Read Zou MATTHEW 18 Bible Online

MATTHEW 18 - Zou bible

MATTHEW 18

¹Tua hun laitahin Jesu kungah nuazuite pei-in, “Vantung gamah koi lien pen ahei?” ci-in dong uhi.

²Ama in naupang khat hlanin amahaw lahah omsah a,

³“A tahtah a kang ci-in, na kikhel vua naupangte tawh na kibah sih uleh vantung gam sungah na lut ngai sih ding uhi.

⁴Tami naupangno banga a kiniemkhieh poma vantung gam sungah a lien pen hi pai hi.

⁵Ka min tawh tam bang naupangno khat a limbawl poma kei ei limbawl ahi hi.

⁶“Note lahah mi khatpo in keima ei um tami naupangnote khatpo a puasah leh, a ngawng kimvelah an gawina suong golpi khat khi-in tuili thuhpi sungah tummang dawh leh ama adingin hoizaw ding hi.

⁷Pua nading thute ziehin leitung mite a hamsie ahi uhi! Pua nading hunte ang tung valon ding a, ahi vangin puana a piengsah pa pen mi hamsie ahi hi!

⁸“Na khut ahi sihle na keng in ang puasah leh tansan inlen paimang in; khut kim keng kima tawntung meili sunga ang kipaih sangin khut sam keng samin hinna sunga na lut ding nang adingin hoizaw hi.

⁹Tuale na mit in ang puasah leh khei dawh inlen paimang in; mittang kimin hell[104] meili sunga ang kipaih sangin mit langkhat beh tawh hinna sunga na lut ding nang adingin hoizaw hi.

¹⁰“Tami naupangnote khatpo na simmaw khah lo nadingun kidawm un; azieh pen ke’n kang ci-in, vantunga om amau’ vantung mite in vantunga ka Pa’ maitang a mu zing uhi.

¹¹[105] Azieh pen a mangthaite hundam dinga Mihing Tapa ang pei ahi hi.

¹²Bang na ci ngaisut vuoi? Tuucingpa khat in tuu zakhat nei hinlen tuate lahah khat gammang leh, sawmkuo le kuote muol tungah nuasie-in tua a gammang tuu sui dingin a pei sih ding amah?

¹³A tahtah a kang ci-in, a mukia ciengin a gammang lo tuu sawmkuo le kuote sangin tua tuu khat ziehin a lungdamzaw hi.

¹⁴Tuaci’n tami naupangnote lahah khat zong a manthai ding pen vantunga om na[106] Pa uh’ deina ahi sih hi.

¹⁵“Pawlpi[107] midang khat na tunga ang maw leh,[108] pei inlen noma gel beh na om uh ciengin na khielna uh kigen un. Na thu ang man leh, tua mipa[109] a ngakia na hi hi.

¹⁶Ahi vangin na thu ang man nop sih leh teci ni ahiei thum ahiei a op ciengin thu zosie thukip suoh ahi ziehin mi khat ahiei ni ahiei zawpi in.

¹⁷Tua pa in amate thu a man nop sih leh pawlpi tungah ko in; tuale pawlpi thu nangawn a man nop lailai sih leh Gentile mi le siehdong bangin na ngaisun un.

¹⁸Ken a mantaha kang ci-in, leitunga na hen zosie vantungah kihen ding a, leitunga na sut zosie vantungah kisut ding hi.

¹⁹Khatvei kang cikia-in, leitungah note ni kilungtuoh a na nget popo uh vantunga om ka Pa in ang pie ding hi.

²⁰Azieh pen mi ni ahi a, thum ahi zongin keima’ min suonga a kikhop uleh amate lahah keima ka om hi.

²¹Tua ciengin Peter pei-in ama kungah, “TOPA aw, pawlpi midang khat[110] ka tunga ang maw leh, bangza vei cieng ka maisah diei? Sagi vei dong cieng ka maisah diei mah?” a ci hi.

²²Jesu in ama kungah, “Sagi vei cieng beh hi lo, sawm sagi mun sagi vei[111] cieng dong maisah in kang ci hi.

²³Tami thu ziehin vantung gam pen a silate’ sum sazien a en nuom kumpipa tawh kibang hi.

²⁴Sazien sit a kipat ciengin a sum talent[112] tul sawm a ba mipa khat ama kungah kipeipi hi.

²⁵Ama in a leiba pie zo lo ahi ziehin ama-a kipan a zi a tate le a neisa zosie zua-in leiba a lo nadingin a pupa in thu a pie hi.

²⁶Tuaci’n a mai-ah a silapa khupdinin, ‘Ei thuoh kenkon lai in, a unpi-in kang sang na ding hi,’ a ci hi.

²⁷Tua silapa’ pupa in ama khuotuo ahi ziehin a leiba teng maisahin hlakhie hi.

²⁸Tua silapa a peikhiet ciengin ama tunga denari zakhat[113] a ba a silapite khat tawh kituoh a, tuale ama in tua pa a lawl ah manin, ‘Na leiba ei lo in,’ a ci hi.

²⁹Tua ciengin a silapi pa zong a mai-ah bawhin thum a, ‘Ei thuoh kenkon lai in, kang lo na ding hi,’ a ci hi.

³⁰Ahi vangin ama in niel hi; tua ciengin ama pei-in a leiba a lo zawh masangsie tua pa thong sungah a khum hi.

³¹A silapite in tam thupieng a mu ciengun a cizalia vua, tuale amate pei-in a pupa kungah thupieng zosie a ko uhi.

³²Tua bepin a pupa in ama hlanin a kungah, ‘A gilo silapa! Kei kungah nang thum zieha na leiba zosie kang maisah ahi hi.

³³Ken kang hepi ma bangin nang in zong na silapipa na hepi ding kilawm hi lo amah?’ a ci hi.

³⁴Tuale a pupa zong lungthah a, a leiba zosie a lo zawh masangsie-in gawtna thuoh dingin ama a ap hi.

³⁵Tuaci’n note in zong na lungsim sung vuah na sanggampa ahi sihle na sanggamnu’[114] mawna na maisah sih uleh, vantunga om ka Pa in tua ma bangin note tungah ang bawl ding hi,” a ci hi.