Read Zou MATTHEW 16 Bible Online

MATTHEW 16 - Zou bible

MATTHEW 16

¹Jesu[87] ze-et dingin Pharisee-te le Sadducee-te pei-in van panin amate lim khat a lah nadingin ama kungah a ngen uhi.

²Ama in amate kungah, “Nitah ciengin, ‘Meiisan suoh ahi ziehin khuo ko ding hi,’ na ci uhi.

³Zingmawng ciengin, ‘Meiisan suohin meii a niim ziehin tuni-in huipi lang ding hi,’ na ci uhi. Note in van omzie na gen thei vangun hun lahna limte na theithei sih uhi.

⁴A gilo le angkawm khang mite in lim lamdang ngen uhi, ahi vangin amate tungah Jonah’ lim longal bangma lim kipie lo ding hi,” a ci hi. Tua ciengin amate nuasie-in a peikhie hi.

⁵Nuazuite a galkhatah a tun ciengun an puoh ding a mangngil uhi.

⁶Jesu in amate kungah, “Pharisee-te le Sadducee-te’ tol panin kikem unlen pilvang un,” a ci hi.

⁷Amate khatlekhat, “Anlum i puoh lo zieh hi va,” a kici uhi.

⁸Jesu in tua thu a thei ciengin, “No upna neu mite aw, bang dinga anlum na nei lona thu uh kikum na hi uh ahei?

⁹Na phawh thei nai lai sih uh amah? Mi tul nga in anlum nga a khamval seu bangza na luoh vuoi?

¹⁰Ahi sihle mi tul li in anlum sagi a khamval seu bangza na luoh vuoi?

¹¹Bangci-a an thu ka gen lo lam phawh thei talawm lo na hi uh ahei? Pharisee-te le Sadducee-te’ tol panin na kikem un!” a ci hi.

¹²Tua ciengin anlum kisaw tol gen hi loin Pharisee-te le Sadducee-te’ thuhilna gen ahi zawh lam a phawh pan na bo uhi.

¹³Caesarea Philippi gam sungah Jesu a tun ciengin, ama in a nuazuite kungah, “Mite in Mihing Tapa koi hi, ei ci vuoi?” ci-in a dong hi.

¹⁴Tuale, “Pawlkhat in Baptize-pa John hi, ang ci uhi; pawlkhat in Elijah hi, ang ci uhi; adang pawlkhatte leuleu in Jeremiah ahi sihle kamsang khat popo hi va, ang ci uhi,” a ci uhi.

¹⁵Ama in amate kungah, “Tua ahile note in kei koi hi, nei ci vuoi?” a ci hi.

¹⁶Simon Peter in, “Nang a hing zing Pasien Tapa Messiah[88] na hi hi,” a ci hi.

¹⁷Tuale Jesu in ama kungah, “Jonah’ tapa Simon aw, thupha nga na hi hi! Azieh pen tam thu tahsa le sisan in ang theisah ahi sih a, vantunga a om ka Pa in nangma tunga ang theisah ahi zaw hi.

¹⁸Ke’n kang ci-in, nang Peter[89] na hi a, tami suongpi[90] tungah ka hlattuom pawlpi ka lam ding hi, Misi khuo kotpite in tua hlattuom pawlpi a zo sih ding hi.

¹⁹Vantung gam tawhtangte nang kang pie ding a, leitunga na hen poma vantungah zong kihen ding a, leitunga na sut poma vantungah zong kisut ding hi,” a ci hi.

²⁰Tua ciengin ama[91] Messiah[92] ahi lamtah koima kungah a gen lo nadingun khautahin nuazuite thu a pie hi.

²¹Jerusalem ah Jesu pei-in ama in upate, siempu liente, thukham hil siete khut sungah gimna lienpi thuoh valon ding a, tuale ama kithatin a ni thum ni-in kithosah ding hi, ci thute khum hun a kipanin a nuazuite a theisah hi.

²²Tuale Peter in ama tuom peipi-in phawhsie a, “TOPA, Pasien in tam thu piengsah vawt sih heh! Nang tungah tam thu pieng ngai poma lo ding hi,” a ci hi.

²³Ahi vangin Jesu kihei-in Peter kungah, “Satan, ka nua lamah kihem vawi! Pasien’ nate tungah na lungsim na koi sih a, mihing’ nate tungah na koi zawh ziehin kei adingin kipalpuana na hi hi,” a ci hi.

²⁴Tua ciengin Jesu in a nuazuite kungah, “Mi khatpo ka nuazui a suo nop leh, a deina nuolin a singlamte puo-in ei zui ta heh.

²⁵Azieh pen amau’ hinna a hundam nuomte in a hinna uh tan ding a, keima zieha a hinna a taante in a hinna uh a mu ding uhi.

²⁶Bangzieh ahei cile amate in leitung buppi a nga vangin a hinna uh suplaw uleh bang phattuomna nga ding uh ahei? Ahi sihle a hinna uh bang tawh hleng theikia ding uh ahei?

²⁷“Azieh pen a Pa’ minthanna vang le a vantung mite tawh Mihing Tapa ang pei ding a, tua ciengin ama in a sepna utawh kizui-in mi zosie a thuhkia ding hi.

²⁸A tahtah a kang ci-in, tam sunga a ding mi pawlkhat in a kumpi gam tawh Mihing Tapa ang pei a mu masangun sina a ciemkha sih ding uhi,” a ci hi.