Read Zou MATTHEW 27 Bible Online

MATTHEW 27 - Zou bible

MATTHEW 27

¹Zingmawng ciengin siempu liente zosie le mipi upate pei-in Jesu thalup thei nading thu a kikum uhi.

²Amate in lep-ia sa-in a zawpi vua, gam uhpa Pilat khut sungah a ap uhi.

³Ama a leheh pa Judas in Jesu[163] a kimawsah a thei ciengin kisiakia-in siempute le upate kungah dangka sawmthum a piekia hi.

⁴Ama in, “Maw nei lo sisan ka lebawl ziehin ka khiel zo hi,” a ci hi. Ahi vangin amate in, “Tuami ko tawh bang kisai ahei? Na law theithei kilaw ta’n,” a ci uhi.

⁵Ama in a sum teng biehinnpi sungah sepsuhin a peisan hi; tuale ama pei-in ama le ama a gui-awh hi.

⁶Ahi vangin siempu liente in tua dangkate a la vua, “Tamte sisan man ahi ziehin biehinn sumkholna-a koi dingin kilawm lo hi,” a ci uhi.

⁷Amate a kikup zaw ciengun tua sum teng gamdang mite vui nadingin beelkheng pa’ lo a lei uhi.

⁸Tua ahi ziehin tua mun pen tuni dongin Sisan Leitang kici hi.

⁹Tua ciengin kamsang Jeremiah[164] tungtawnin, “Israel mite pawlkhat in ama’ man dinga a sesa[165] uh tua dangka sawmthum a la[166] vua,

¹⁰TOPA in kei ei thupieh bangin beelkheng pa’ lo lei nadingin a pie[167] uhi,” ci-a kigensa thu a tangtung hi.

¹¹Tu-in gam uhpa mai-ah Jesu a ding hi; tuale gam uhpa in, “Nang Juda kumpi na hi amah?” ci-in a dong hi. Jesu in, “Na ci bangin ka hi hi,” a ci hi.

¹²Ahi vangin siempu liente le upate in a mawmat uh ciengin ama in dawng lo hi.

¹³Tua ciengin Pilat in ama kungah, “Amate in nang lang khatah ang mawmatna uh tampite za lo na hi amah?” a ci hi.

¹⁴Ahi vangin ama in a kimawsahna khat beh nangawn zong a dawnkia lo ziehin gam uhpa in lamdang sa mama hi.

¹⁵Tua hun lai-in pawi a kibawl ciengin gam uhpa in mihonpite’ dei thongkie mi khat popo a hla zel ngaina ahi hi.

¹⁶Khum hunin amate in Jesu[168] Barabbas a kici a gilo-a minthang thongkie khat a nei uhi.

¹⁷Tuaci’n a kikhop zaw ciengun Pilat in amate kungah, “Jesu[169] Barabbas le Messiah[170] kici Jesu koizaw ka hla ding na dei vuoi?

¹⁸Bangzieh ahei cile amate in hazatna tawh ama tungah a ap uh ahi lamtah a thei hi.

¹⁹Thukhenna topha tungah a to laitahin a zinu in ama kungah kam vaihlah a, “Tuzan ka mangah ama ziehin nahpi tahin gimna thuoh ka hi ziehin mawna nei lo tua mipa bangma na law sin,” a ci hi.

²⁰Barabbas hla-in Jesu tha dinga a nget nadingun siempu liente le upate in mihonpite a zawl uhi.

²¹Gam uhpa in amate kungah, “Koi zaw ka hla ding na dei vuoi?” ci-in a dongkia hi. Tuale amate in, “Barabbas” a ci uhi.

²²Pilat in amate kungah, “Tua ahile Messiah[171] a kici Jesu bang ka law diei?” a ci hi. Amate in a unpi-un, “Singlamte tungah khailumsah in,” a ci uhi.

²³Tua ciengin ama in, “Bang ziehin lah, ama in bang sietna bawl ahei?” ci-in a dong hi. Hinanle amate in, “Singlamte tung ah ama khailumsah in!” ci-in a awng semsem uhi.

²⁴Tuaci’n Pilat in bangma a law thei ta sih a, buoina kipatna hizaw bep va ci a thei ciengin, ama in tui themkhat la-in mipite mai-ah a khut silsieng a, “Tam mipa’ sisan tungah ka sieng hi; na law theithei kilaw ta un,” a ci hi.

²⁵Tua ciengin mipi zosie in, “Ama’ sisan kote tung le ka suonlehlahte uh tungah tu taheh!” ci-in a dawng uhi.

²⁶Tuaci’n ama in amate adingin Barabbas a hlakhie hi; Jesu ahile a sat zaw ciengin singlamte tunga khailup dingin a pie hi.

²⁷Tua ciengin gam uhpa’ galkapte phuolpi[172] ah Jesu a peipi vua, a kimvelah galkap honpi zosie a kikhawmsah hi.

²⁸Amate in a puonsilte hawhkhiet piehin ama tungah puontuol dupsan khat a silsah vua,

²⁹tuale amate in ling tawh kibawl kumpi lukhu khat phanin ama’ lu tungah a khusah uhi. Amate in a zietlamah pumpeng khat tawisahin a mai-ah a khupdin vua, “Judah Kumpipa aw, na khan sawt taheh!” ci-in a zako uhi.

³⁰Ama a cilphit vua, tuale a pumpeng la-in a lutang a sat uhi.

³¹Ama a zako zaw ciengun a puontuol hawhkhieh piehin a puonte ma a silsahkia uhi. Tua ciengin amate in khailup dingin ama a zawpi uhi.

