Read Zou MATTHEW 1 Bible Online

MATTHEW 1 - Zou bible

MATTHEW 1

¹Abraham’ ta David, David’ suon Messiah Jesu’[1] khang ciemtena[2] tam bang ahi hi.

²Abraham’ ta Isaac, Isaac’ ta Jacob; Jacob’ ta Judah le a sanggam pasalte,

³a zi Tamar tawh a nei Judah’ ta Perez le Zerah, Perez’ ta Hezron, Hezron’ ta Aram,

⁴Aram’ ta Aminadab, Aminadab’ ta Nahshon, Nahshon’ ta Salmon,

⁵a zi Rahab tawh a nei Salmon’ ta Boaz, a zi Ruth tawh a nei Boaz’ ta Obed, Obed’ ta Jessi,

⁶le Jessi’ ta Kumpi David ahi hi. Uriah’ zi Bathsheba tawh a nei David’ ta Solomon,

⁷Solomon’ ta Rehoboam, Rehoboam’ ta Abijah, Abijah’ ta Asaph,[3]

⁸Asaph’ ta Jehoshaphat, Jehoshaphat’ ta Joram, Joram’ ta Uzziah,

⁹Uzziah’ ta Jotham, Jotham’ ta Ahaz, Ahaz’ ta Hezekiah,

¹⁰Hezekiah’ ta Manasseh, Manasseh’ ta Amos,[4] Amos’[5] ta Josiah,

¹¹Josiah’ ta Jechoniah le a sanggamte ahi a, Babylon ah sala a kipeipi hun pawla suoh ahi uhi.

¹²Babylon ah sala a kipeipi zaw ciengin: Jechoniah’ ta Salathiel, Salathiel’ ta Zerubbabel,

¹³Zerubbabel’ ta Abiud, Abiud’ ta Eliakim, Eliakim’ ta Azor,

¹⁴Azor’ ta Zadok, Zadok’ ta Achim, Achim’ ta Eliud,

¹⁵Eliud’ ta Eleazar, Eleazer’ ta Matthan, Matthan’ ta Jacob,

¹⁶Jacob’ ta pen Mary’ pasal Joseph ahi a, tua Mary panin Messiah[6] a kici Jesu a suoh hi.

¹⁷Tuaci’n Abraham pan David dong khang sawm le khang li hi a, David panin Babylon-a saltan dong khang sawm le khang li ma pha a, Babylon pan sala a kipeipi-a kipan Messiah[7] suo hun cieng dong khang sawm le khang li ma a pha hi.

¹⁸Tu-in Messiah[8] Jesu Khris ang suo dan tam bang ahi hi. A nu Mary pen Joseph tawh a kikham laitah ahi a, hinanle a lupton masangun Hlagau Siengtho in Mary a gaisah hi.

¹⁹A pasal Joseph pen mi thuman khat ahi ziehin mipi lahah ama daisah nuom loin khuldap ding a sawm hi.

²⁰Hinanle tam banga bawl dingin a ngaisut laitahin, ama kungah TOPA’ vantungmi khat kihil a, “David’ tapa Joseph aw, Mary na zi dingin la ngam la sin, azieh pen ama sunga a gai nau pen Hlagau Siengtho in a gaisah ahi bo hi.

²¹Ama in tapa khat nei ding a, tuapa in ama’ mite a mawna panun hunkhie ding ahi ziehin a min Jesu na phuo ding hi,” a ci hi.

²²TOPA in kamsangpa tungtawnin a gensa thute a tangtun nadingin tam thute a pieng ahi hi:

²³En un! Ngahnu[9] khat gai-in tapa khat nei ding a, ama’ min dingin Emmanuel a phuoh ding uhi. A khietna in, “Eite tawh Pasien omton” cina ahi hi.

²⁴A kimutna panin Joseph a khahlaw ciengin TOPA in ama a sawl bangin bawl pai a, tua nu a zi dingin a la hi.

²⁵Ahi vangin tua tapa[10] a suo masangsie tua nu a luppi sih a, tuale ama in a min Jesu a vaw hi.