Read Zou MATTHEW 21 Bible Online

MATTHEW 21 - Zou bible

MATTHEW 21

¹Jerusalem khuonai, Olive muol tunga a om Bethphage khuo a tun uh ciengin Jesu in a nuazui ni sawl a,

²ama gel kungah, “Na mai vua khuo ah va pei ta unlen, a no tawh khau kikhisa laapi khat thakhatin na mu ding uhi; hing sut unlen ka kungah hing kai un.

³Mi khatpo in bang khatpo ang gen leh, ‘TOPA in tulmaw hi,’ ci zieu locin ama in ang kaisah pailien ding hi,” a ci hi.[123]

⁴Tam thu pen kamsangpa’ thugenna a tangtun nadinga pieng ahi a,

⁵“En in, Zion tanu aw, na kumpipa kiniemkhiehna tawh laapi’ ta laano tungah tuongin na kung vuah ang pei ding hi,” a ci hi.

⁶Nuazui tegel zong Jesu’ hil bangin a gamta uhi.

⁷Ama gel in laapi le a no kai-in a tungah puonte a pha vua, tuate tungah ama a tuong hi.

⁸Mihon tampite[124] in lampi-ah a puonte uh a pha vua, adangte in singbate satin lampi-ah a pha uhi.

⁹A mai-a pei mihonte le a nua lama pei mihonte in, David’ Tapa tungah Hosanna! TOPA’ min tawh ang pei pa in thupha nga taheh! Van a sangna munah hosanna!” ci-in a kiko uhi.

¹⁰Jerusalem ah ama a lut ciengin a khuozangun a buoi gawp vua, “Tam pa koi ahei,” ci-in a dong uhi.

¹¹Mipite in, “Galilee gam Nazareth khuo pana kamsang Jesu ahi hi,” a ci uhi.

¹²Tua ciengin biehinnpi[125] sungah Jesu lutin biehinnpi sunga vanzua le vanlei mi zosie notmang a, sumkhelte’ tona sabuoite le vakhu zuate’ tonate zong a khulepieh gawp hi.

¹³Ama in a kung vuah, ‘Ka inn in thungetna inn kici ding hi,’ ci-in kigiel hi; hizongle note in misuomte’ kibuhna kuo na suo ta uhi,” a ci hi.

¹⁴Biehinnpi sunga ama kungah mittawte le khelbaite a pei vua, tuale ama in amate a damsah hi.

¹⁵Ahi vangin siempu liente le thukham hil siete in a na lamdang bawlte mu-in, naupangte in biehinnpi sungah, “David’ Tapa tungah Hosanna,” ci-in a kikona a zah[126] uh ciengin a lung uh thah a,

¹⁶ama kungah, “Tamte in bang thu gen ci na za ei mah?” a ci uhi. Jesu in amate kungah, “Za ma ing; note in, ‘Naungehte le nawitep nausente’ kam panin nangma ang phatna dingun na bawlpieh zo ta hi,’ ci-a kigiel khu na sim ngai sih uh amah?” a ci hi.

¹⁷Amate nuasie-in tua khuopi panin Bethany khuo ah ama pei a, tuanah a gieh hi.

¹⁸Zingmawngin khuopi lamah a kilekia ciengin ama a gil a kiel hi.

¹⁹Lam gei-ah theikung khat a mu ziehin a va pei taleh a nate simlo bangma a mu sih hi. Tua ciengin ama in tua theikung kungah, “Ga ngai nawn poma sin!” a ci leh tua theikung thakhatin a gawta pai hi.

²⁰Nuazuite in tua khu a mu uh ciengin lamdang a sa vua, “Bangci banga theikung tuaci gawta pailien adiei?” a ci uhi.

²¹Jesu in amate kungah, “Ke’n a tahtah a kang ci-in, note in um la loin upna na nei po uleh, tam theikung tunga kibawlte na bawl thei khop sih ding vua, tami muolte tung nangawn ah, ‘Kikhin inlen tuipi lilai sena’n kinei in,’ ci locin zong na ci bangun a pieng ding hi.

²²Note in upna tawh na nget popo uh na nga ding uhi,” a ci hi.

²³Biehinnpi sungah ama lutin thu a hil laitahin, ama kungah siempu liente le upate pei-in, “Bang thuneina tawh tamte na bawl a, tam thuneina koi ang pieh ahei?” a ci uhi.

²⁴Jesu in amate kungah, “Ke’n zong khat kang dong ding hi; note in nei dawn thei uleh ke’n zong bang thuneina tawh tam nate ka bawl ahei, ci thu kang gen ding hi.

