Read Zou MATTHEW 14 Bible Online

MATTHEW 14 - Zou bible

MATTHEW 14

¹Khum hunin gam-uhpa[77] Herod in Jesu’ thu a kigenna a za hi;

²tuale ama in a nasemte kungah, “Tam pa, baptize-pa John ahi hi; sina pana ang thokia hi ngel ding hi, tua ziehin na lamdang bawl theina vang nei hi ding hi,” a ci hi.

³Azieh pen Herod in a naupa Philip’ zi[78] Herodias ziehin John man a, khau tawh henin thong sungah a khum hi.

⁴Khum pen John in Herod kungah, “Tua nu na kinunpi kilawm lo hi,” a ci zieh ahi hi.

⁵Herod[79] in ama a tha nop vangin ama in mihonpite a giing hi, azieh pen amate in ama kamsang khatin ngaisun uhi.

⁶Ahi vangin Herod’ suopawi ni a tun ciengin mipite mai-ah Herodias’ tanu a lam ziehin tua nu in Herod lungkimsah a,

⁷tuaci’n ama kiciemin tua nu nget popo pieh dingin kamciem hi.

⁸Tua nu in a nu hil bangin, “Kuongdai khat sungah Baptize-pa John’ lutang tamtahah ei pie in,” a ci hi.

⁹Kumpipa da mama a, ahi vangin a kiciemnasa ahina zieh le a lenglate’ maitang a zatahna ziehin pieh dingin thu a pie hi.

¹⁰Ama in mi sawlin thong sungah John’ lutang a tansah hi.

¹¹A lutang kuong tawh hing kitawi-in tua numeino kipie a, tua nu in a nu a piesawn hi.

¹²A nuazuite pei-in a luong la-in a vui uhi; tua ciengin amate pei-in Jesu kungah a gen uhi.

¹³Jesu in tam thu a zah ciengin gunkuong khatah tuongin tua mun panin gamdaina munah a kihemkhie hi. Ahi vangin mipite in tam thu a zah ciengun khuopite panin keng tawh pei-in a nua a zui uhi.

¹⁴Tuipieu ah a tun ciengin ama in mihon tampi mu hi; tuale ama in amate khuotuo-in a cinate a damsah hi.

¹⁵Khuomiel kuon ciengin ama kungah nuazuite pei-in, “Tam mun pen gamlah ahi a, i vaikai ta uhi; a neh ding uh lei dingin mihonte khuo sungah sawl dawh ta’n,” a ci uhi.

¹⁶Jesu in amate kungah, “A pei ding uh kisam sih; a neh ding uh bang po khat pie lel un,” a ci hi.

¹⁷Amate in, “Anlum nga le nga tawn ni simlo tanah bangma dang nei sih ung,” a ci uhi.

¹⁸Tuale ama in, “Tua teng tanah hing la ta vawi uh,” a ci hi.

¹⁹Tua ciengin ama in mipite lopa tunga to dingin thu a pie hi. Ama in anlum nga le nga tawn ni la-in vantung lam ento-in lungdam ko a, anlumte phalsuo-in nuazuite a pie hi, tuale nuazuite in mipite a piesawn uhi.

²⁰Mi zosie in ne-in a gilva mama uhi; tuale a khawnla teng uh a neng a themin a khawmkia vua, seu sawm le seu ni a dim hi.

²¹An ne mi pen numei le naupang simlo pasal cingteng mi tulnga bang pha hi.

²²Ama in mihonpite a peisah laitahin a nuazuite thakhatin gun kuong tungah tuongsah a, galkhat lamah a peisah masa hi.

²³Mihonpite a peisah zaw ciengin thungen dingin muol tungah ama tangin a peito hi. Khuo a miel ciengin tua tahah ama tangin a om hi.

²⁴Ahi vangin khumi hunin gunkuong pen lei panin gamlapi tung ta a, hui in amate a lemut ziehin tuihuolte in gunkuong a satsat hi.

²⁵Zingmawng phalvah hunin amate lam zuonin tui tungah ama a pei hi.

²⁶Hizongle a nuazuite in tui tunga a pei ama a mu ciengun, “Thadam a khula!” ci-in zausi-in a awng uhi.

²⁷Hinanle Jesu in thakhatin amate hopi a, “Na lungsim hangsah un, keima ka hi bo hi; zau sih un,” a ci hi.

²⁸Peter in, “TOPA aw, tua khu nang na hi ngel leh kei zong na kung zuonin tui tunga kang pei nading thu ei pie in,” a ci hi.

²⁹Ama in, “Hing pei in,” a ci hi. Tuaci’n gunkuong tung panin Peter kumin Jesu lam zuonin tui tungah a pei hi.

³⁰Ahi vangin hui husiepi[80] a mu ciengin zau-in tui sungah tumsuh dihtah a, tua bepin ama in, “TOPA aw, ei hun ven!” ci-in a kiko hi.

³¹Jesu in thakhatin a khut tawh zamin man phei pai a, ama kungah, “Upna neu mipa aw, bang dinga lunghimaw na hei?” a ci hi.

³²Gunkuong tung a kato ciengun tua hui a theu pai hi.

³³Gunkuong sunga om teng in, “Pasien’ Tapa tahtah na hi hi,” ci-in ama a bie uhi.

³⁴Amate a galkai zaw ciengun Gennesaret gamah a tung uhi.

³⁵Khum muna mite in ama a theitel zaw ciengun amate in tua gam mun cintengah thu zasahin cina zosie ama kungah a peipi vua,

³⁶tuale amate in ama’ puontuol tep nangawn a tham thei nadingun ama kungah a thum uhi; a thamkha zosie in damna a nga uhi.