Read Zou MATTHEW 5 Bible Online

MATTHEW 5 - Zou bible

MATTHEW 5

¹Jesu[25] in mihonpite a mu ciengin ama muol tungah a kato hi; tuale a to zaw ciengin ama kungah a nuazuite a pei uhi.

²Tua ciengin amate thuhil dingin kipan a:

³“Hlagau lamah a zawngkhal mite thupha nga ahi hi, bangzieh ahei cile vantung gam amau-a’ ahi hi.

⁴“A kap a maute thupha nga ahi hi, bangzieh ahei cile amate a kihenem ding hi.

⁵“Lungnem mite thupha nga ahi hi, bangzieh ahei cile amate in leitung luo ding uhi.

⁶“Dihna zieha gilkiel dangtate thupha nga ahi hi, bangzieh ahei cile amate a lungtai ding uhi.

⁷Mi hepi theite thupha nga ahi hi, bangzieh ahei cile amate in hepina nga ding uhi.

⁸Lungsim siengthote thupha nga ahi hi, bangzieh ahei cile amate in Pasien a mu ding uhi.

⁹Kilemna bawlte thupha nga ahi hi, bangzieh ahei cile amate Pasien’ tate kici ding hi.

¹⁰Dihna zieha bawlsietna a thuoh mite thupha nga ahi hi, bangzieh ahei cile vantung gam amau-a’ ahi hi.

¹¹Keima ziehin mite in hing hosie-in ang bawlsiet vua, a man lopi-a[26] sietna namcin tawh ang mawsah uh ciengin thupha nga na hi uhi.

¹²Vantungah na thaman uh lien ahi ziehin lungdamin kipah un. Azieh pen no masanga kamsangte zong tua ma bangin na kibawlsie ngai hi.

¹³“Note leitung ci na hi uhi; hinanle ci a alna mang leh bangci ki-alsahkia ding ahei? Paimangin keng tawh totcil ding longal a kimanna ding a om nawn sih hi.

¹⁴“Note leitung khuovah na hi uhi. Muol tunga kilam khuo kisel thei lo hi.

¹⁵Meivah a vah zaw ciengin koima in law khu loin meivah tunna tungah koizaw a, tua in inn sung zosie tanvah hi.

¹⁶Tua ma bangin amate in na silpha bawl uh a mu ciengun vantunga om na Pa uh’ min a phat thei nadingun mite mai-ah na khuovah uh na tangsah un.

¹⁷“Thukham ahi sihle kamsangte’ thuhilna a phietmang dinga ang pei-in ei ngaisun sih un; a phietmang dinga ang pei ka hi sih a, a kicingsah dinga ang pei ka hizaw hi.

¹⁸Azieh pen a tahtah a kang ci-in, van le lei a mangthai zongin na zosie a tangtun masangsie thukham laimal[27] cindawncie zong mangthai lo ding hi.

¹⁹Tua ahi ziehin tami thukhamte lah panin a neupen khat zong palsatin[28] khum bangma-a bawl dinga midangte a hil poma vantung gam sungah a neupen kici ding hi; ahi vangin tami thukhamte zui-in, a zui nading vua thu a hil poma vantung gam sungah milien kici ding hi.

²⁰Bangzieh ahei cile ke’n kang ci-in, note’ dihna in Pharisee-te le thukham hil siete’ dihna a khup zawh sih leh vantung gam sungah na lut thei poma sih ding uhi.

²¹“Tanglai mite kungah, ‘Tuol na that sih ding uhi; tuol that poma thukhenna thuoh ding hi,’ a kici thu na zahsa uh ahi hi.

²²Ahi vangin ke’n kang ci-in, na sanggampa ahi sihle na sanggamnu[29] tunga na lungthah uleh thukhenna na thuoh ding uhi; tuale note in na sanggampa ahi sihle na sanggamnu[30] na hosiet[31] uleh upate’ thukhenna zumah thusitna na thuoh ding uhi; tuale note in, ‘Nang mimaw pa’ na ci uleh hell[32] meili sungah thukhenna na thuoh ding uhi.

²³Tua ahi ziehin maitam ah biehna na pieh laitahin nang tungah na sanggampa ahi sihle na sanggamnu[33] khat a lungkim lo lam na phaw khah leh,

²⁴tua maitam mai-ah na biehna nuasie phot inlen pei-in; na sanggampa ahi sihle na sanggamnu tawh va kilem masa phot ta’n, tua zaw ciengin hing pei-in na biehna piekia in.

