Read Zou MATTHEW 8 Bible Online

MATTHEW 8 - Zou bible

MATTHEW 8

¹Muol tung panin Jesu[50] a kumsuh zaw ciengin mihon tampite in ama a zui uhi;

²tuale miphah[51] khat ama kungah pei-in a mai-ah khupdin a, TOPA aw, nei damsah nop leh nei damsah thei hi,” a ci hi.

³Ama in a khut zahin ama tham a, “Kang damsah nuom hi. Na siengtho ta in!” a ci hi. Thakhatthu-in a phah natna a dam pai lien hi.

⁴Tua zaw ciengin Jesu in ama kungah, “Koima kungah gen malmal sin; ahi vangin siempu pa kungah va kilah ta’nlen amate kungah teci dingin Moses’ thupieh bangin biehna va pie ta’n,” a ci hi.

⁵Capernaum khuo ah a lut ciengin ama kungah mi zakhat a uh galkapbu khat pei-in,

⁶“TOPA aw, ka nasempa zaw gawpin inn ah lum a, a natna thuohla mama hi,” ci-in ama kungah a thum hi.

⁷Tuale ama in khumpa kungah, “Hing pei-in ama ka damsah ding hi,” a ci hi.

⁸Galkapmangpa in dawng a, “TOPA aw, ka inn sungah nangpipi ang lutsah dingin kilawm malmal sing; kamteng khat gen zieu lacin ka nasempa dam lel va.

⁹Azieh pen kei zong thuneite khut sunga om ka hi a, ka khut nei-ah galkapte a om hi; tuale khat kungah, ‘Pei in,’ ka cileh pei a, adang khat kung ma-ah, ‘Hing pei in,’ ka cileh ang pei hi. Ka nasempa kungah, ‘Tami bawl in,’ ka cileh nasempa in a bawl pai hi,” a ci hi.

¹⁰Jesu in a thugen a zah ciengin lamdangsa a, tuale ama a zuite kungah, “A tahtah a kang ci-in, Israel-te sungah tam bang upna a nei koima[52] ka mu sih hi.

¹¹Ke’n kang ci-in, nisuona pan le ni tumna panin mi tampi ang pei-in vantung gam sungah Abraham, Isaac le Jacob-te tawh an a neton ding uhi,

¹²kumpi gam luo mite ahi uleh kaana le hagawina mun a pulam khuomiel lahah kipai ding hi,” a ci hi.

¹³Tuale Jesu in galkapmangpa kungah, “Pei in; na upna bangin na tungah kibawl taheh,” a ci hi. Tua hun ma-in a nasempa a dam pai hi.

¹⁴Pater’ inn ah Jesu a lut leh ama in cithuo natna tawh lupna tunga a lum a sungnu a mu hi.

¹⁵Ama in tua nu’ khut a thampieh leh a cithuo natna dam a, ama zong tho-in zindo a kipan pai hi.

¹⁶Khumi nitahin amate in dawivei mi tampitah ama kungah a peipi uhi; tuale ama in kamteng khat tawh dawite hawlkhie-in cinate zosie a damsah hi.

¹⁷Tam pen, “Ama in i zawngkhalnate ladawh a, i natnate a puo hi,” ci-in kamsang Isaiah tungtawn a na kigensa thu a tangtun nading ahi hi.

¹⁸Jesu in a kimvelah mihon tampite a mu ciengin, ama in galkhat lama pei dingin thu a pie hi.

¹⁹Tua ciengin thukham hil siepa khat a va pei ta a, “Siepa aw, na peina popo-ah kang zui ding hi,” a ci hi.

²⁰Tuale Jesu in ama kungah, “Ngiete in kuo nei a, vana leng vate in bu a nei uhi; ahi vangin Mihing Tapa in a lu ngah nading mun a nei sih hi,” a ci hi.

²¹A nuazui dangte khat in ama kungah, “TOPA aw, va pei-in ka pa ei vuisah masa phot in,” a ci hi.

²²Ahi vangin Jesu in ama kungah, “Keima ei zui in, misite in a misite uh vuisah lel in,” a ci hi.

²³Gunkuong sungah ama a tuon ciengin a nuazuite in a zui uhi.

²⁴Tuipi tungah huipi nahpi-in langin tuihuolte in gunkuong a hlummang dihdih hi; ahi vangin ama a kimu ziuzieu hi.

²⁵Tuale amate pei-in Jesu a phong vua, “TOPA aw, kote ei hun ven! A simang ding ka hi ta uhi!” a ci uhi.

²⁶Ama in a kung vuah, “Upna neu mite aw, bang dinga zau na hi uh ahei?” a ci hi. Tua ciengin ama tho-in huipi le tuipite a phawhsie leh a dai dide pai hi.

²⁷Amate in lamdang a sa mama vua, “Huite le tuipi nangawn in a thu a man va-ia uh tampa bangci mi ahi diei?” a kici uhi.

²⁸Tuipi galkhat, Gadara mite’[53] gam a tun ciengin han panin dawivei mi ni pusuohin ama na dawntuo uhi. Ama gel a hansan seng ziehun tua lam a pei ngam koima om lo hi.

²⁹Ama gel thakhatthu-in a kiko vua, “Pasien’ Tapa aw, ko tawh bang kisai laizang na hei? A hun tun masanga ko ei bawlsie dinga ang pei na hi amah?” a ci uhi.

³⁰Amate kung pan a gamla seng lo mun khatah voh hon tampi kikhawi a om hi.

³¹Tuale dawite in ama kungah, “Ko nawdawh nei sawm leh voh honpi lahah ei lutsah in,” ci-in a thum uhi.

³²Tuale ama in amate kungah, “Pei un!” a ci hi. Tuaci’n amate pusuohin voh honte sungah a lut uhi. Tua bepin voh honte luibang ken panin thakhatin kumsuhin tui sungah a si sieng uhi.

³³Voh cingte tai-in khuopi sungah a lut vua, amate in a thu omdan zosie le dawiveite tunga thupieng teng a gen uhi.

³⁴Tua ciengin Jesu dawn dingin khuozangin a pusuoh vua, ama a mu ciengun a gam panun a peidawh nadingin a thum uhi.