Read Zou MATTHEW 17 Bible Online

MATTHEW 17 - Zou bible

MATTHEW 17

¹Ni guh zaw ciengin Jesu in Peter, James le a nau John-te zawpi-in muol sang tung khatah a katopi hi.

²Tuale amate mai-ah a mel kikhelin a mai ni bangin tang a, a puonsilte zong vam lihleh hi.

³Khum tahah Moses le Elijah thakhatin kilang a, ama tawh a kiho uhi.

⁴Tua ciengin Peter in Jesu kungah, “TOPA aw, tam sunga i op ding uh a hoi hi; nei awi leh keima[93] in tanah tenna ding buh[94] thum, nang ading khat, Moses ading khat, Elijah ading khat kang lampieh ding hi,” a ci hi.

⁵Tua banga thu a gen laitahin meiingo khat in amate tuommang a, tua meii lah panin, “Tam pa ka it mama ka Tapa ahi hi; ama tungah ka lung a kim hi; ama’ thu na ngai un!” ci-in aw khat a ging hi.

⁶Nuazuite in tami awging a zah ciengun zausi-in tuolah a khupbawh uhi.

⁷Ahi vangin Jesu pei-in amate tham a, tho un, zau sih un,” a ci hi.

⁸Amate a khuoda ciengun Jesu longal koima a mu sih uhi.

⁹Muol tung pan a kumsuh laitahun Jesu in amate kungah, “Sina panin Mihing Tapa a thawkia masangsie, na sil mute uh koima kungah gen sih un,” ci-in thu a pie hi.

¹⁰Nuazuite in ama kungah, “Tua ahile bang dinga thukham hil siete in Elijah ang pei masa ding hi, a ci uh ahei?” ci-in a dong uhi.

¹¹Ama in, “Elijah ang pei tahpi-in na zosie a bawlpha ding hi.

¹²Ahi vangin note kunga kang ci-in, Elijah ang pei zo napi amate in a thei lo ziehun ama tungah a dei bangun a na bawl uhi. Tua ma bangin Mihing Tapa in zong amau’ khut sungah gimna a thuoh ding hi,” a ci hi.

¹³Tua ciengin ama in Baptize-pa John’ thu a gen ahi lamtah nuazuite in a theitel pan uhi.

¹⁴Mihonte kungah amate a tun ciengun ama kungah pasal khat pei-in a mai-ah khupdin a,

¹⁵“TOPA aw, ka tapa hing khuotuo in; azieh pen ama bupsi-in a gim mama hi; meikhuh sung le tui sungah a pua zelzel hi.

¹⁶Na nuazuite kungah ka peipi vangin amate in a damsah zo sih uhi,” a ci hi.

¹⁷Jesu in, “No upna nei lo a letat khangmite aw, note tawh bang tanve hing om ding ka hei? Bang tanvei note hing thuohpi ding ka hei? Ka kungah ama hing peipi un,” a ci hi.

¹⁸Jesu in dawi[95] a hosiet ciengin a kung panin ama[96] pusuoh a, thakhatin naupang pa dam pai hi.

¹⁹Tua ciengin Jesu kungah nuazuite pei dapin, “Bang dinga tua dawi ka hawlkhiet zo lo uh ahei?” a ci uhi.

²⁰Ama in amate kungah, “Na upna uh a neu zieh ahi hi. Bangzieh ahei cile a tahtah a kang ci-in, ankam tang[97] cie upna na nei nah uleh tami muolpi kungah, ‘Tam panin khum tahah kikhin in,’ ci locin a kikhin ding hi; note adingin a pieng thei lo bangma a om sih ding hi.

²¹Ahi vangin ama in thungetna le antanna longal tawh tam bang namte kihawlkhie zo lo hi,” a ci hi.[98]

²²Galilee gamah a kikhop[99] laitahun Jesu in amate kungah, “Mihingte khut sungah Mihing Tapa kileheh ding a,

²³amate in ama thatin ni thum ni-in a thokia ding hi,” a ci hi. Tuale amate a da mama uhi.

²⁴Capernaum khuo ah amate a tun ciengun Peter kungah biehinnpi’ sieh[100] dongte pei-in, “Na siepa un biehinn sieh[101] a khie sih amah?” a ci uhi.

²⁵Ama in, “Ingheh, pie ma,” a ci hi. Innah ama a pei ciengin Jesu in na hopi masa a, “Simon aw, nang in bang na ci ngaisut ei? Leitung kumpite in koite tung panin sieh le kaih a dong vuoi? A tate tung pan ahi sihle midangte tung pan a dong vuoi?” ci-in a dong hi.

²⁶Peter[102] in, “Midangte tung pan,” a ci leh Jesu in ama kungah, “Tua ahile tate a peng ahi hi.

²⁷Hizongle amate i lungkhamsuo lo nadingin tuilipi-ah va pei ta’nlen tenng va khai ta’n; ang awh masa pen manin a kam phen lacin dangka[103] peh khat na mu ding hi; tua khu la inlen nangma ading le kei adingin amate tungah pie in,” a ci hi.