Read Zou MATTHEW 13 Bible Online

MATTHEW 13 - Zou bible

MATTHEW 13

¹Khum ni ma-in tua inn panin Jesu peikhie-in tuili gei-ah a to hi.

²A kimkot ah mihonpite a tam seng ziehin gunkuong sungah pei-in to a, mihonpite ahile tuili gei-ah a ding uhi.

³Tuale ama in amate kungah gentena tawh thu tampi a gen hi: Ngai un! Khaici vawpa khaici vaw dingin a kuon hi.

⁴Khaici a vaw ciengin kimkhat lam lai-ah kie a, vate lengin a netum uhi.

⁵Khaici dangte suong tamna lei lahah kie a, leitang a thuh lo ziehin a popah hi.

⁶Ahi vangin ni a suo ciengin nisa kahin gawpmang hi; zung hla lo uh ahi ziehin vulnang sieng hi.

⁷Khaici dangte ahile lingkawm lahah kie a, tua lingkungte khangin a depgawp hi.

⁸Khaici dangte lei hoina munah kie a, pawlkhatte a za zakhat, pawlkhatte a za sawmguh, pawlkhatte a za sawmthumin ga hi.

⁹Zah nading bil nei tapo in za ta uheh!” a ci hi.

¹⁰Tua ciengin a nuazuite pei-in ama kungah, “Amate tungah bang dinga thugentena tawh thu na gen ahei?” ci-in a dong uhi.

¹¹Ama in, “Note tungah Vantung gam thusimte[73] theitheina ang kipieh vangin amate tungah kipie lo hi.

¹²Bangzieh ahei cile a neite kipiehbe ding a, tampitah nei ding hi; ahi vangin bangma nei lote kung panin a nei sun nangawn kilahpieh ding hi.

¹³Amate tungah thugentena tawh ka genna a hang pen, ‘Amate in enen napi mu thei loin, ngaingai napi a za thei sih vua, zong a tel thei sih uhi,’ a ci hi.

¹⁴Kamsang Isaiah a genkhol thute amate tungah a tung tahtah hi: ‘Na zaza ding vua, ahi vangin na thei zo sih ding uhi. ‘Na enen ding vua, ahi vangin na mu sih ding uhi.

¹⁵Azieh pen amate in a mit utawh en loin a bil utawh a za sih vua, a lungtang utawh thei siem loin kei lamah ang kihei lo nadingun, tam mite’ lungsim mawl mama a, a bilte un khuo za loin a mit a sing uhi,’ a ci hi.

¹⁶Ahi vangin na mit un mu-in na bil un a zah ziehin thupha nga na hi uhi.

¹⁷A tahtahin kang ci-in, kamsangte le midih tampite in na sil mute uh mu nuom mama napi mu loin, na thuzahte uh za nuom mama napi a za sih uhi.

¹⁸“Tua ciengin khaici vawpa thugentena ngai un.

¹⁹Mi khatpo in Pasien gam thu za napi a theisiem sih leh, gilopa pei-in a lungtang sunga a kivawsate a lahpieh hi; tam bangte pen lampi dunga kitute ahi hi.

²⁰Suong lahah kitute ahile mi pawlkhat in thu a zah behun lungdamin a pompai uhi;

²¹hinanle tua mipa zung thuh hla lo ahi ziehin bakhat sung beh hing a, tuami thu ziehin gimna ahi sihle bawlsietna a tun ciengin thakhatin a puakia pai hi.

²²Ling lahah kitute ahile thu za napi leitung lunghimawnate le hau nopnate in tua thute depgawp ahi ziehin a ga lote ahi hi.

²³Ahi vangin lei hoina muna kitute ahile thu a zah ciengun a theitel pai mite ahi a, tuate a ga ga pai a, khatvei a za zakhat, khatvei a za sawmguh, khatvei a za sawmthum a ga mite ahi hi,” a ci hi.

²⁴Ama in amate kungah thugentena dang khat gen a: “Vantung gam pen ama’ lo lai-a khaici hoi a vaw mi khatpo tawh kigente thei hi;

²⁵ahi vangin mi zosie a kimut kalin galpa khat pei-in mangbu lahah tamom vaw a, tua ciengin a pei hi.

²⁶Tuaci’n ankungte khangin a ga ang ga a, tua zaw ciengin tamomte ang kidawh hi.

²⁷Tuale inntehpa’ silate pei-in ama kungah, ‘Pu aw, na lo lai-ah khaici hoi vaw hi lo na mah? Tua ahile tam tamomte hei pana ang pei ahei?’ a ci uhi.

²⁸Ama in, ‘Tua pen galpa khat’ bawl ahi hi,’ ci-in a dawng hi. Silate in ama kungah, “Tua ahile pei-in ka va bawmang ding uh nei awi ei mah’ a ci uhi.

²⁹Ahi vangin ama in dawngkia a, ‘Bot sih un; azieh pen tamomte bot locin bu tawh na botton kha ding uhi.

