Read Zou MATTHEW 26 Bible Online

MATTHEW 26 - Zou bible

MATTHEW 26

¹Jesu in tami thu teng zosie a gen zaw ciengin a nuazuite kungah,

²“Tuzaw ni ni ciengin Peisan Pawi ang tung ding a, singlamte tungah khailia dingin Mihing Tapa kipie ding hi, ci na thei uhi,” a ci hi.

³Tua ciengin Caiaphas a kici siempu lienpen pa’ innpi ah siempu lien pa le mipi upate a kikhawm vua,

⁴tuale amate in Jesu guh matin tha ding a kikum uhi.

⁵Ahi vangin amate in, “Mipite lahah buoina ang om kha thei ding ahi ziehin pawi sungin bawl sih vai,” a kici uhi.

⁶Bethany khuo-a miphah[155] Simon inn ah Jesu a op laitahin

⁷a manpha mama alabaster sathau namtui thawl khat tawi-in numei khat ama kungah pei a, sabuoi tungah a to laitahin tua sathau namtui a lu tungah a sungsuh hi.

⁸Ahi vangin nuazuite in a mu ciengun a lung uh thah a, “Bang dinga tam sathau a hici mawh zah adiei?

⁹Azieh pen tami sathau kizua leh sum tampi tah kikhawng ding a, tua sum teng mizawngte hawmpieh zaw velei” a ci uhi.

¹⁰Ahi vangin Jesu in tami thu thei ahi ziehin amate kungah, “Bang dinga tami numei nu na suhbuoi uh ahei? Ama nu in kei tungah sil hoi khat sem zo hi.

¹¹Azieh pen note tawh mizawngte ang om zing ding ahi a, ahi vangin note tawh kei kang om zing sih ding hi.

¹²Ka pum tunga tami sathau ei buohna pen ka kivui cienga a bawldan ding a mazil ahi hi.

¹³A tahtah a kang ci-in, leitung buppi-ah tami lungdamna thu a kigenna muncin tengah tami nu phawna-in a silbawlte kigengen ding hi,” a ci hi.

¹⁴Tua ciengin siempu liente kungah sawm le nite lahah khat ahi Judah Iscariot a kici mipa pei a,

¹⁵“Ke’n ama hing lebawlin no kungah hing pie leng bang nei pie ding vuoi?” a ci hi. Amate in dangka sawmthum ama a pie uhi.

¹⁶Khum hun a kipanin ama a lebawl thei nadingin hun lemtang sui a kipan pai hi.

¹⁷Tolsawlo Anlum Pawi ni masa pen ni-in Jesu kungah nuazuite a pei vua, “Peisan Pawi ankuong lui nading hei sungah nang bawlpieh uleng na nuom ei?” a ci uhi.

¹⁸Ama in, “Khuopi sunga mi khat kungah pei unlen ama kungah, ‘Siepa in ka hun hing nai ta, na inn ah ka nuazuite tawh Peisan Pawi kang bawl ding hi, ci hi,’ va ci ta un,” a ci hi.

¹⁹Tuaci’n Jesu’ gen bangin nuazuite a gamta vua, Peisan Pawi an ding a siem uhi.

²⁰Nitah ciengin ama in sawm le nite[156] tawh ankuong a imton hi;

²¹tuale an a neh laitahun ama in, “A tahtah a kang ci-in, note lahah khat in kei ei leheh ding hi,” a ci hi.

²²Tuale amate a da mama vua, ama kungah a banbanin, “TOPA, kei hi sam sih vang izaw?” a ci ciet uhi.

²³Ama in, “Keima tawh kuong sunga a khut tawh a sawhpa in ei leheh ding hi.

²⁴Ama tungtang thu a kigielsa ma bangin Mihing Tapa pen a pei ding ma hi a, hizongle Mihing Tapa a leheh pa in gimna a thuoh ding hi! Tua mipa ang pieng vet lo hi leh ama adingin hoizaw ding hi,” a ci hi.

²⁵Ama a leheh Judah in, “Siepa kei ka hi amah?”[157] a ci hi. Ama in, “Na ci bang ahi hi,” ci-in a dawng hi.

²⁶Amate in an a neh laitahun Jesu in khomun lum khat la-in phalsuo-in lungdam a ko zaw ciengin nuazuite pie a, “La unlen ne un; tam pen ka pumpi ahi hi,” a ci hi.

