Read Zou MARK 2 Bible Online

MARK 2 - Zou bible

MARK 2

¹Ni bang za ahei zaw ciengin Capernaum khuo ah ama kilekia a, inn ah ama om hi, ci thu kiza hi.

²Tuaci’n kotkhah mai nangawnah mun om nawn lo za dongin mi tampi a kikhawm uhi; tuale ama in zong amate kungah thu a hil hi.

³Tua ciengin mi pawlkhat[7] pei-in mihing li in phalsi khat zawngin ama kungah a peipi uhi.

⁴Mi a tam sengin Jesu kung a tut zo lo ziehun amate in Jesu’ opna sontah innkhum a phelkhe uhi; tuale amate in a vang khat a vu zaw ciengun a lupna pheh tawh phalsi mipa a khiesuh uhi.

⁵Jesu in amau’ upna a mu ciengin phalsi mipa kungah, “Ka tapa aw, na mawna teng ang kimaisah zo hi,” a ci hi.

⁶Khum sunga a to thukham siete pawlkhat in a lungsim sung vuah,

⁷“Bang dinga tam mipa hici ham mawh ahei? Pasien gensie ahi hi! Pasien khat beh longal koi in mawna maisah thei ahei?” ci-in a ngaisun uhi.

⁸Jesu in amau’ ngaisutnate thakhatin thei pai ahi ziehin amate kungah, “Bang zieha na lungsim vua tam thute na ngaisut uh ahei?

⁹Phalsi mipa kungah, ‘Na mawnate kimaisah zo hi,’ ci ding le, ‘Tho-in na lupna pheh puo inlen pei in,’ ci ding koi baizaw ahei?

¹⁰Ahi vangin Mihing Tapa in leitungah mawnate maisah thei nading thu a nei lam note in na thei nadingun ama in phalsi mipa kungah,

¹¹“Na kungah kang gen hi, tho-in na lupna pheh la inlen na inn ah pei in,” a ci hi.

¹²Ama tho-in thakhatin a pheh la a, amate zosie mai-ah a peikhie pai hi; tuaci’n amate zosie in lamdang a sa vua, Pasien phatin, “Tam bang dan poma i mu ngai nai vawt sih hi!” a ci uhi.

¹³Khatvei tuipi gei-ah Jesu[8] peikia hi; ama kimvelah mihonpi a kikhawm vua, tuale amate thu hil hi.

¹⁴Ama a pei kawikawi laitahin siehdonna zumah a to Alphaeus’ tapa Levi mu a, ama kungah, “Ei zui in,” a ci a, ama tho-in a zui pai hi.

¹⁵Levi’ inn ah Jesu le a nuazuite nitah an ne-in a to[9] laitahin siehdongte le mawneite tampitah zong ama tawh a toton uhi, azieh pen ama a zui mi tam mama hi.

¹⁶Thukham hil[10] Pharisee-te in mawneite le siehdongte a toton a mu uh ciengin amate in a nuazuite kungah, “Bang dinga siehdongte le mawneite tawh an a neh[11] ton uh ahei?” a ci uhi.

¹⁷Jesu in tami thu a zah ciengin amate kungah, “Cidamte in sievuon tulmaw loin cinate beh in tulmaw hi; midihte hlan dinga ang pei ka hi sih a, mawneite hlan dinga ang pei ka hizaw hi,” a ci hi.

¹⁸John’ nuazuite le Pharisee-te in an a tang uhi; tuale mite[12] pei-in ama kungah, “John’ nuazuite le Pharisee-te in an tang napi bang dinga na nuazuite in an tang lo uh ahei?” a ci uhi.

¹⁹Jesu in amate kungah, “Zineipa tawh a opton laitahun mopawi simte in an bangci tan thei ding uh ahei? Zineipa tawh a opton laisie-un amate in an a tang thei sih uhi.

²⁰Amate kung panin zineipa a kilahdawh hun ang tung ding a, khum ni ciengin amate in an a tang ding uhi.

²¹“Koima in puonbeh tha tawh puonlui phaw ngai lo hi; a phaw zenzen leh a kiphawna puonbeh in puonlui kai-ehin a ehbe zaw ding hi.

²²Koima in savun um lui sungah lenggatui tha thal ngai lo hi; a thal khah mawh leh lenggazu in savun um phukehin lenggazu kibuo ding a, savun um zong kisie ding hi; savun um tha sungah lenggazu tha kithalzaw a,[13] tuaci’n a ni-in kikembih thei hi,” a ci hi.

²³Sabbath ni khatin bulei nawhin ama pei a, tuale a peikawmun a nuazuite in buvui a zut uhi.

²⁴Pharisee-te in ama kungah, “En in, bang dinga amate in Sabbath ni-a bawl dinga kilawm lo nate bawl uh ahei?” a ci uhi.

²⁵Ama in amate kungah, “David in a pawlte tawh gilkielin neh ding a kisap laitahin bang bawl ahei ci thu na sim ngai sih uh amah?

²⁶Siempu lien pa Abiathar hun lai-in Pasien inn sungah ama lut a, siempute beh in a neh thei Ompina anlum ne-in a pawlte zong kimkhat a pie hi,” a ci hi.

²⁷Tua ciengin ama in a kung vuah, “Mihingte adinga Sabbath ni kibawl ahi a, sabbath ni dinga mihingte kibawl ahi sih hi,” a ci hi.

²⁸Tua ahi ziehin Mihing Tapa pen sabbath ni nangawn a uhpa ahi hi,” a ci hi.