Read Zou MARK 14 Bible Online

MARK 14 - Zou bible

MARK 14

¹Peisan Pawi le Tolsawlo Anlum Pawi a tun nading ni ni a sap ni-in siempu liente le thukham hil siete in Jesu mandapin tha thei nading lampi a sui uhi.

²Bangzieh ahei cile amate in, “Mipite lahah buoina om thei ding ahi ziehin pawi hun sungin bawl sih vai, a kici uhi.

³Bethany khuo ah miphah[55] Simon’ inn sunga sabuoi tungah Jesu a to laitahin, a manpha mama nard sathau namtui suongngo thawl khat tawi-in numei khat ama kungah pei a, tua nu in a thawl sukehin ama’ lu tungah tua sathau namtui a sungsuh hi.

⁴Hizongle khum sunga om mi pawlkhat a thangpai vua, “Bang dinga tami sathau namtui ang buohmang mawh ahei?

⁵Bangzieh ahei cile tami sathau namtui kizua leh denarii[56] zathum sanga a tamzaw kikhawng ding hi a, tua sum tawh mizawngte kihu thei ding hi,” ci-in tua nu a mawsah uhi.

⁶Hinanle Jesu in, “Ama nu tua ci opsah lel un; bang dinga na buoisah uh ahei? Ama nu in kei adingin nasep hoi mama sem zo hi.

⁷Bang ding ahei cile mizawngte ahile note tawh a omton zing ahi a, na nop hunhunun amate tungah na migitna uh na lah thei ding uh ahi hi; ahi vangin note tawh kei kang omton zing sih ding hi.

⁸Ama nu in ahi thei za-in a bawl zo hi; ama nu in ka luong vui nading ka pumpi sathau siengtho ei manu zo ta hi.

⁹A tahtah a kang ci-in, lungdamna thu kigenna leitung muncin tengah ama nu a kiphaw zing nadingin a silbawl teng kigengen ding hi,” a ci hi.

¹⁰Tua ciengin sawm le nite sung panin Judas Iscariot in amate tungah Jesu a leheh thei nadingin siempu liente kungah a pei hi.

¹¹Amate in tami thu a zah ciengun a lung uh dam mama a, sum pieh dingin ama a kamciem uhi. Tuaci’n ama in Jesu a leheh thei nadingin hun lemtang sui a kipan hi.

¹²Peisan tuuno a kigaw ni, Tolsaw lo Anlum Pawi a ni masa ni-in a nuazuite in ama kungah, “Peisan Pawi an na neh nading hei sungah pei-in va siemkhol uleng na dei ei?” a ci uhi.

¹³Tuaci’n ama in a nuazuite ni sawlin ama gel kungah, “Khuopi sungah pei locin tuibeel khat a puo pasal khat tawh na kituoh ding uhi; tuapa na zui unlen,

¹⁴a lutna inntehpa kungah, ‘Siepa in, ka nuazuite tawh Peisan Pawi an ka neh thei nading ka zintunna inndan hei sung ahei, ci-in ei dongsah hi,’ va ci ta un.

¹⁵Ama in a baisa-a na kipuosa a inndan tungnung gol khat nang lah va-un, tuanah ei teng ading va siem ta un,” a ci hi.

¹⁶Tuaci’n nuazui tegel dingkhie-in khuopi sung a lut uleh, ama gel kunga a gensa vannuoi bangin a mu uhi; tuale ama gel in zong Peisan Pawi an ding a siem pai uhi.

¹⁷A nitah ciengin sawm le nite tawh Jesu a tung hi.

¹⁸Tuale amate in a mun ciet uh la-in an a neh laitahun Jesu in, “Ke’n a tahtah a kang ci-in, note lahah ka ankuong impite khat in kei ei leheh ding hi,” a ci hi.

¹⁹Amate a da mama vua, a banbanin, “TOPA, kei hi sam sih vang izaw?” a ci ciet uhi.

²⁰Ama in amate kungah, “Sawm le nite lahah kei tawh kuong[57] sunga anlum[58] diepa ahi hi.

²¹Bangzieh ahei cile ama’ thu a kigielsa ahi ma bangin Mihing Tapa pen a pei ding ahi a, ahi vangin Mihing Tapa leheh pa ahile gimna a thuoh ding hi! Tua mipa pieng da zaw leh ama adingin hoizaw ding hi,” a ci hi.