²⁷Tua ciengin ama in hai zong la-in lungdam a ko zaw ciengin amate pie a, “Na unpi-un dawn un;

²⁸azieh pen tami in mi tampi’ mawna a kimaisah nadinga a kibuokhie thuciemna[158] tawh kisai ka sisan ahi hi.

²⁹Ke’n kang ci-in, ka Pa’ gam sungah note tawh lenggazu tha ka dawn masangin tam lenggazu ka dawn ngai nawn sih ding hi,” a ci hi.

³⁰Amate in phatna la a sah zaw uh ciengin Olive Muol tungah a pei uhi.

³¹Tua ciengin Jesu in amate kungah, “Note in tu zanin keima ziehin na unpi-un nei taisan ding uhi. Azieh pen, ‘Tuucingpa ka satlia ding a, tuuhonte a kithethang ding hi,’ ci-in kigiel hi.

³²Ahi vangin ei kithawsah zaw ciengin no masangah Galilee gam ka na pei ding hi,” a ci hi.

³³Peter in ama kungah, “Nangma ziehin mi zosie taimang sieng nanle ke’n nang kang taisan ngai vawt sih ding hi,” a ci hi.

³⁴Jesu in ama kungah, “A tahtah a kang ci-in, tu zan mama aah a khuon masangin thumvei tah nei niel ding hi,” a ci hi.

³⁵Peter in ama kungah, “Nangma tawh siton nading hinanle nang kang niel sih ding hi,” a ci hi. Nuazui zosiete in zong tua ma bangin a ci uhi.

³⁶Tua ciengin Jesu a nuazuite tawh Gethsemane a kici munah a pei hi; tuale ama in a nuazuite kungah, “Khunah pei-in thu ka nget kalin tanah na to un,” a ci hi.

³⁷Ama in Peter le Zebedee’ tapa ni zawpi a, da le lungkham hun ding a kipan hi.

³⁸Tua ciengin ama in a kung vuah, “Si nading za dong nangawnin ka lung a kham hi; tanah na om unlen ei na ngah un,” a ci hi.

³⁹Tuale bakhat pei lai-in tuolah kiphengpha a, “Ka Pa aw, a pien thei ding leh tami hai tawh ei kipelsah ta’n; ahi vangin kei deina bang hi sih hinlen nangma’ deina bang hizaw heh,” a ci hi.

⁴⁰Tua ciengin a nuazuite kungah a pei leh amate kimu-a om a mu hi; tuale ama in Peter kungah, “Nai khat sung nangawn ei ngah zo lo na hi uh amah?

⁴¹Gimna[159] hun sungah na lut lo nadingun ngahin thungen un; lungsim a lawp vangin tahsa thanem hi,” a ci hi.

⁴²A niveina va peikia-in thu ngen a, “Ka Pa aw, tami hai kei dawn lo-a phamaw ahi vawt leh lah nangma’ deina bang hi taheh,” a ci hi.

⁴³Ama khatvei a peikia leh a mit uh hah zo nawn lo ahi ziehin amate a kimusa ma-in a mu leuleu hi.

⁴⁴Tuaci’n amate nuasie kia-in a nget ngai teng ma a thumveina a ngen hi.

⁴⁵Tua ciengin nuazuite kungah ama pei-in a kung vuah, “Kimu-in a khawl hit hiet lai na hi uh amah? En un, Mihing Tapa kilehehin mawnei mite’ khut sungah a kipieh ding hun ang nai ta hi.

⁴⁶Tho un, pei vai. En un, kei ei leheh ding pa ang nai ta hi,” a ci hi.

⁴⁷Ama in thu a gen kim laitahin sawm le nite sung panin Judas a tung hi; siempu liente le mipi upate’ sawl ahi namsau le phohbul a tawi mihonpi tawh ama zawhton hi.

⁴⁸Tuale a leheh pa in amate kungah lim khat pie a, “Kang nap ding pa khu tua pa ahi hi; ama man pai un,” a ci hi.

⁴⁹Thakhatin Jesu kungah pei a, “Na dam ei, Siepa!” ci-in ama a nam hi.

⁵⁰Jesu in ama kungah, “Lawm aw, tana na sep ding teng sem meng in,” a ci hi. Tua ciengin amate pei-in Jesu tungah a khut utawh tu-in a man uhi.

⁵¹Jesu tawh a omton mite lahah khat in thakhatin a khut tawh a namsau zamin dawh a, siempu lien pa’ silapa a sat leh a bil a bansan hi.

