Read Zou MATTHEW 6 Bible Online

MATTHEW 6 - Zou bible

MATTHEW 6

¹“Biehna tawh kisai na sil bawlte uh midangte’ mu dinga na bawl lo nadingun pilvang un; bangzieh ahei cile tua banga na gamtat uleh vantunga om na Pa uh kung panin thaman na nga sih ding uhi.

²“Tuaci’n note in silpieh na pieh sielun mihoi kipangte in midangte phat ding a dei ziehun kikhopna inn sung le lamdung tengah pengkul a mutsah bangin na pie sih un. A tahtah a kang ci-in, amate in a thaman uh a nga zo ta uhi.

³Ahi vangin note in silpieh na pieh uh ciengin na zietlam khut’ bawl na veilam khut in theisah da un.

⁴Tua hileh na silpieh uh pen dappieh ahi ding hi; tua hile a dapmu na Pa un thaman ang pie ding hi.

⁵“Thu na nget sielun mihoi kipangte na bang sih un; azieh pen amate in midangte’ mu theithei dingin kikhopna inn sung le lamkabawm lahpo-ah dinsa-in thu a ngen nuom sese uhi.

⁶Ahi vangin thu na nget sielun na innkhan sung vuah lutin kot khah unlen, mu thei lona muna om na Pa uh kungah ngen un; tua hile ang dapmu na Pa un note thaman ang pie ding hi.

⁷“Thu na nget ciengun Gentile mite bangin kimanna nei lo kam tampi mawh sutsut sih un; azieh pen amate in tampi a nget ziehun a kiza deu ding a sa kha uhi.

⁸Thu na nget masangun na Pa un na kisap teng uh thei zo ahi ziehin amate na bang sih un.

⁹“Tua ahi ciengin tam bangin thu na ngen un: Vantunga om kohaw’ Pa aw, na min kizatah hinlen,

¹⁰na gam hing tung taheh. Na deina vanah a kizui bangin leitung ah zong kizui taheh.

¹¹Nisim ka nehkhop ding uh an ei pie in.[39]

¹²Ko tunga ang mawte ka maisah ma bangun ka mawnate uzong ei maisah in.

¹³Solna ei thuohsah sinlen,[40] gilopa kung pan ei hunkhie in. Uh zawhna, vanglietna, minthanna nei tawntung ta in, Amen.[41]

¹⁴Azieh pen midangte’ khielna na maisah uleh vantunga om na Pa un zong note’ khielna ang maisah ding hi.

¹⁵Ahi vangin midangte’ khielna na maisah sih uleh na Pa un zong note’ khielna ang maisah sih ding hi.

¹⁶“An na tan sielun mihoi kipangte bangin damai puo sih un, azieh pen amate in a antan uh midangte a lah nop ziehun a maisuo uh a siesah uhi. A tahtah a kang ci-in, amate in thaman a nga zo uhi.

¹⁷An na tan uh ciengin na lu uh sathau si unlen, na mai uh phiet siengzaw un,

¹⁸tuaci’n midangte in na an tan lam uh a mu sih vangun a simtham-a a om na Pa un ang mu veve ding hi; tua hile ang mudap na Pa un note thaman ang pie ding hi.

¹⁹“Nget in ne-in sam-eh[42] a kai theina, gutate in lu-in a guh theina leitungah na goute uh khol sih un;

²⁰nget in a neh thei lona, sam-eh[43] a kai thei lona, gutate in lu-in a guh thei lona mun vantungah na goute uh kholzaw un.

²¹Azieh pen na gou opna mun vuah na lungsim uzong a om ding hi.

²²“Mittang pen pumpi adingin khuovah ahi hi. Tuaci’n na mit uh a cim leh na pumpi tung zosie a vah ding hi;

²³ahi vangin na mit uh a cim sih leh na pumpi tung zosie uh a miel ding hi. Na sung vua a om khuovah pen khuomiel ahile bangza tahin a miel mawh ta diei!

²⁴“Koima in to ni’ na sem zo lo hi; azieh pen sila pa in khat muda-in a khat it ding a, ahi sihle a khat belin adang khat simmaw ding hi. Note in Pasien’ na le leitung hauna’[44] na na semton zo sih ding uhi.

²⁵“Tua ahi ziehin ke’n kang ci-in, bang ne-in bang ka dawn diei, ci-in na hinkhuo ading uh lunghimaw sih unlen, bang ka sil diei, ci-in zong na pumpi vua dingin lunghimaw sih un. Nehledawn sangin hinkhuo thupizaw a, silleten sangin pumpi thupizaw hi lo amah?

²⁶Vana a leng vate en un; amate in khai a tu ngai sih vua, an la-in bem sungah a khol vateh sih uhi, hizongle vantunga om na Pa un tuate an a vah hi. Tuate sangin na manphazaw sam sih ding uh amah?

²⁷Tua ahile na lunghimaw ziehun note lahah na hinkhuo uh nai khat sung a sotto thei koi om na hi uh ahei?[45]

²⁸Bang dinga silleten ading lunghimaw na hi uh ahei? Gamlahah unoh paate khandan ngaisun vawi un; amate in na lah a sem sih vua, vau zong a zom ngai vateh sih uhi.

²⁹Hizongle ke’n kang ci-in, Solomon nangawn a thupina zosie tawh a kizep ciengin tua paapete lahah khat zong a ban zo nai sih hi.

³⁰Ahi vangin tuni-in hing a, zing cienga meikhuh sungah a kipai lel ding gamlah lopate bawn Pasien in puon silsah ahileh no upna neu mite aw, ama in note puon ang silsah zawkan sih ding amah?

³¹Tua ahi ziehin, ‘Bang ka ne diei?’ ahi sihle, ‘Bang ka dawn diei’ ahi sihle, ‘Bang ka sil diei’ ci-in lunghimaw sih un.

³²Azieh pen tam teng zosie adingin Gentile mite a hanciem uhi; tam teng zosie na kisap lam uh vantunga om na Pa un thei zo hi.

³³Pasien’ manggam le ama’ dihna sui masa un, tua hile tam teng zosie zong ang kipiehbe ding hi.

³⁴“Tua ahi manin zing cieng ading lunghimaw sih un, azieh pen zingcieng in ama adingin a lungkham na ding hi. Tuni’ buoina tuni adingin kicing gawp ta hi.