Read Zou MATTHEW 11 Bible Online

MATTHEW 11 - Zou bible

MATTHEW 11

¹Jesu in a nuazui sawm le nite thu a hil zaw ciengin tua mun panin a khuopite vuah thuhil ding le thugen dingin a pei hi.

²Messiah’[62] silbawlte John in thong sung pan a zah ciengin ama’[63] nuazuite sawlin

³ama kungah, “Ang pei ding kicipa nang na mah, awleh adang khat ka na kinem lai ding vuoi?” cisah hi.

⁴Jesu in amate kungah, “Va pei unlen John kungah na zahsa ule na musa uh thu teng va gen ta un:

⁵Mittawte in khuo mu a, khelbaite lam pei-in miphahte[64] kidamsah a, bilbingte in khuoza-in misite kithosah a, mizawngte in lungdamna thu a za uhi.

⁶Keima tunga a lungkie lo poma thupha nga ahi hi,” ci-in a dawng hi.

⁷Amate a pei laitahun John’ thu gen dingin Jesu a kipan hi: Bang en dinga gamlaha pei na hi vuoi? Hui’ sem a, a zam kawikawi pumpeng amah?

⁸Tua ahi sihle bang en dinga pusuoh na hi uh ahei? Puon hoi sil mi pawlkhat[65] en nuom na hi uh amah? En un, puon hoi silte kumpipa inn sungah om uhi.

⁹Tua ahile bang pen en dinga pusuoh na hi vuoi? Kamsangpa khat amah? Hi hi, ke’n kang ci-in, kamsangpa sangin lienzaw hi.

¹⁰‘En in, na masangah ka kamtaipa ka sawl ding a, ama in na mai-ah na pei nading lampi a na sielkhol ding hi,’ ci-a kigiel pa khu tampa ahi hi.

¹¹A tahtah a kang ci-in, numeite sung panin a suohte lahah Baptize-pa John sanga a lienzaw koima a om sih hi; hizongle vantung gam sungah a neu pen nangawn ama sangin lienzaw hi.

¹²Baptize-pa John hun a kipan tuni dongin vantung gam in zawthaw bawlna na thuoh a, tua mi zothawte in thagum hatna a suong uhi.

¹³Bangzieh ahei cile John hun dongin kamsangte zosie le thukham in a na magen zo ta hi;

¹⁴tam thu na san nuom uleh ama pen ang pei ding Elijah ahi hi.

¹⁵Zah nading bil nei tapo in za taheh!

¹⁶“Tam khang mite bang tawh gente bep ding ka hei?

¹⁷Vanzuana munah amate to a, ‘Theile ka tum vangun na lam nuom sih uhi; kaa la ka sah vangun na kap nuom tuon sih uhi,’ ci-a khatlekhat a kigal hlat naupangte tawh a kibang uhi.

¹⁸Azieh pen bangma ne lo dawn loin John ang pei-in amate in, “Dawi lawmnei pa hi,’ a ci uhi;

¹⁹Mihing Tapa ang pei ciengin ne-in dawn a, ‘En un, anhai zuhai pa, siehdongte le mawneite’ guolpa,’ ci zel uhi. Ahi vangin pilna pen a sepnate in a man ahina lah hi,” a ci hi.[66]

²⁰Tua ciengin na lamdang a bawlna khuopite a kisiakia lo ziehun Jesu in tua khuomite a hosie hi.

²¹“Chorazin khuopi aw, gimna na thuoh ding hi! Bethsaida khuopi aw, gimna na thuoh ding hi! Bangzieh ahei cile na sung vua kibawl vanglietna nasepnate, Tyre le Sidon khuo-a kibawl hi poma leh sawtlaipi-in la-ip puon silin vut kibuohin a kisiakia zo ta ding uhi.

²²Ahi vangin ke’n kang ci-in, thukhen ni ciengin no thuoh ding sangin Tyre le Sidon khuote thuohna nuomzaw lai ding hi.

²³Tuale nang, Capernaum aw, vantung dongin ang kitawisang ding amah? Hi lo hi, Misikhuo dongah ang kikhiesuh ding hi. Azieh pen nang tunga ang kibawl na lamdangte, Sodom khuo-a kibawl hi poma leh tuni dongin tua khuopi om lai ding hi.

²⁴Ahi vangin ke’n kang ci-in, thukhen ni ciengin no thuoh ding sangin Sodom thuohna nuomzaw lai ding hi,” a ci hi.

²⁵Khum hunin Jesu in, “Lei le van TOPA ka Pa aw, tam thute mipilte le misiemte na im a, naupangte tungah tam thute na lah ziehin nangma tungah nuomthu kang tut[67] hi;

²⁶hi hi, ka Pa, tam bang pen na hepina zala nangma’ deina ahi hi.[68]

²⁷Ka Pa in keima tungah na vannuoi ei ap zo ta hi; tuale pa simlo Tapa a thei koima om lo a, Tapa le ama a lah thei nadinga Tapa in a teel mite simlo Pa a thei koima om lo hi.

²⁸“Vangih puo a, a gim mi zosie aw, ka kungah hing pei un, toidamna kang pie ding hi.

²⁹Ka hahkol puo unlen keima kungah hing kisin un; azieh pen kei khu mi nunnem le mi kiniemkhieh pa ka hi a, note in na hlagau adingin toidamna na nga ding uhi.

³⁰Azieh pen ka hahkol a puohnop a, ka van zong a zang hi,” a ci hi.