²⁵Na langpa tawh thukhenna zumah[34] a kikhie dinga lampi-ah na zawton laitahin ama tawh kilem nading bawl pai in, tua ahi sihle na langpa in thukhente tungah hing ap ding a, thukhente in mimante tungah hing pie-in thong sungah ang khum theikha ding hi.

²⁶A tahtah a kang ci-in, lieusum na khieh zo masangsie na suohta ngai sih ding hi.

²⁷“ ‘Ang na kawm sih ding hi,’ a kici thu na zahsa uh ahi hi.

²⁸Hizongle ke’n kang ci-in, lunggulna tawh numei khat a en mi zosie a lungsimin angkawm zo ahi ta uhi.

²⁹Na zietlam mit in ang mawsah leh kheidawh inlen paimang in; na pumpi buppi hell[35] khuh sunga ang kipai sangin na tahsa behkhat a pelem ding nang adingin hoizaw hi.

³⁰Na zietlam khut in ang mawsah leh sattan inlen paimang in; na pumpi buppi hell [36]khuh sunga a pei sangin na tahsa behkhat a pelem ding hoizaw hi.

³¹‘A zi a khul poma in khulna lai pie taheh,’[37] zong kici hi.

³²Ahi vangin ke’n kang ci-in, khielna khat zieh simlo a zi khul poma in ama nu pen angkawmsah a suoh hi; a kikhulsa numei a kinunpi poma zong angkawm a suoh hi.

³³“Tanglai mite kungah, ‘Zuouthu tawh kiciem loin TOPA tawh na kiciemna uh na tangtunzaw ding uhi,’ a kici thu na zahsa uh ahi hi.

³⁴Hizongle ke’n kang ci-in, vantung tawh na kiciem vawt sih un, azieh pen tua khu Pasien’ topha ahi bo a,

³⁵leitung tawh zong kiciem vawt sih un, azieh pen tua khu a keng ngahna ahi bo hi. Jerusalem tawh na kiciem sih un, a zieh pen tua khu Kumpi Lien pa’ khuopi ahi bo hi.

³⁶Na lutang tawh kiciem sih un, azieh pen na samzam khat beh na kangsah thei sih vua, zong na vomsah thei sih uhi.

³⁷Na thugente a hite, ‘Hi’ ci unlen, ahi lote, ‘Hisih’ ci lel un; tua bansie poma gilopa[38] kung pana ang pei ahi hi.

³⁸“’Mittang’ tangin mittang, ha’ tangin ha,’ a kici thu na zahsa uh ahi hi.

³⁹Ahi vangin ke’n kang ci-in, sietna bawlpa ledo sih un. Mi khatpo in na pang zietlam ang beh leh a lang khat zong na dawlai zaw in;

⁴⁰mi khatpo in na puon tungsil la nuomin thu ang bawl leh na puontuol zong na pie lai in.

⁴¹Mi khatpo in zawthaw thu tawh tai khat ang peisah leh tai ni dong na pei in.

⁴²Na kunga ang ngente zosie na pie inlen, na kunga ang leitawi nuom poma na khia sin.

⁴³“’Na vengpa na it ding a, na galte na muda ding hi,’ a kici thu na zahsa uh ahi hi.

⁴⁴Ahi vangin ke’n kang ci-in, na galte it unlen ang bawlsiete adingin thunget pieh un.

⁴⁵Tuaci’n note pen vantunga om na Pa uh’ tate na hi ding uhi; bangzieh ahei cile ama in migilote tung le mihoite tungah ni tangsah a, midihte tung le midih lote tungah guo zusah hi.

⁴⁶Azieh pen no ang itte beh na it uleh bang thaman nga ding na hi uh ahei? Siehdongte nangawn in zong tua bangma-a a bawl uh hi lo amah?

⁴⁷Na sanggamte beh na muoh vua ahile midangte sanga na tam sep tuonna uh bang hi ta ding ahei? Gentile-te nangawn in zong tua bang ma-in bawl uh hi lo amah?

⁴⁸Tua ahi ziehin vantunga om na pa uh a cingtah ahi ma bangin no zong na cingtah un.