Read Zou MATTHEW 9 Bible Online

MATTHEW 9 - Zou bible

MATTHEW 9

¹Gunkuong tungah tuongin tuipi galkai a, ama’ khuo-ah a tung hi.

²Tua zaw lien ciengin mi pawlkhat in lupna tunga a lum phalsi khat a zawng uhi. Jesu in a upna uh a mu bepin ama in a pumzawpa kungah, “Ka ta aw; lungmuongin om in, na mawna mai zo hi,” a ci hi.

³Tua ciengin thukham hil siete pawlkhat in, “Tampa in Pasien a gensie hi,” a kici uhi.

⁴Hinanle Jesu in a ngaisutna uh thei a, “Bang dingin gitlo lungsim ngaisun na hi uh ahei? a ci hi.

⁵Azieh pen, ‘Na mawnate kimaisah zo hi,’ ci ding le, ‘Tho inlen pei in,’ ci ding koi baizaw ahei?

⁶Ahi vangin Mihing Tapa in leitungah mawmaisah thei nading thu nei hi, ci note in na thei nadingun,” a ci zaw ciengin ama in phal si mipa kungah, “Tho in, na lupna puo inlen na inn ah pei in,” a ci hi.

⁷Tuale tua pa tho-in a inn ah a pei hi.

⁸Mihonpite in tam thu a mu uh ciengin lamdang a sa mama vua, amate in mihingte tunga tam bang thu neina a pie Pasien a phat uhi.

⁹Khum mun panin Jesu a pei laitahin siehdonna zum sunga a to Matthew a kici mi khat mu hi; ama kungah, “Ei zui in,” a ci hi. Tuale ama dingto-in a zui pai hi.

¹⁰Inn sungah nitah an ne-in a to laitahin siehdongte le mawneite tampi pei-in ama le a nuazuite tawh a toton uhi.

¹¹Pharisee-te in tam thu a mu ciengun amate in a nuazuite kungah, “Bang dinga na siepa un siehdongte le mawneite tawh an neton ahei?” a ci uhi.

¹²Ahi vangin ama in tam thu a zah ciengin, “Sievuon a tulmaw pen cidamte hi loin cinate ahi zaw hi.

¹³Pei unlen, ‘Keima lunggul pen biehpiehna hi loin lainatna hizaw hi,’ a kici khu bang a cinopna ahei, va kan ta un. Azieh pen midihte hlan dinga ang pei ka hi sih a, mawneite hlan dinga ang pei ka hizaw hi,” a ci hi.

¹⁴Tua ciengin ama kungah John’ nuazuite pei a, “Bang dinga kote le Pharisee-te in an tang zelzel[54] napi, na nuazuite in tang lo uh ahei?” a ci uhi.

¹⁵Jesu in amate kungah, “Zineipa tawh a omton laisie-un mopawi simte a da thei ding uh amah? Amate kung panin zineipa a kilah hun ang tung ding a, tua hun ciengin amate in an a tang ding uhi.

¹⁶Koima in puonbeh tha tawh puonlui phaw ngai lo hi, azieh pen a kiphawna puonbeh in puonlui kai-eh ding a, a ehbe zaw ding hi.

¹⁷Koima in savun um lui sungah lenggazu tha thal ngai lo hi; a thal khah leh tua lenggazu in savun um phukehin kibuo ding a, savun um zong kisie ding hi; savun um tha sungah lenggazu tha kithalzaw a, tuaci’n a ni-in kisawtkoi thei hi,” a ci hi.

¹⁸Ama in tam thute amate kungah a gen laitahin thakhatthu-in kikhopna inn[55] uhpa khat va pei-in ama mai ah khupdin a, “Ka tanu tu mama-in si ta; hinanle hing pei inlen a tungah na khut hing nga lacin a hingkia ding hi,” a ci hi.

¹⁹Jesu zong ding pai-in a nuazuite tawh ama a zui hi.

²⁰Tua ciengin thakhatthu-in kum sawm le kum ni sung siluong natna vei numei khat a nua lamah pei-in a puontuol mongtep a tham hi.

²¹Azieh pen a puontuol beh va khoi kha ta leng ka dam ta ding hi,” ci-in a ngaisun hi.

²²Jesu zong kinuahei-in tua nu a mu ciengin ama in, “Ka tanu aw, lungmuongin om in; na upna in ang damsah zo ta hi,” a ci hi. Tuale thakhatthu-in numei nu a dam pai hi.

²³Ulienpa’ inn ah Jesu a tun ciengin theile tum mite le mihonpi gamlum pialpual a mu ciengin

²⁴ama in, “Kipei ta un; azieh pen numeino a si ahi sih a, a kimu ahi bo hi,” a ci hi. Tuale mihonpite in ama a nuisan uhi.

²⁵Ahi vangin a pulamah mihonpite a kipusuosah zaw ciengin a sungah ama tum a, a khut tawh a kai leh tua numeino a thoto hi.

²⁶Tam thu kigen pen tua gamkuom tengah kizelmang hi.

²⁷Khum panin Jesu a peidawh ciengin mittaw ni in a nua-ah zui-in, “David’ Tapa aw, kote ei khuotuo bo ven!” ci-in nahpi-in a kiko uhi.

²⁸Inn sungah a lut ciengin ama kungah mittaw tegel a pei uhi; tuale Jesu in ama gel kungah, “Tami bawl thei dingin nei um vuoi mah? a ci hi. Ama gel in ama kungah, “Ingheh, TOPA” a ci uhi.

²⁹Tua ciengin ama in a mit uh thampieh a, “Na upna uh dung zui-in na tung vuah pieng taheh,” a ci hi.

³⁰Tuale a mit un khuo a mu pai lien hi. Tua ciengin Jesu in ama gel kungah, “Tam thu koima theisah sih gel in,” ci-in khautahin thu a pie hi.

³¹Ahi vangin ama gel pei-in tua gamkuom tengah ama’ thu a thezah uhi.

³²Ama gel a pei zaw ciengun dawivei a ham thei lo mi khat ama kungah kipeipi hi.

³³Dawi a kinawmang zaw ciengin a ham thei lo mipa a ham thei pai hi; tuale mihonpite in lamdang a sa mama vua, “Israel gam sungah tam bang thu a pieng ngai nai sih hi,” a ci uhi.

³⁴Ahi vangin Pharisee-te in, “Dawimangpa’ vang tawh dawite kinotmang hi bo,” a ci uhi.[56]

³⁵Tua ciengin khuopite le khuotate zosie-ah Jesu pei kawikawi a, a kikhopna uh innte ah thuhilin, vantung gam tawh kisai lungdamna thute tangko-in natna satna namkim a damsah hi.

³⁶Ama in mihonpite a mu ciengin a cing om lo tuute bangin cimaw le gimthuohin a om ziehun hepihuoi a sa mama hi.

³⁷Tua ciengin ama in a nuazuite kungah, “Anlah ding tam mama a, ahi vangin nasem ding mi tawm mama hi.

³⁸Tua ahi ziehin ama’ an a la dingin an nei TOPA in nasemte ang sawl nadingin thu ngen un,” a ci hi.