietin na om ngai ma bangun note hing hundamin mite thupha ngana na hi ding uhi. Zau sih unlen na khutte khausah un.

¹⁴Azieh pen Vanglien TOPA in tam bangin gen hi: Na pu na pate un ei thangpaisah lai-un amate tungah gimna tunsah ding sawmin ka lungsim ka khep vawt lo bangin,

¹⁵tuhun ciengin Jerusalem le Judah innkuon adingin na hoi sep ding ka sawmkia ta hi, Vanglien TOPA in ci hi; zau vawt sih un.

¹⁶Na sep ding uh tam teng ahi hi: Note khatlekhat thuman thutahin kihopi unlen, na khuopi tunkot vua thukhennate ah thuman le kilemna dingin thu khen un.

¹⁷Na lungsim sung vuah khat in khat tungah sil hoi lo bawl sawm sih un; azieh pen tamte zosie ka muda hi, TOPA in ci hi.

¹⁸Vanglien TOPA thu keima kungah ang tung a:

¹⁹Vanglien TOPA in tam bangin ci hi: Antan a hla lina, antan a hla ngana, antan a sagina, le antan a hla sawmna teng pen kipahna le lungdamna pawi bawlna hun hi ding a, Judah innkuonte adingin thanopna pawite hi ding hi: tua ahi ziehin thuman thutah le kilemna na dei un.

²⁰Vanglien TOPA in tam bangin ci hi: Mite le khuopi tampi-a tengte ang pei lai ding uhi;

²¹khuopi khat a tengte adang khatah a pei ding vua, “Hing pei un, eite pei-in TOPA tungah hepina ngenin Vanglien TOPA zong i sui ding uhi; kei mama ka pei ding hi,” a ci ding uhi.

²²Jerusalem ah Vanglien TOPA a sui ding le TOPA tungah hepina a ngen dingin mi tampite le minam thahatte a pei ding uhi.

²³Vanglien TOPA in tam bangin ci hi: Khum hun ciengin mi namcin lah panin ham tuomtuom a zang pasal sawm khat in Jew mi khat manin a puon tu kawmin, “Nang tawh zawhton vai, bangzieh ahei cile nang tawh Pasien a op lam ka za zo ta uhi,” ci ding uhi.