Read Zou MATTHEW 12 Bible Online

MATTHEW 12 - Zou bible

MATTHEW 12

¹Khum hun laitahin Jesu in sabbath ni-in mangbu lei nawhin a pei hi; a nuazuite a gil uh kiel a, amate in a neh dingun buvui a zut uhi.

²Pharisee-te in a mu bepun ama kungah, “En in, sabbath ni-in thukham tawh kituoh loin na nuazuite a gamta uhi,” a ci uhi.

³Ama in amate kungah, “David le a guolte a gilkiel laitahun a gamtatna uh na sim ngai sih uh amah?

⁴Pasien’ biehinn sungah lutin ama le a guolte neh dinga kilawm lo, siempute beh neh thei ahi Ompina anlum a ne uhi.

⁵Ahi sihle biehinn sunga om siempute in sabbath a tan lo vangun khiel a tang tuom sih uhi, ci thu thukham sungah na sim ngai sih uh amah?

⁶Ke’n kang ci-in, tam munah biehinnpi sanga a lienzaw khat a om hi.

⁷Ahi vangin, ‘Biehpiehna ka dei sih a, khuotuona ka deizaw hi,’ ci thu a khietna thei locin khielna nei lote na mawmat sih ding uhi.

⁸Azieh pen Mihing Tapa khu sabbath ni uhpa ahi hi,” a ci hi.

⁹Khum mun pan pei-in a kikhopna inn vuah a lut hi;

¹⁰tua tahah a khutzaw mi khat om a, amate in a mawsah thei nadingun ama kungah, “Sabbath ni-in cina damsah ding a kilawm ma amah? ci-in a dong uhi.

¹¹Ama in a kung vuah, “Note lahah mi khat in tuu khat nei hinlen, sabbath ni-in dum sungah kie leh; tua tuu va kai-in na lakhie sih ding uh amah?

¹²Tuu sangin mihing bangza tahin manphaw zaw ahei! Tuaci’n sabbath ni-in sil hoi sep ding kilawm hi,” a ci hi.

¹³Tua ciengin khutzaw pa kungah, “Na khut zah vawi,” a ci hi. Ama in a khut a zah leh alang khat bangin dam sieng pai hi.

¹⁴Ahi vangin Pharisee-te peikhie-in ama tha nading a geldap uhi.

¹⁵Jesu in tam thu a thei bepin kihemkhie hi. Mi tampite[69] in ama a zui uhi, tuale ama in a natna zosie uh damsah a,

¹⁶koima kungah ama’ thu a gen lo nadingun thu a pie hi.

¹⁷Tam pen kamsangpa Isaiah tungtawna kigen:

¹⁸“Ka it mama, ei lungdamsah, ka teelsa ka nasempa tanah om hi. Ama tungah ka hlagau ka koi ding a, ama in Gentile-te tungah thutang a tangko ding hi.

¹⁹Mi tawh kisel loin awsang tawh kiko lo ding a, gawl dung lahah zong a aw kiza lo ding hi.

²⁰Ama in thutang a guolzawsah masangsie, a zamsa pumpeng hliehtawng lo ding a, a kuong pimpem meivah detna gui zong mitsah lo ding hi.

²¹Ama’ minin Gentile mite a kinem ding uhi, ci thu a tangtun nading ahi hi.

²²Tua ciengin amate in mittawt le ham thei lo a thuo dawivei mi khat ama kungah a peipi uhi; tuale ham thei-in khuo a mu thei nadingin ama in tua mipa a damsah hi.

²³Mihonpite zosie in lamdang a sa vua, “Tampa David’ Tapa ahi thei kha diei izaw?” a ci uhi.

²⁴Hizongle Pharisee-te in tam thu a zah ciengun, “Dawimangpa Beelzebul suongin dawigilote a hawlkhiet ahi bo hi,” a ci uhi.

²⁵Ama in a ngaisutna uh thei a, amate kungah, “Amau le amau kido-in a kikhenthang gam zosie mangthai ding a, khuopi ahi a, innkuon khat ahi zongin ama le ama kido-in a kikhenthang leh a kip zo sih ding uhi.

²⁶Satan in Satan notmang leh ama le ama a kikhenthang ahi hi; tua hile ama’ gam bangci kip thei ding ahei?

²⁷Beelzebul suongin dawite a notmang ka hi leh na nawmang uh dawite[70] in koi suongin tuate notmang uh ahei? Tua ahi ziehin amate pen note tungah thukhente a suoh ding uhi.

