Read Zou MARK 16 Bible Online

MARK 16 - Zou bible

MARK 16

¹Sabbath ni a tawp zaw ciengin Mary Magdalene, James’ nu Mary, le Salome-te in Jesu’ luong nu dingin panamtuite a lei uhi.

²Nipi kal khat sung ni masa pen zingmawng tung, ni suo patin hanah amate a pei uhi.

³Amate khatlekhat kikumin, “Han kotvang huhna suongtumpi koi’ ei liapieh mawh ding adiei,” a kici uhi.

⁴Amate a dato ciengun a gol mama tua suongtumpi a kiliasa-in a mu uhi.

⁵Han sungah a lut uleh a zietlam pang vua a to puontuol kang sil tangval khat mu-in a zausi gawp uhi.

⁶Ahi vangin amate kungah, “Zau sih un; singlamte tunga a kikhailia Nazareth mi Jesu sui hi ngel uteh. Ama a thokia zo ta hi; tam munah ama om nawn lo hi. Amate in ama a sielna mun uh en un.

⁷Pei unlen, a nuazuite le Peter kungah Galilee lam zuonin na masang vuah pei hi, ci-in va gen ta un; ama in note ang gensa bang lienin khum munah na mu ding uhi,” a ci hi.

⁸Tuaci’n amate zausi-in lamdang sa kawm uh ahi ziehin han pan pusuohin a tai uhi; amate a zau ziehun koima kungah a gen sih uhi.[69] (Amate tunga thu kipiesa zosiete, Peter’ kim le pama a om mite kungah tomkimin a gen uhi. Tua zaw ciengin Jesu mama in amate tungtawnin nisuona panin nitumna dong, a siengtho le a kisie thei lo kumtawn hutdamna thu tangkona a sawlkhie hi.[70])

⁹(Nipi kal khat sung ni masapen, a thawkia zaw zingmawng tungin dawi sagi a hawlkhietpieh nu Mary Magdalene kungah ama kilaa hi.

¹⁰Tua nu pei-in Jesu’ kithuopi ngaite da le kapin a op laitahun tam thu a va gen ta hi.

¹¹Ahi vangin amate in ama a hing ahi lam le tua nu in ama mu zo hi, ci thu a zah ciengun a um thei sih uhi.

¹²Tami teng zaw ciengin khuota lam zuonin a pei laitahun ama ni tungah a mel tuom khatin a kilaa hi.

¹³Tam tegel zong kilekia-in a gen vangun amate in a um sih uhi.

¹⁴Tua zaw ciengin sabuoi tungah a to laitahun sawm le khat-te mama tungah ama a kilaa hi; ama a thawkia zaw ciengin ama a mu mite’ thu gen tahsang loin a uplana ule a lungkhauna ziehun amate a hosie hi.[71]

¹⁵Amate kungah, “Leitung muncin tengah note pei unlen, a piensahsa zosiete tungah lungdamna thu[72] phuongzah un.

¹⁶Thu um a, a ki-baptize mite in hutdamna nga ding uhi; ahi vangin a um lote in mawsah thukhenna a thuoh ding uhi.

¹⁷Tami limte in a um mite a nuazui ding hi: Amate in keima’ min suongin dawite a notmang ding uhi; kam thate tawh a ham ding uhi;

¹⁸a khut utawh gulte a man ding vua, si theina gu khatpo a dawn ule zong bangma a ci sih ding uhi; cinate tungah khut a nga ding vua, amate a dam ding uhi,” a ci hi.

¹⁹TOPA Jesu in amate kungah tua banga a gen zaw ciengin vantungah ama kilato a, Pasien’ zietlamah a to hi.

²⁰Tuale amate kuonin muncin tengah lungdamna thu a phuongzah uhi. TOPA in amate tawh na semton a, a thugente uh a kipsahna-in lim lamdangte in a zuisah hi.[73])