Read Zou MARK 11 Bible Online

MARK 11 - Zou bible

MARK 11

¹Jerusalem tawh a kinai Oliv Muol gei-a om Bethphage le Bethany khuo a tun ciengun ama in a nuazuite ni sawlin,

²ama gel kungah, “Na mai-vua khuo ah pei unlen, na lut lien uleh koima’ tuon ngai nai lona laano khat khau kikhisa-a om na mu ding uhi; a khau sut unlen hing kai ta un.

³Mi khatpo in, ‘Bang dinga tam banga na bawl uh ahei?’ ang ci leh, “TOPA in tulmaw hi, tamtah ma-ah hing koisahkia pai na va,’ ci un,” a ci hi.

⁴Ama gel zong peipai-in, tuale lampi pulam kotkhah gei khatah laano a kikhi khat a mu uhi. Tua laano a khau a sut laitahun

⁵a gei-a om mite in, “Bang dinga laano a khau na sut uh ahei,” a ci uhi.

⁶Ama gel in zong Jesu’ kam vaihlah teng a gen uhi; tuale amate in kai ding a phal uhi.

⁷Tua ciengin Jesu kungah laano a tut vua, a tungah a puonte uh pha-in Jesu a tuong hi.

⁸Mi tampite in lampi-ah a puonte uh a na pha vua, adang pawlkhatte in gamlaha a sat uh singna bawhphate a pha uhi.

⁹Tua ciengin a mai-a pei mite le a nuazui mihonpite in, “Hosanna! TOPA’ mina ang pei pa in thupha nga taheh!

¹⁰Ang tung ding i pu David’ kumpi gam in thupha nga taheh! Van a sangpen munah Hosanna!” ci-in a kiko uhi.

¹¹Tua ciengin Jerusalem khuo ah ama lutin biehinnpi sungah tum a, na zosie a et kawikawi zaw ciengin, ni kai ta ahi ziehin sawm le nite tawh Bethany ah a pei hi.

¹²A zing ni, Bethany pan amate a peikia ciengun ama a gil a kiel hi.

¹³Theikung a na pha khat a galmu a, a ga khat beh ka mu khah leh ci-in a en dingin a va pei ta hi. A zang a tun ciengin a nate simlo bangma khat beh a mu sih hi. Azieh pen thei ga hun hi lo hi.

¹⁴Ama in theikung kungah, “Koima in na ga nekia ngai nawn sih heh,” a ci hi. Ama’ nuazuite in tua thu a za uhi.

¹⁵Tua ciengin Jerusalem ah amate a tung uhi. Tuale biehinnpi sungah Jesu lut a, biehinnpi sunga om vanzuate le vanlei mite delmang dingin a kisa a, ama in sumkhelte’ tona sabuoite le paalva zuate’ tonate zong a khulepieh hi;

¹⁶tuale ama in biehinnpi sungah van khatpo peipi ding koima a phal sih hi.

¹⁷Ama in thuhil a, ‘Ka inn in mi namcinte’ thungetna inn kici ding hi,’ ci-in kigiel hi lo amah? Ahi vangin note in misuomte’ kibuhna kuo na suo ta uhi,” a ci hi.

¹⁸Siempu liente le thukham hil siete in tami thu a zah ciengun ama tha thei nading lampi a sui den uhi; azieh pen mihonpite in ama’ thuhilna lamdang sa mama uh ahi ziehin ama a giing uhi.

¹⁹Nitah ciengin khuopi pulamah Jesu le a nuazuite a pei uhi.

²⁰Zingmawngin amate a pei laita hun tua theikung a hui dongin a gawta a mu uhi.

²¹Tua ciengin Peter in phawhkia a, ama kungah, “Siepa aw, en vawi tah! Na samsiet theikung gawta ta,” a ci hi.

²²Jesu in amate kungah, “Pasien um un.[44]

²³A tahtah a kang ci-in, tami muol kungah, ‘Kihemkhie inlen tuipi lilai sena’n kinei in,’ ci-in lung hei nei loin, na ci bangun tangtung ding hi, ci-in na up nah po uleh note adingin ang kibawlpieh ding hi.

²⁴Tuaci’n note kungah kang ci-in, na nget popo uh ka nga zo hi, ci-a na up uleh na nga ding uhi.

²⁵Thungen dinga na din sielun mi khatpo tungah lungkimlona khatpo na nei khah uleh maisah un; tua hile vantunga om na Pa un zong na gamtat khielnate uh ang maisah ding hi,” a ci hi.

²⁷Jerusalem ah amate a tungkia leuleu uhi. Biehinnpi sungah a pei laitahin ama kungah siempu liente, thukham hil siete, le upate pei-in,

²⁸“Bang thuneina tawh tamte na bawl ahei? Tam teng bawl nadingin koi in thuneina ang pie ahei?” a ci uhi.

²⁹Jesu in amate kungah, “Thu khat kang dong ding hi; ei dawng un, tuale ke’n zong bang thuneina tawh tam teng ka bawl ahei ci, kang gen ding hi.

³⁰John’ kibaptize-na pen vantung pana ang pei ahi amah, ahi sihle mihing tung pana ang pei ahei? Ei dawng un,” a ci hi.

³¹Amate khatlekhat kikumin, ‘Vantung pan hi,’ ci leih, ‘Tua ahile bang dinga ama na up lo uh ahei,’ ei ci ding hi.

³²Ahi vangin, ‘Mihing tung pan hi,’ i ci ding uh amah,” a ci uleh mi zosie in John pen kamsang tahtah khatin ngaisun uh ahi ziehin mihonpite a giing vanuh uhi.

³³Tuaci’n amate in, “Ka thei sih uhi,” ci-in Jesu a dawng uhi. Jesu in amate kungah, “Ke’n zong bang thuneina tawh tamte ka bawl ahei, ci kang gen sih ding hi,” a ci hi.