⁵²Tua ciengin Jesu in ama kungah, “Na namsau a pai-ah sietkia in; azieh pen namsau tawite namsau ma tawh si ding hi.

⁵³Ka pa kungah a ngen thei lo nei sa uh amah? A ngen hi leng keima kungah vantung mite legion[160] sawm le ni val, thakhatin ang sawl zieu ding ahi hi.

⁵⁴Tua bang hi mawh leh Lai Siengtho in tu-a banga a pien nading a gen pen bangci tangtun thei ta ding ahei?” a ci hi.

⁵⁵Khum hunin Jesu in mipite kungah, “Guta bulu khat mat banga kei ei man dinga namsau le phohbul tawh hing kuon na hi uh amah? Nisimin biehinnpi sungah to-in thu ka hil laitahin lah nei man zel sih uhi.

⁵⁶Hinanle kamsangte’ Lai Siengtho a tangtun nadinga tam bang teng zosie ang pieng ahi hi,” a ci hi. Tua ciengin nuazuite zosie in ama nuasie-in a taimang uhi.

⁵⁷Jesu a mante in thukham hil siete le upate kikhopna inn, siempu lien pa Caiaphas kungah a peipi uhi.

⁵⁸Peter in siempu lien pa’ inntuol dong a gamla seng lo panin ama a zui hi; ama in a thu tawpna a thei nadingin a sungah lutin a cingte tawh a toton hi.

⁵⁹Siempu liente le vaihawmte in Jesu a tha thei nadingun ama langkhatah zuou teci a sui vua,

⁶⁰zuou teci tampi tah a mai-ah a pei vangun amate in a mawna a mu sih uhi. A tawpna ah mi ni a mai-ah a pei vua,

⁶¹“Tam mipa in, ‘Pasien’ biehinnpi ka susie zo ding a, ni thum sungin ka lamkia ding hi,’ ci hi,” a ci uhi.

⁶²Siempu lien pa dingin, “Dawn nading na nei sih amah” Na lang khatah a tecipanna uh bang teng ahei?” a ci hi.

⁶³Ahi vangin Jesu ham loin a om hi. Tua ciengin siempu lien pa in ama kungah, “A hingzing Pasien’ mai-ah kang ciemsah hi, Pasien Tapa Messiah[161] na mah, ei gen in” a ci hi.

⁶⁴Jesu in tua pa kungah, “Na cisa ma bang ahi hi. Ahi vangin ke’n kang ci-in, Tu-a kipanin vanglietna zietlamah Mihing Tapa to-in, vana meiilum tung tuongin ang pei na mu ding uhi,” a ci hi.

⁶⁵Tua ciengin siempu lien pa in a puonsilte balkehin, “Pasien tungah a hamkhiel ta hi! Teci dang a kisam nawn amah? En un, tu-in a hamkhielna na za zo uhi.

⁶⁶Na thukhenna uh bang ahiei?” a ci hi. Amate in, “A si dingin kilawm hi,” a ci uhi.

⁶⁷Tua ciengin amate in a maitang cil phi-in a vuo uhi; tuale kimkhatte in a phebeh vua,

⁶⁸“Nang Messiah[162] aw, ei gen vawi, nang ang vuo koi ahiei?” a ci uhi.

⁶⁹Tua laitahin inntuol ah Peter a na to hi. Numei nasem khat ama kungah pei a, “Nang zong Galilee mi Jesu tawh kipawl ngel vete aw,” a ci hi.

⁷⁰Ahi vangin ama in, “Na thugen theikha vawt sing,” ci-in amate zosie mai-ah kilepin a niel hi.

⁷¹Innhlap lam zuonin a pusuo ciengin adang numei nasem khat ma in mu a, a gei-a dingte kungah, “Tam pa Nazareth mi Jesu tawh kipawl ngai ngel ve aw,” a ci hi.

⁷²Ama in, “Tua pa thei ngai vawt sing!” ci-in kitomlaw-in a nielkia hi.

⁷³Tua zaw a sawt loin a gei-a dingte pei-in Peter kungah, “Nang zong amate lahah khat hi lenlon teh, na awsuo-in zong ang kithei ngengngong khu,” a ci uhi.

⁷⁴Tua ciengin ama le ama kisamsie-in, “Tua pa thei kha kilkel sing!” ci-in a kitomlaw hi.

⁷⁵Tua ciengin Peter in, “Aa a khuon masangin thumvei nei niel ding hi,” ci-a Jesu thugen a phawhkia hi. Tuale ama pusuohin nahpi tahin a kap hi.