²⁸Ahi vangin Pasien’ Hlagau tawh dawigilote a notmang ka hi leh note tungah Pasien’ manggam ang tung ahi ta hi.

²⁹Ahi sihle koi in mi thahatpa lep-ia masa lopi-in a inn bulu-in a neisate lahpieh thei ding ahei? A lep-ia zaw ciengin a inn sung bulu thei pan ding hi.

³⁰Kei lama pang lo poma kei ei langpang ahi a, kei ei kaikhoppi lo poma a thethang ahi hi.

³¹Tua ziehin ke’n kang ci-in, mi mawna vannuoi le Pasien a gensietnate uh kimaisah ding a, hizongle Hlagau langpangin a gensiete kimaisah lo ding hi.

³²Mihing Tapa langpanga thugente kimaisah ding a, ahi vangin Hlagau Siengtho langpanga thugen poma tu khangah ahi a, ang tung ding khangah ahi zongin kimaisah lo ding hi.

³³“A kung a hoi leh a ga hoi hi, na ci unlen a kung a hoi sih leh a ga zong hoi lo hi, na ci un; azieh pen singkung a ga tawh kithei thei hi.

³⁴No muoltan suonte aw! Migilo na hi ciengun sil hoi bang na ci gen thei ding uh ahei? Azieh pen lungsim sunga a dimlet thute kam tawh a genkhiet ahi hi.

³⁵Mihoi pa in sil hoi kholna panin a hoite suokhie a, migilo pa in sil hoi lo kholna panin a hoi lote a suokhie hi.

³⁶Ke’n kang ci-in, note in na thu motgente zosie uh ziehin thukhen ni ciengin thusitna na thuoh ding uhi;

³⁷azieh pen na thugente ziehin dih na tang ding a, na thugente zieh ma-in mawsahna na thuoh ding hi.

³⁸Tua ciengin thukham hil sie pawlkhat le Pharisee-te in ama kungah, “Siepa aw, “Nang tung panin lim lamdang khat ka mu nuom uhi,” a ci uhi.

³⁹Ahi vangin ama in amate kungah, “A gilo le angkawm hat khang mite in lim lamdang sui a, ahi vangin amate tungah kamsang Jonah’ lim losie bangma lim kipie lo ding hi.

⁴⁰Azieh pen ngapi gil sungah Jonah sun thum le zan thum a op ma bangin Mihing Tapa zong lei sungah sun thum le zan thum a om ding hi.

⁴¹Thukhen ni ciengin tami khangmite langah Nineveh mite dingin a mawsah ding uhi, azieh pen Jonah’ thuhilna ziehin amate a kisiakia uhi, tuale en un, tam tahah Jonah sanga a lienzaw khat a om hi!

⁴²Thukhen ni ciengin tam khang mite langah Leitaw lam gam kumpinu dingin a mawsah ding hi, azieh pen tua nu in Solomon’ pilna thu ngai dingin leimong khat panin a pei hi, tuale en un, tam tahah Solomon sanga a lienzaw khat a om hi!

⁴³“Mi khat sung panin hlabua a pusuo zaw ciengin khawl nading mun sui-in tui op lona munah vah kawikawi a, ahi vangin khat beh a mu sih hi.

⁴⁴Tua ciengin ama in, ‘Ka puokhietna inn ma-ah kilekia bo vang,’ a ci hi. Ama a tun leh tua inn na awng a, kiphiet sieng sinsenin hoitaha om a mu hi.

⁴⁵Tua ciengin kilekia-in ama sanga a gilozaw hla dang sagi zawpi a, amate lutin tua sungah a teng uhi; tua mipa’ opdan nukhia pen a masa hun lai sangin a siezaw hi. Tami a gilo khangmite zong tua ma bangin a om ding uhi,” a ci hi.

⁴⁶Mihonpite tawh a kiho laitahin a nu le a sanggamte ama hopi nuomin a pulamah a ding uhi.

⁴⁷Mi khat in ama kungah, “En in, na nu le na sanggamte, ang hopi nuomin a pulamah ding uhi,” a ci hi.[71]

⁴⁸Ahi vangin Jesu[72] in ama kunga tam thu a genpa kungah, “Ka nu koi hi a, ka sanggamte koi ahi uh ahei?” a ci hi.

⁴⁹Ama in a nuazuite kawhin, “Tamte khu ka nu le ka sanggamte ahi hi!

⁵⁰Azieh pen vantunga om ka Pa’ deina banga a gamta mi poma ka sanggam pasal, ka sanggam numei le ka nu ahi hi,” a ci hi.