²⁵John’ baptize-na pen vantung pana ang pei amah, ahi sihle mihing tung pana ang kipan ahei?”ci-in a dong hi. Amate zong khatlekhat a kisel vua, “Vantung pan hi,’ ci lei lah, ‘Tua ahile bang dinga ama na muon lo uh ahei?’ ei ci ding hi.

²⁶Ahi vangin, ‘Mihing kung pan hi,’ ci zel lei lah mi zosie in John pen kamsang khata a ngaisut uh ahi ziehin mipite i giing vanuh uhi,” a kici uhi.

²⁷Tuaci’n amate in Jesu kungah, “Ka thei sih uhi,” a ci uhi. Tuale ama in a kung vuah, “Ke’n zong tamte bang thuneina tawh ka bawl ahei ci kang gen tuon sih ding hi,” a ci hi.

²⁸“Note in bang na ci ngaisut vuoi? Mi khat in tapa ni nei hi; a tazaw pa kungah pei a, ‘Ka ta aw, tuni-in lengga lei-ah kuonin na va sem ta’n,’ a ci hi.

²⁹Ama in, ‘Kuon sih vang,’ ci napi a lungsim kikhelin a kuon hi.

³⁰A nauzaw pa kungah a pa[127] pei-in tua ma bangin a va ci ta leh ama in, ‘Pa aw, va kuon ta vang,’ ci napi a kuon sih hi.

³¹Tua nite koi zaw a pa’ deina bangin gamta ahei?” a ci hi. Amate in, “A tazaw pa in,” a ci uhi. Jesu in amate kungah, “Ke’n a tahtah a kang ci-in, Pasien’ manggam sungah note sangin siehdongte le numei pahtatte a lut masazaw ding uhi.

³²Azieh pen note kungah dihna lampi tawh John ang pei napi ama na um sih vua, ahi vangin siehdongte le numei pahtatte in ama a um uhi; tua na mu zaw cieng nangawnun na lungsim uh na khel sih vua, zong na um sih uhi.

³³“Thugentena dang khat na ngai un. Lengga lei a bawl lo neipa khat om a, ama in a kimvelah dai kai-in a sungah lengga cil nading dum to-in tausang khat daw hi. Tua ciengin losapte kawmsahin gam dangah a zin hi.

³⁴Anlah hun a tun ciengin ama nga ding za teng khon dingin losapte kungah a silate a sawl hi.

³⁵Ahi vangin losapte in a silate na manin khat na sat gawp vua, khat na thatin, khat suong tawh na seplia uhi.

³⁶Ama in a sawl masahte sanga a tamzaw sila dangte sawl leuleu a, amate in a masate ma bangin na bawl veve uhi.

³⁷A tawpna ah, ‘Ka tapa na zatah buong sam va uh,’ ci-in amate kungah a tapa a sawl hi.

³⁸Ahi vangin losapte in a tapa a mu ciengun, ‘Tam pa gamhluo ding pa ahi hi; hing pei un, ama that vai-in a gamh luo ding teng la vai,’ a kici uhi.

³⁹Tuaci’n ama manin lengga lei panin notmangin that uhi.

⁴⁰Lengga lei nei pa a pei ciengin tua losapte bang a law ta diei?” a ci hi.

⁴¹Amate in ama kungah, “Ama in tua migilote si genthei-in sisah ding a, anlah hun cienga ama’ nga ding za a pie ding midang losapte tungah a lengga lei a kawmsah ding hi,” a ci hi.

⁴²Jesu in amate kungah, “Lai Siengtho sungah: ‘Innlamte in a nilmang suong khu innkiu suongpi[128] a suoh ta hi; tam pen ahileh TOPA’ bawl ahi a, eite’ mit mu-in lamdang hi,’ a kici na sim ngai sih uh amah?

⁴³Tua ahi ziehin ke’n kang ci-in, note kung panin Pasien’ manggam kiladawh ding a, a manggam gate[129] a gasah thei minam tungah kipie ding hi.

⁴⁴Tami suong tunga a kie poma guoicim ding a, a tungah tami suong kie-in a denkhah popo a tepaal ding hi,” a ci hi.[130]

⁴⁵Siempu liente le Pharisee-te in a thugentena a zah ciengun amate a genna ahi lam a thei uhi.

⁴⁶Amate in ama mat a sawm vua, ahi vangin mipite in ama kamsang khata a ngaisut ziehun mipite a giing zel uhi.