³⁰Anlah hun masangsie a nipi-in khangton tadi heh; anlah hun ciengin anlate kungah, ‘Tamomte khawm unlen haltum dingin lomhen un, ahi vangin bute khawmin ka ansal sungah khol un,’ ci hi,” a ci hi.

³¹Ama in amate kungah thugentena dang khat gen a: “Vantung gam pen mi khat in la-in a lo lai-a a vaw ankam tang tawh kibang hi.

³²Tua pen khaici zosie lahah a neu pen ahi vangin ang gol ciengin ankungte lahah golpen a, singkung ang suoh hi, tuaci’n vana leng vate in a bazamte tungah bu a tom uhi,” a ci hi.

³³Ama in amate kungah thugentena dang khat gen a: “Vantung gam pen numei khat in tol la-in bunel hai thum tawh sawhalin, a unpi-in a zel sieng masangsie-a a saw tol tawh kibang hi,” a ci hi.

³⁴Jesu in tam thute zosie thugentena tawh mipite kungah a gen hi; thugentena zang loin amate kungah bangma gen lo hi.

³⁵Tam pen kamsangpa[74] tungtawna kigen: Thugentena tawh ka kam kahin thu ka gen ding hi; leitung[75] piencila kipanin a ki-imcip thute ka genkhie ding hi,” ci thu a tangtunna ahi hi.

³⁶Tua ciengin ama in mihonpite nuasie-in inn sungah a lut hi. Tuale a nuazuite in ama nehin, “Lo lai-a tamom thugentena ei hilcien in,” a ci uhi.

³⁷Ama in, “Khaici hoi vawpa pen Mihing Tapa ahi hi;

³⁸lo lai pen leitung hi-in, khaici hoi pen kumpi gam sung tate ahi uhi; tamomte ahile gilopa’ tate ahi vua,

³⁹tuate a vaw galpa pen dawimangpa ahi hi; anlah hun pen leitung hun tawp hun ahi a, anlate ahile vantung mite ahi uhi.

⁴⁰Tamomte kibotin mei tawh a kihaltum ma bangin, leitung tawp hun ciengin tua bangin a pieng ding hi.

⁴¹Mihing Tapa in a vantung mite sawl ding a, gam sungah mawna a piengsah mi zosie le sietna a bawl mite zosie a gam sung panin nil dawhin,

⁴²amate in meikhuhpi sungah sep ding a, khum tahah kaana le hagawina a om ding hi.

⁴³Tua ciengin midihte ahile a Pa uh’ gam sungah ni bangin a tang ding uhi. Zah nading bil nei teng in za ta uheh!

⁴⁴“Vantung gam pen lo lai-a a kiphuol gou tawh kibang a, mi khat in tua gou a mu ciengin phuoldap hi; tua ciengin lungdamin pei-in a neisa zosie zua-in tua lo a lei hi.

⁴⁵“Khat leuleu ah vantung gam pen kep manpha a sui sumbawlpa tawh kibang hi;

⁴⁶a tam man mama kep khat a mu ciengin ama pei-in a neisa zosie zua-in tua kep a lei hi.

⁴⁷“Khat leuleu ah vantung gam pen tuipi sunga a kipai, nga namcin a awhna len tawh kibang hi;

⁴⁸tua len a dim ciengin amate in pieu gei-ah kaikhie-in a tosuh vua, a hoi teng paai sungah guongin a hoi lo teng a paimang uhi.

⁴⁹Tuaci’n hun tawp ni ciengin tua bangin a pieng ding hi. Vantung mite hing pei-in midihte lah panin migilote khenkhie-in,

⁵⁰meikhuhpi sungah amate sepsuh ding a, tua tahah kaana le hagawina om ding hi.

⁵¹“Tam thute zosie na theikim ta vuoi mah?” a ci hi. Amate in, “Ingheh,” ci-in a dawng uhi.

⁵²Tuale ama in a kung vuah, “Tua ahi ziehin vantung gam adinga a kisinsa laitheite ahi ule a gou pana a tha le a lui a suokhie inntehpa tawh kibang hi,” a ci hi.

⁵³Jesu in tami thugentenate a gen zaw ciengin khum mun panin a peikhie hi.

⁵⁴Ama’ khuo a tun ciengin a kikhopna uh inn sungah mite[76] thuhil kipan a, tuaci’n amate in lamdang sa-in, “Tam mipa in tam bang pilna le sil thupi bawl theinate hei sung pana a nga viel adiei?

⁵⁵Khutsiempa’ tapa hi lel lo amah? A nu zong Mary kici nu hi lo amah? A sanggamte zong khu James, Joseph, Simon le Judas ahi sih uh amah?

⁵⁶A sanggam numeite zosie zong eite tawh omton ahi sih uh amah? Tua ahile tam mipa in tam teng zosie hei pana a nga ahei?” a ci uhi.

⁵⁷Tuale amate in ama a nuol uhi. Ahi vangin Jesu in amate kungah, “Kamsangte amau’ gam le amau’ inn sung longal-ah zatahna nga loin a om sih uhi,” a ci hi.

⁵⁸Ama in a up lona uh ziehin khum sungah na lamdang tampi bawl lo hi.