Read Zou MATTHEW 20 Bible Online

MATTHEW 20 - Zou bible

MATTHEW 20

¹“Bangzieh ahei cile vantung gam pen lengga lei-a nasem dingte ciel dinga zing tunga a kuonkhie lo nei pa tawh kibang hi.

²Nasemte tawh a ngaina banga nitha[118] pieh dingin a kithukim zaw ciengun a lengga lei-ah amate a kuonsah hi.

³Nai kuo pawlin a pei leh sumbuh lahah bangma sem lo-a a mawh din midangte a mu hi.

⁴Amate kungah, ‘No zong pei unlen lengga lei-ah va kuon ta un, a kilawmza khat kang pie ding hi,’ a ci hi. Tuaci’n amate zong a kuon uhi.

⁵Sunkim pawl le nai thum pawlin pei leuleu a, tua ma bangin a bawl hi.

⁶Tuale nai nga pawl ciengin a pusuoh leh a kimvela a ding midangte mu-in amate kungah, ‘Bang dingin sunthapai-in tam sungah bangma sem lo pi-in mawh din na hi uh ahei?’ a ci hi.

⁷Amate in a kungah, ‘Koima’n ei ciel lo zieh ahi hi,’ a ci uhi. Tuale amate kungah, ‘No zong lengga lei-ah va kuon ta un,’ a ci hi.

⁸Nitah ciengin lengga lei nei pa in nasem uhpa kungah, ‘Nasemte hlan inlen a kuon nukhia pen panin a kuon masa pen dongin a thaman uh hawmpieh in,’ a ci hi.

⁹Nai nga pawla kicielte a pei ciengun a nitha[119] ngaina za ciet a nga uhi.

¹⁰A kuon masate a pei ciengin a tam san deu dinga a kingaisut vangun a nitha[120] ngaina za ciet ma a sang uhi.

¹¹Tuale sum a san ciengun lo nei pa tungah a phun vua,

¹²‘Tami a nukhiate in nai khat sung beh na sem napi, sunthapai nisa thuoha nasem kote tawh nei kibangsah hi,’ a ci uhi.

¹³Ahi vangin amate khat kungah, ‘Lawm aw, na tungah bangma khielna ka bawl sih hi; nitha[121] ngaina ma thalaw dinga kithukimsa hi lo i mah?

¹⁴Nangma-a’ kilah inlen pei in; nangma kang piehza ma, tami a kiciel nukhiate ka pie nuom hi.

¹⁵Ka neisate ka dei bangin bawl thei lo ding ka mah? Ahi sihle ka lungsim hoi zieha thangsie na mah?’ a ci hi.

¹⁶Tuaci’n a nukhiate masa ding a, a masate nukhia ding hi,” a ci hi.

¹⁷Jerusalem ah Jesu a peito laitahin lampi-ah nuazui sawm le nite tuom zawpi a, amate kungah,

¹⁸“En un, Jerusalem ah peito-in siempu makaite le thukham hil siete tungah Mihing Tapa ki-ap ding a, tuale amate in ama mawsietin sina a thuohsah ding uhi:

¹⁹tua ciengin zako ding, sat ding le singlamte tunga khailia dingin Gentile-te tungah a ap ding uhi; tuale a ni thum ni-in ama kithosah ding hi,” a ci hi.

²⁰Tua ciengin Zebedee tapate’ nu, a tapate tawh ama kungah pei-in a mai-ah khupdinin a angvan nadingin a ngen hi.

²¹Tuale ama in tua nu kungah, “Bang dei na hei? a ci hi. Tua nu in ama kungah, “Na gam sungah tami ka tapa tegel khat na zietlamah, khat na veilamah a to nadingin thu pie in,” a ci hi.

²²Ahi vangin Jesu in, “Na nget uh na theisiem sih uhi. Ka dawn ding hai na dawn zo ngel ding vuoi mah?” ci-in a dawh ciengin ama kungah, “Dawn zo na va ung,” a ci uhi.

²³Tuale amate kungah, “Note in keima’ hai na dawn tahpi ding vua, ahi vangin ka zietlam le ka veilam a to ding pen kei ang pieh thei ahi sih hi, tua pen ka Pa in a bawlpiehsate ading hizaw hi,” a ci hi.

²⁴Sawmte in tam thu a zah ciengun sanggam ni tegel tungah a lungthah uhi.

²⁵Ahi vangin Jesu in amate hlan a, “Gam-uh Gentile-te in amate tungah a kiliensah vua, a uliente un zong thuneina tawh amate a uh lam na thei uhi.

²⁶Note lahah tua bang hi lo ding hi; note lahah milien a suoh nuom poma in note’ nasem hi ding a,

²⁷note lahah a masa pen ahi nuom poma note’ sila hi ding hi;

²⁸Mihing Tapa pen midangte na semsah dinga ang pei ahi sih a, midangte’ na a sem ding le mi tampi tatkhiet nadingin a hinna pie dinga ang pei hizaw hi,” a ci hi.

²⁹Amate in Jericho a nuasie ciengun mi tampi in a nua a zui uhi.

³⁰Lampi gei-ah a to mittaw ni in tua lampi nawhin Jesu ang pei hi, ci thu a zah ciengun, “David’ Tapa, TOPA[122] aw, kote ei hepi in!” ci-in a kiko uhi.

³¹Mihonpi in a sip nadingun nahpi tahin a kham uhi; hizongle ama gel in, “David’ Tapa, TOPA aw, kote ei hepi in! ci-in a kiko semsem uhi.

³²Jesu khawlin ama gel hlan a, “Bang hing bawlpieh leng na dei vuoi?” a ci hi.

³³Ama gel in ama kungah, “TOPA aw, ka mit uh khuo ei musah in,” a ci uhi.

³⁴Jesu in ama gel a khuotuo a, a mit uh a thampieh leh thakhatin khuo mu theikia-in a nua a zui pai uhi.