Read Zou MATTHEW 7 Bible Online

MATTHEW 7 - Zou bible

MATTHEW 7

¹“Note tunga thu ang kikhen lo nadingin midangte tungah thu khen sih un.

²Azieh pen midangte tungah thu na khen ma bangin note tungah thu ang kikhen ding a, midangte na pieh zaza ma uh na ngakia ding uhi.

³Nangma’ mit sunga singluong om thei lopi-in na vengpa’[46] mit sunga buathah om bang dinga na muthaw sese ahei?

⁴Ahi sihle nangma’ mit sunga singluong om kimlai na vengpa[47] kungah, ‘Na mit sunga buathah nang lahpieh vang,’ bangci ci thei ding na hei?

⁵No mi kineitawmte aw, na mit sung vua singluong la masa phot un, tua zaw ciengin na vengpa’[48] mit sunga na lah ding uh buathah cientahin na mu thei pan ding uhi.

⁶“A siengtho nate ui pie sih un; vohte mai-ah kep manphate pai sih un, na pai uleh a keng utawh sia gawpin, kihei-in ang hapkia lel ding hi.

⁷“ Ngen un, ang kipie ding hi; sui un, na mu ding uhi; kiu un, kot ang kihon ding hi.

⁸Azieh pen a ngen zosie in nga a, a sui zosie in mu-in, a kiu zosie kot kihon ding hi.

⁹Note lahah a tapa in anlum ngen leh suong pie ding koi na om uh ahei?

¹⁰Ahi sihle a tapa in nga ngen leh gul pie ding koi na om uh ahei?

¹¹No migilote bawn in na tate uh tungah sil hoi pieh dan ding thei na hi uleh, vantunga om na Pa un ama kunga a ngente tungah sil hoi tampitah pie zaw kan lai lo ding amah!

¹²“Na tung vua ang kibawl ding na dei bangun midangte tungah bawl un; azieh pen tami khu Moses’ thukham le kamsangte thugen bulpi ahi hi.

¹³“Kot kawcih ah lut un; sietna mun zotna kot golin a lampi a bai[49] ziehin mi tampi in a zui uhi.

¹⁴Hinna tun nading kot kawcihin a lampi a hamsat ziehin mi tawmno khat beh in a mu uhi.

¹⁵“A sungtawng ah ngie gongsan bang napi, tuu vun silin na kung vua ang pei zuouthei kamsangte lahah na pilvang un.

¹⁶Amate a ga tawh na thei pai lien ding uhi. Lingkung panin lengga kilo ngai-in thangling kung panin theiga a kilo ngai amah?

¹⁷Tua ma bangin singkung hoi zosie in ga hoi ga a, ahi vangin singkung hoi lo zosie in ga hoi lo ga uhi.

¹⁸Singkung hoi ah ga hoi lo a ga thei sih a, singkung hoi lo ah zong ga hoi a ga thei sih hi.

¹⁹Ga hoi a ga lo singkung zosie kiphua-in mei sungah kipai ding hi.

²⁰Tua bangin amate a ga panun na thei pai ding uhi.

²¹“Keima kungah, ‘TOPA, TOPA, ei ci zosie vantung gam sungah a lut kim sih ding a, vantunga om ka Pa’ deina banga a gamtate beh a lut ding uhi.

²²Khum ni ciengin mi tampi in keima kungah, ‘TOPA, TOPA, na min tawh thu ka hil vua, na min tawh dawite hawlkhie-in, na min ma tawh sil thupi tampitah bawl hi lo uh ka mah?’ ei ci ding uhi.

²³Tua ciengin keima in amate kungah, ‘Note kang thei ngai vawt sih hi; sietna a bawl mite aw, ka kung panin pei dawh ta un,’ ka ci ding hi.

²⁴“Tua ciengin tam ka thugente za-in a zui zosiete suong tunga inn lam mipil pa tawh kibang ding hi.

²⁵Guo zu-in tui khang a, hui langin tua inn a nawh gawp vangin suong tunga kilam ahi ziehin a pua sih hi.

²⁶Tuale ka thugente za napi a zui nuom lo zosiete pen senel tunga inn lam mimaw pa tawh a kibang ding uhi.

²⁷Guo zu-in tui khang a, hui langin tua inn a nawh gawp ciengin, senel tunga kilam ahi ziehin tua inn a pua ta hi, tua inn pua nasie sam e izaw!” a ci hi.

²⁸Tu-in Jesu in tam thute a gen zaw ciengin mipite in ama’ thuhilna lamdang a sa uhi.

²⁹Bangzieh ahei cile ama in thukham hil siete bangin thuhil loin aana nei khat bangin amate thu a hil hi.