Read Zou MATTHEW 22 Bible Online

MATTHEW 22 - Zou bible

MATTHEW 22

¹Jesu in thugentena tawh amate tungah thu genkia a:

²“Vantung gam pen a tapa dinga mopawi bawl kumpipa tawh kigente thei hi.

³Ama in mopawi ankuong im dinga a kicielsate hlan dingin a silate a sawl vangin amate a pei sih uhi.

⁴Ama in sila dangte sawl leuleu a, ‘A kicielsate kungah tam bangin gen un: En un, ka nitah an min zo hi, ka bawngtangte le ka bawng thau tuituohte kigo zo a, na vannuoi a baisa-in om zo ta hi; mopawi an ne dingin hing pei ta un,’ ci-in a gensah hi.

⁵Ahi vangin amate in thudon loin pawlkhat in lo kuonsanin, adang pawlkhat in a nasepna vuah a peisan vua,

⁶a omlai teng in ama’ silate manin bawlsie-in na that uhi.

⁷Kumpipa zong lungthahin a galkapte sawl a, tua mithatte susie-in a khuopite uh a haltum hi.

⁸Tua ciengin ama in a silate kungah, ‘Mopawi a baisa-in om a, a kicielte an ne dingin a kilawm nawn sih uhi.

⁹Tua ahi ziehin lamlienpi ah pei unlen mopawi an ne dingin na mu popo va ciel ta un,’ a ci hi.

¹⁰Silate zong lampite ah pei-in a mu zosie uh, hoi tale hoi tasih le a kaikhawm uhi; tuaci’n mopawi bawlna inn sungah pawisim mi a dim hi.

¹¹“Ahi vangin mopawi simte van dingin kumpipa a lut ciengin khum tahah mopuon sil lo pasal khat mu kha a,

¹²ama kungah, ‘Lawm aw, mopuon sil lopi-in tam sungah ang bangci lut na hei?’ a ci leh ama pa in a gen ding a thei ta sih hi.

¹³Tua ciengin kumpipa in a nasemte kungah, ‘A khut a keng hen unlen, kaana le hagawina mun ahi pulam khuomiel lahah paimang ta un,’ a ci hi.

¹⁴Azieh pen mi tampi a kihlat vangin mi tawmkhat beh kiteel hi,” a ci hi.

¹⁵Tua ciengin Pharisee-te pei-in a thugenna tawh ama a mawmat thei nadingun thang a sie sawm uhi.

¹⁶Tuaci’n amate in ama kungah nuazuite le Herod mite a sawl vua, “Sie aw, nang na thutah a, thuman bangin koima zatah nei loin Pasien’ lampi na hil lam ka thei uhi; azieh pen nang in mi mai-et tuom na nei sih hi.

¹⁷Tua ahile kumpipa tunga sieh pieh ding kilawm amah, kilawm lo ahei, ci thu na ngaisutna ei gen in,” a ci uhi.

¹⁸Ahi mawh vangin Jesu in a lungsim gitlona uh thei ahi ziehin, “No mihoi kipangte aw, bang dinga nei ze-et uh ahei?

¹⁹Sieh dinga kipie sumtang ei lah vawi uh,” a ci hi. Tuale amate in a kungah denarius khat a peipi uhi.

²⁰Tua ciengin amate kungah, “Tami koi’ lim le koi’ min ahiei,” a ci hi.

²¹Amate in kumpipa’ lim le min ahi hi,” ci-in a dawng uhi. Tuale amate kungah, “Kumpipa’ nate kumpipa tungah na pie unlen, Pasien’ nate Pasien tungah na pie un,” a ci hi.

²²Tami thu a zah ciengun amate in lamdang a sa vua, ama nuasie-in a peisan uhi.

²³Khum ni ma-in ama kungah thawkiana om lo hi, a ci Sadducee-te pei-in thudawhna khat a dong vua,

²⁴“Siepa aw, Moses in, ‘Mi khat ta nei loin a si leh, a sanggampa in tua meigongnu kinunpi-in a sanggam pa adingin ta hinpieh ding hi,’ ci hi.

²⁵Tu-in ko lahah sanggam pasal sagi om hi; a ta pen pa in zi nei napi ta nei loin si a, a zi pen a sanggampa in a ensah hi.

²⁶Tua ma bangin a ni na, a thumna-a kipanin a sagina dongin ta nei loin a si uhi.

²⁷A tawpna ah tua numei zong a si hi.

²⁸Tua ahile amate in a unpi-un tua nu kinunpi kim uh ahi ziehin thawkia hun ciengin a koi pen’ zi ahi ta diei?” a ci uhi.

²⁹Jesus in amate dawng a, “Note in Lai Siengtho thu ahi a, Pasien’ vanglietna ahi zongin thei lo na hi ziehun na ngaisun khiel uhi.

³⁰Azieh pen thawkia hun ciengin vantung mite ma bangin kipi kitenna om lo ding hi.

³¹Tuale misite thawkiana tawh kisai-in note kunga a gen thute na sim ngai sih uh amah?

³²‘Keima in Abraham’ Pasien, Isaac’ Pasien, le Jacob’ Pasien ka hi hi,’ a ci hi. Ama a site’ Pasien ahi sih a, a hingte’ Pasien hi zaw hi,” a ci hi.

³³Mipite in tami thu a zah ciengun ama’ thuhilna ziehin lamdang a sa uhi.

³⁴Ama in Sadducee-te gen ding thei loin a sipsah lam Pharisee-te in a zah ciengun a kikaikhawm vua,

³⁵amate lah panin thukhamsie khat in ama a ze-etna-in thu khat a dong hi.

³⁶Siepa aw, thukham sungah bang thupieh lienpen ahei?” a ci hi.

³⁷“Ama in tua pa kungah, ‘Na TOPA Pasien na lungtang zosie, na hinna zosie, le na lungsim zosie tawh na it ding hi,’ a ci hi.

³⁸Tami pen a masapen le a lienpen thupieh a hi hi.

³⁹A nina zong a masa tawh kibang hi: ‘Nangma na ki-it bangin na vengte na it ding hi,’ ci ahi hi.

⁴⁰Thukham zosie le kamsangte’ thuhil zosie tami thupieh nite tunga kikhai ahi hi,” a ci hi.

⁴¹Pharisee-te a kikhop laitahun Jesu in amate kungah tami thu dong hi:

⁴²Messiah[131] bang na ci ngaisut vuoi? Ama koi’ tapa ahiei?” a ci hi. Amate in a kungah, “David’ tapa ahi hi,” a ci uhi.

⁴³Ama in a kung vuah, “Tua ahile bangci bangin David in Hlagau sawlna[132] tawh thugenin ama TOPA ci-in,

⁴⁴‘TOPA in keima’ TOPA tungah thu gen a: “Na galte na keng nei-ah ka koi masangsie-in ka zietlamah na to in,” ci hi,’ ci thei ding ahei?

⁴⁵Tua bangin David in ama pen TOPA ci ahile bangci bangin ama a tapa hi thei ding ahei?” a ci hi.

⁴⁶Koima in dawng thei lo a, khum ni-a kipanin koima in ama bangma a dong ngam nawn sih uhi.