Read Zou ZECHARIAH 9 Bible Online

ZECHARIAH 9 - Zou bible

ZECHARIAH 9

¹Thuphuon Khat. Hadrach gam langkhatah TOPA’ thu tung a, Damascus tungah tu ding hi. Aram[29] khuopi[30] pen TOPA-a’ ahi ziehin Israel minam zosie zong ama-a’ ma ahi hi;

²tua tawh a kigamgi Hamath zong ama-a’ ahi a, amate a pil vangun Tyre le Sidon zong ama-a’ ma ahi hi.

³Tyre in ama adingin leicien bawl a, ama in leivui sunvum bangin ngun sungvum a, lam dunga buathah bangin khamte a sungvum hi.

⁴Ahi vangin tu-in a neisate TOPA in lahpieh ding a, a haunate tuipi sungah paipiehin mei in a katum ding hi.

⁵Ashkelon in tua mu-in a zau ding hi; Gaza zong a lungkhamin kintawm ding hi; a kinepna teng a tawp ziehin Ekron zong tua bang ma hi ding hi. Gaza pan kumpipa mangthai ding a, Ashekelon ah koima teng lo ding hi.

⁶Ashdod khuopi ah nam kisawhalte a teng ding vua, keima in Philistia-te’ kiletsahna ka tawpsah ding hi.

⁷Keima in a kam panin sisan le a haning kawm panin sil kidahhuoite ka ladawh ding hi; a omlai teng zong i Pasien adinga a omlai ahi ding uhi; ama pen Judah gam sungah be khat bangin om ding a, Ekron zong Jebus-te bang ding hi.

⁸Tua ciengin koima a sungtum a pusuoh a op lo nadingin, ka inn ah giephuol satin a cingin ka om ding hi; mi bawlsie koima in amate a tuoncil nawn sih ding hi, azieh pen tu-in keima in ka mit tawh ka mu zo ta hi.

⁹Zion’ tanu aw, nahpi tahin kipah in! Jerusalem tanu aw, a gingin awng in! En in, thumanna le hutdamna ahi na kumpipa kiniemkhieh tahin laa tungah laapi’ ta laano tung tuongin na kungah ang pei hi.

¹⁰Ama[31] in Ephraim panin leengte le, Jerusalem panin galsimna sakolte a sumaimang ding hi; galsim nadinga kizang thaltangte kisumaimang ding a, ama in minamte tungah kilem nading thu pie ding hi; ama uhna tuipi khat pan tuipi khat, Gunpi panin leimong dong hi ding hi.

¹¹Nang adingin zong ahile, nang tawh i thuciemna sisan ziehin, tui op lona leihawm panin na thongkiete ka hla ding hi.

¹²Lametna a om thongkiete aw, na mun muonhuoi vuah kilekia un; tuni-in nang tungah a zani-a kang pieh ding thu kang gen hi.

¹³Azieh pen ka thal bangin Judah ka kuoi zo ta hi; keima in Ephraim pen a thaltangin ka bawl zo hi. Zion aw, a do dingin na tapate ka hantawh ding a, Greece aw, amate in na tapate a do ding uhi. Galhangpa’ namsau bangin nangma kang tawi ding hi.

¹⁴Tua ciengin amate kungah TOPA kilah ding a, tunphe bangin a thaltang lengkhie ding hi; pengkul tumin leitaw lam pumpei lahah TOPA Pasien ang pei ding hi.

¹⁵Vanglien TOPA in amate dal ding a, amate in suongsepte[32] pumvalin a tuoncil ding uhi; zu bangin a sisan[33] uh a dawn ding vua, tua khu kuong bangin dimin, maitam kiute bangin tehlop ding hi.

¹⁶Khum ni ciengin TOPA a Pasien un ama’ mite tuuhon bangin hundam ding hi; kumpi lukhu-a suongmanpha bangin amate tee dimdiem ding uhi.

¹⁷Bangzieh ahei cile ama bang za-in hoi-in, ama bangza-in a etlawm diei izaw! An le zu tha in tangvalte le ngahnute a khanphasah ding hi.