²²An a neh laitahun ama in khomun lumkhat la-in lungdamna a ko zaw ciengin phalsuo a, amate tungah pie-in, “La un, tami in ka pumpi ahi hi,” a ci hi.

²³Tua ciengin hai khat zong la-in lungdamna a ko zaw ciengin amate pie a, amate in tua hai panin a unpi-un a dawn ciet uhi.

²⁴Ama in amate kungah, “Tami in mi tampite adinga a kibuokhie thuciemna[59] tawh kisai ka sisan ahi hi.

²⁵A tahtah a kang ci-in, Pasien’ manggam sungah lenggazu tha ka dawnkia ni masangsie tami lenggazu ka dawnkia ngai nawn sih ding hi,” a ci hi.

²⁶Amate in Pasien phatna la khat a sah zaw uh ciengin Olive Muol lamah a pei uhi.

²⁷Jesu in amate kungah, “Note in na unpi-un nei taisan ding uhi; azieh pen, ‘Keima in tuucingpa ka satlia ding a, tuute a kithethang ding hi,’ ci-in kigiel hi.

²⁸Ahi vangin ka thawkia ciengin na masang vua Galilee gamah ka na pei ding hi,” a ci hi.

²⁹Peter in ama kungah, “Mi zosie in nang hing taisan nanle ken kang taisan sih ding hi,” a ci hi.

³⁰Jesu in ama kungah, “A tahtah a kang ci-in, tuni, tuzan mama, aah nivei a khuon masangin thumvei nei niel ding hi,” a ci hi.

³¹Ahi vangin ama in khautahin, “Nangma tawh a si ding hi nanleng kang niel sih ding hi,” a ci hi. Amate in a unpi-un tua bang ma-in a ci ciet uhi.

³²Gethsemane a kici mun khatah amate a pei vua, ama in a nuazuite kungah, “Ka thu nget kalin tanah na to un,” a ci hi.

³³Ama in Peter, James le John-te zawpi a, nahpi lunggimna le buoina a kipan hi.

³⁴Ama in amate kungah, “Sina ding za dongin ka lung a gim mama hi; tanah na om unlen ei na ngah un,” a ci hi.

³⁵A gamla sim khat ama pei-in lei lahah bawhsuh a, ahi thei ding leh tami hun tawh ei kipelsah ta’n, ci-in thu a ngen hi.

³⁶Ama in “Abba[60], Pa aw, nang adingin bangkim hi thei hi; keima kung panin tami hai ladawh ta’n; hizongle keima’ deina bang hi loin nangma’ deina bang hizaw taheh,” a ci hi.

³⁷Ama a pei leh amate a kimusa-a om a mu hi; ama in Peter kungah, “A kimu na mah? Nai khat sung zong ei ngah zo lo na mah?

³⁸Gimna hun[61] sungah note na lut lo nadingun ngahin thungen un; lungsim a lawp vangin tahsa a thanem hi,” a ci hi.

³⁹Khatvei peikia-in a nget ngai teng ma a va ngenkia ta hi.

⁴⁰Khatvei ama a peikia leh a mit uh hah zo nawn lo ahi ziehin amate a kimusa ma-in a mu leuleu hi; amate in ama kungah gen ding a thei ta sih uhi.

⁴¹A thumveina peikia-in amate kungah, “Note khawlin a kimu hit hiet lai na hi uh amah? Pha zo ta! A hun ang tung ta hi; maw nei mite’ khut sungah Mihing Tapa a kileheh ding ahi ta hi.

⁴²Tho un, pei vai. En un, ei leheh pa ang nai ta hi,” a ci hi.

⁴³Jesu in thu a gen laitahin sawm le nite sung pan thakhatin Judas tung a, ama tawh siempu liente, thukham hil siete, le upate’ sawl, namsau le phohbul tawi mihonpi tawh a zawh hi.

⁴⁴Tu-in a leheh pa in amate lim khat pie a, “Kang nap ding pa khu tua pa ahi hi; ama man unlen limtahin cingin peipi pai un,” a ci hi.

⁴⁵Tuaci’n ama a tun ciengin thakhatin Jesu kungah pei a, “Siepa!” ci-in a nam hi.

⁴⁶Tua ciengin ama tungah a khut uh nga-in a man uhi.