³²Amate a pei laitahun Simon kici Cyrene pana mi khat tawh a kituoh kha uhi; amate in ama’ singlamte puo dingin tua pa a pausawl uhi.

³³Tuale Golgotha (Lugu Mun a ci nopna) kici munah a tun ciengun amate in a dawn dingin

³⁴tuikha kihal lenggazu a pie uhi; hizongle ama in ciem a, a dawn nuom sih hi.

³⁵Singlamte tungah Jesu a khailia zaw ciengun amate in aisanna tawh a puonte a hawm uhi.[173]

³⁶Tua ciengin khumnah amate to-in ama a en uhi.

³⁷Amate in Jesu’ lu tung son tahah, “Tam pa pen Judah Kumpipa Jesu ahi hi,” ci-a kigiel mawmatna lai a suong uhi.

³⁸Tua ciengin ama tawh misuomte ni, khat a zietlamah, khat a veilamah kikhai hi.

³⁹Tua mun a nawhkha mite in a lu uh vihin,

⁴⁰“Biehinnpi susie-in ni thum sunga a lamkia ding pa aw, nang le nang kihunkhie vawi! Pasien’ tapa na hi leh singlamte tung panin hing kumsuh in,” ci-in a elho uhi.

⁴¹Tua ma bangin siempu liente in zong thukham hil siete le upate tawh ama a zako vua,

⁴²“Ama in midangte hunkhie thei napi ama le ama lah a kihunkhie thei vanuh sih hi;[174] ama Israel-te’ Kumpipa ahi hi; tu-in a singlamte tung panin hing kumsuh leh i um pan ding uhi.

⁴³Ama in Pasien muong hi; tu-in Pasien in pha a sah leh ama hunkhie taheh; azieh pen ama in, “Kei Pasien’ tapa ka hi hi,’ ci hi,” a ci uhi.

⁴⁴Ama tawh a kikhaiton misuomte in zong tua bang ma-in a tawh uhi.

⁴⁵Sunkim a kipanin nitah nai thum dongin tua gam sung zosie-ah mutzin a tung hi.

⁴⁶Nai thum hun pawlin Jesu in, “Eli, Eli, lema sabachthani?” ci-in nahpi tahin kiko a, tua pen ka Pasien, ka Pasien, bang zieha nei nuasie ahei?” a cina ahi hi.

⁴⁷A gei-a ding pawlkhat in a zah ciengun amate in, “Tam mipa in Elijah hlan hi,” a ci uhi.

⁴⁸Amate lahah khat tai pai a, tui hupna khat la-in lenggazu thua sungah die a, cieng dawnah koi-in a dawn dingin a pie hi.

⁴⁹Ahi vangin adangte in, “Ngah phot un, ama a hunkhie dingin Elijah ang pei ei mah en tadi vai,” a ci uhi.[175]

⁵⁰Tua ciengin Jesu nahpi tahin kikokia-in a naahu tawpin a si hi.[176]

⁵¹Tua hun laitahin biehinnpi kidatna puonkhai a tung panin a nei dongin phalni kisuo hi. Zil zong lingin suongtumpite a pawhkeh hi.

⁵²Hankhuhte kihong a, a sisa mi siengthote’ luonghawm kithosah hi.

⁵³Ama a thawkia zo ciengin hankhuh panin amate a pusuoh vua, khuopi siengtho sungah lutin mi tampite tungah a kihil uhi.

⁵⁴Jesu a cing galkapmangpa le a ompite in zil kiling le tua thupiengte a mu ciengun a zausi vua, “Tampa, Pasien’ tapa[177] lah ahi tahpi mawh in!” a ci uhi.

⁵⁵Khum munah gamlapi pana a gal et numei tampitah a om uhi.

⁵⁶Tuate lahah Mary Magdalene, James le Joseph’ nu Mary, le Zebedee’ tapa tegel’ nu zong a om hi.

⁵⁷Nitah ciengin Arimathea khuo panin Jesu’ nuazui zong ahi Joseph a kici mihaupa khat,

⁵⁸Pilat kungah pei-in Jesu’ luong ngen hi; tua ciengin Pilat in zong ama tunga pieh dingin thu a pie hi.

⁵⁹Tuaci’n a luong la-in dielpuon siengtho khat tawh a tun zaw ciengin,

⁶⁰suong a tawkuohsa ama’ hantha sungah a siel hi.

⁶¹Mary Magdala le adang Mary zong hankhuh maingatin a to uhi.

⁶²A zing cieng, Kiginni zaw ciengin Pilat mai-ah siempu liente le Pharisee-te a kikhawm vua,

⁶³“Siepa aw, tua mi solpa in a hin lai-in, ‘Ni thum zaw ciengin ka thokia ding hi,’ a ci thu ka ciemte lai uhi.

⁶⁴Tua ahi ziehin ni thum a cin masangsie han hoi taha a kicin nadingin thu pie in; tua bang ahi sihle a nuazuite na pei-in a luonghawm na gu-in mipite kungah, “Ama sina pan tho zo ta hi,’ ci-in gen thei kha mawh ding uhi. Tua hileh a mi sol masahna uh pen a misol nukhia uh sangin ang siehuoizaw lai kha ding hi,” a ci uhi.

⁶⁵Pilat in amate kungah, “A cing ding galkap[178] na nei uhi; pei unlen, na hi thei za-un a muonhuoi thei pen dingin bawl un,” a ci hi.[179]

⁶⁶Tuaci’n amate pei-in hankhuh sinna suong seal tumin a ciemte zaw ciengun a cing ding galkapte koi-in muonhuoi tahin hankhuh a bawl uhi.