Read Zou MATTHEW 10 Bible Online

MATTHEW 10 - Zou bible

MATTHEW 10

¹Tua ciengin Jesu[57] in a nuazui sawm le nite hlan a, hlabuate a nawmang thei nading ule natna satna namkim a damsah thei nadingun amate tungah thuneina a pie hi.

²Tam teng pen sawltahpi sawm le nite’ min ahi hi: A masa penin, Peter zong a kici pa Simon, a sanggampa Andrew; Zebedee’ tapa James, le a sanggampa John;

³Philip le Bartholomew; Thomas le siehdongpa Matthew; Alphaeus’ tapa James, le Thaddaeus;[58]

⁴Canaan-te Simon, le ama a leheh Judas Iscariot-te ahi uhi.

⁵Jesu in tami mi sawm le nite tam bang thupiehna tawh a sawl hi: Gentile-te lah heima sungah pei loin Samaria-te khuo ah zong lut sih unlen,

⁶Israel innkuon a mangthai tuute kungah peizaw un.

⁷Na pei kawmun, ‘Vantung gam ang tung bai ta ding hi’ ci-in lungdamna thu tangko un.[59]

⁸Cinate damsahin misite thosah unlen, miphahte[60] damsahin dawite notmang un. Man pie loin na nga uhi; man ngen loin na pie un.

⁹Na kawnggah sung vuah kham ahi a, ngun ahi a, sumngo ahi zongin vom sih unlen,

¹⁰na khuolzinna vuah thung-ip hile, songkhol ni hile, kedap hile, ciengkhut hile keng sih un; bang ding ahei cile nasemte pen neh mu dinga kilawm mawng ahi bo uhi.

¹¹Khuopi ahi a, khuota ahi zongin na lut ciengun na tunna ding uh a kilawm kan unlen, na pei masangsie uh khumnah om den un.

¹²Inn sung na lut ciengun hopi masa un.

¹³Tua inn tunna lawm ahileh amate tungah na thupha uh tung taheh; tunna lawm lo ahileh na thupha uh noma’ tungah kilekia taheh.

¹⁴Koima khat beh in ang tunsah nop sih a, na thugente uh a ngai nop sih leh, tua inn ahi sihle tua khuo na nuasie ciengun na keng vua leivuite thingkhie un.

¹⁵A tahtah a kang ci-in, thukhen ni ciengin tua khuomite sangin Sodom le Gomorrah khuomite’ thuohna thuoh nuomzaw tham ding hi.

¹⁶En un, ngiehon lahah tuu kihla bangin note kang sawl hi; tuaci’n gul bangin pilvang unlen vakhu bangin nunnem un.

¹⁷Thukhenna zumah note hing tutin a kikhopna uh inn sungah hing satgawp ding ahi ziehin amate na kidawm un;

¹⁸tuale keima ziehin gam-uhte le kumpite mai-ah thusit dingin ang kikai ding a, amate mai le Gentile-te mai-ah teci na hi ding uhi.

¹⁹Thusitna thuoh dingin ang kipeipi ciengin bangci genin bang gen ding ka hei ci lunghimaw sih un; azieh pen khum hun ciengin note tungah na gen ding uh ang kihil ding hi,

²⁰bangzieh ahei a gen ding no hi loin no tungtawnin na Pa uh’ Hlagau in ang gen ding ahi zaw hi.

²¹Unau le unau, a pa le a ta, thalup ding za dongin a kileheh ding vua, tate in zong nu le pate thalup dingin a langpan ding uhi.

²²Keima’ min ziehin mi zosie in ang muda ding uhi. Ahi vangin a tawpna donga a thuoh zote kihundam ding hi.

²³Khuo khatah ang bawlsiet uleh khuodang khatah tai un; azieh pen a tahtah a kang ci-in, Mihing Tapa ang pei masangin Israel khuote na tuonkim zo sih ding uhi.

²⁴“Nuazui khat pen a siepa tungah om lo a, nasem khat zong a pupa tungah om lo hi.

²⁵Nuazui khat pen a siepa tawh a kibah a, nasem khat zong a pupa tawh a kibah leh pha zo hi. Inntehpa bawn Beelzabul a ci uleh a innkuonpite tua sangin a min a siesah zaw sih ding uh amah!

²⁶“Tuaci’n amate giing sih un; azieh pen a kilang lo dinga a kiphuol bangma om lo a, a kithei lo dinga a ki-im zong bangma om lo hi.

²⁷Khuomiel sunga ka thugente khuovah ah gen un; na bil kawm vua ang kidapgen na thuzahte uh, innkhumvum panin tangko un.

²⁸Tahsa a tha thei vangin hlagau a that thei lote na giing sih unlen, hell[61] sunga tahsa le hla a ni-a a susie thei pa na giingzaw un.

²⁹Vato ni ciengin paisa khat tawh kizua lel hi lo amah? Hinanle na Pa uh’ deina a op sih leh tuate lahah khat beh tuolah kiesuh lo ding hi.

³⁰Na lu tung vua samzamte nangawn kisim sieng zo hi.

³¹Tua ahi ziehin zau sih un; vato tampi sangin na manphazaw uhi.

³²“Tua ahi ziehin midangte mai-a ei hum mi zosie, vantung ka Pa mai-ah ken zong ka hum ding hi;

³³ahi vangin midangte mai-a ei nuol poma ken zong vantung ka Pa mai-ah ka nuol ding hi.

³⁴“Leitung ah kilemna puoh dinga ang pei hi, ci-in ei ngaisun sih un; kilemna puoh dinga ang pei ka hi sih a, namsau leh dinga ang pei ka hizaw hi.

³⁵Azieh pen tapa le a pa, tanu le a nu, mo le innpinu a kidosah dinga ang pei ka hi hi.

³⁶Mi khat’ gal pen a innkuonpi sung pan hi ding hi.

³⁷Kei sanga a nu a pa a itzaw poma kei tawh kilawm lo hi; kei sanga a tapa a tanu a it zaw poma zong kei tawh kilawm lo hi;

³⁸tuale a singlamte puo-a ka nua ei zui lo poma kei tawh kilawm lo hi.

³⁹A hinna uh a mute in a tanlaw ding vua, keima zieha a hinna uh a tanlawte in a mu ding uhi.

⁴⁰“No ang sang poma kei ei sang hi pai a, kei ei sang poma in kei ei sawlpa zong a sang pai ahi hi.

⁴¹Kamsang pa khat kamsang ahi zieha a sang poma in kamsangpa’ thaman nga ding a, midih khat a dih zieha a sang poma in midihte’ thaman a nga ding hi.

⁴²A tahtah a kang ci-in, tami naupangnote lahah khat popo keima’ nuazui ahina ziehin tuivot hai khat nangawn a pie poma in a thaman uh nga loin a om sih ding uhi,” a ci hi.