⁴⁷Hizongle a gei-a dingte khat in a namsau dawhin siempu lien pa’ silapa a sat leh a bil a bantan hi.

⁴⁸Tua ciengin Jesu in amate kungah, “Guta bulu khat man ding banga namsau le phohbul tawh ang kuon na hi uh amah?

⁴⁹Nisielin note tawh omtonin biehinnpi sungah thu ka hil laitahin nei man sih uhi. Ahi vangin Lai Siengtho a tangtun nading hi taheh,” a ci hi.

⁵⁰Amate in a unpi-in ama a taisan uhi.

⁵¹Diel puonzal khat beh a sil tangval khat in Jesu a zui leh amate in ama na man vua,

⁵²ahi vangin ama in zong a diel puonzal nuasie-in a guohtangin a tai hi.

⁵³Amate in siempu lien pa kungah Jesu a peipi uhi; tuale siempu liente zosie, upate, le thukham hil siete a kikhawm uhi.

⁵⁴Peter in siempu lien pa’ leituol dongah Jesu galzui a, a cingte tawh mei-awi-in a toton hi.

⁵⁵Siempu liente le vaihawm zosie-te in Jesu a tha thei nadingun teci a sui uhi; ahi vangin khat zong a mu sih uhi.

⁵⁶Azieh pen mi tampite in zuou teci a pang vua, ahi vangin a teci panna uh a kituoh sih hi.

⁵⁷Mi pawlkhat dingin ama langah zuou teci a pang vua,

⁵⁸“Ama in, ‘Mihingte’ khut tawh a kilam tami biehinnpi ka susie ding a, nithum sungin adang khat ka lamkia ding hi,’ a ci ka za uhi,” a ci uhi.

⁵⁹Tam cieng nangawnah a thugenna uh a kituoh nai vaset sih hi.

⁶⁰Tua ciengin amate mai-ah siempu lien pa dingin Jesu thu dong a, “Na dawng sih ding amah? Na langkhatah amau’ teci panna bang ahei?” a ci hi.

⁶¹Ahi vangin ama in dawng loin a sip dide hi. Siempu lien pa in, “ Thupha nga pa’ Tapa Messiah[62] na hi amah?” ci-in khatvei dong leuleu hi.

⁶²Jesu in, “Ka hi hi, ci a, tuale ‘Note in Vanglietna zietlamah a to,’ le ‘Vantung meii tung tuonga ang kumsuh Mihing Tapa,’ na mu ding uhi,” a ci hi.

⁶³Tua ciengin siempu lien pa in a puon botkehin, “Bang dingin tecite kisam lai ding ahei?

⁶⁴Note in Pasien a gensietna na za zo ta uhi! Na khensatna uh bang ahiei?” a ci hi. Amate zosie in ama pen a si dinga kilawm ahi hi, ci-in a mawsah uhi.

⁶⁵Mi pawlkhat in cilphitin a mai tunpiehin a beng gawp vua, “Hing gen vawi!” a ci uhi. A cingte in zong peipi-in ama a beng gawp uhi.

⁶⁶A nei-a leituolah Peter a na op laitahin siempu lien pa’ nasem numei khat a pei hi.

⁶⁷Mei awi-a na om Peter a mu bepin encien pai a, “Nang zong Nazareth mi Jesu tawh kipawl ngel vete aw,” a ci hi.

⁶⁸Ahi vangin ama kilep a, “Na thugen theikha sing, zong telsiem vawt sing,” ci-in leituol pulamah a pusuoh hi. Tua ciengin aah a khuong hi.

⁶⁹Tua nasem numei nu ma in mukia a, a gei-a dingte kungah, “Tampa pen amate sunga mi khat hi ngel ve aw,” a cikia hi.

⁷⁰Hinanle ama kilepin a nielkia hi. Bakhat zaw ciengin a gei-a dingte in Peter kungah, “Nang zong Galilee mi khat na hi ciengin, tuate lahah khat hi valon vateh,” a cikia uhi.

⁷¹Ahi vangin ama le ama kisamsie-in, “Na gen uh mipa thei kha malmal sing,” ci-in a kitomlaw kia hi.

⁷²Khum hun lientahin a niveina aah a khuong hi. Tua ciengin Peter in ama kungah, “Aah nivei a khuon masangin thumvei nei niel ding hi,” ci-in Jesu in ama kunga a gensa thute phawhkia-in ki-ip zo loin a kap hi.