Read Zou MARK 7 Bible Online

MARK 7 - Zou bible

MARK 7

¹Tua ciengin ama kimkotah Pharisee-te le Jerusalem pan a pei thukham hil siete a kikhawm vua,

²a nuazuite pawlkhat in khut sil lo a cinopna ahi, khutbua pi tawh an a neh lam uh amate in a mu kha uhi.

³(Azieh pen Pharisee-te le Jew mite zosie in upate’ tang ngaina a zui ziehun khut silsieng kilkel loin an a ne sih vua,

⁴vanzuana panin a pei ciengun zong kisil[26] masa loin an a ne sih uhi; tuale amate in haite, umlebelte, sumngo kuongdaite sawpsiengna-a kipan tang ngaina dang tampi tah zong a tang lai uhi).

⁵Tuaci’n Pharisee-te le thukham hil siete in ama kungah, “Na nuazuite in upate’ tang ngaina zui loin bang dingin khutbua pi tawh an ne uh ahei?” ci-in a dong uhi.

⁶Ama in a kung vuah, “No mihoi kipangte thu Isaiah in a mantaha a na gensa tam banga a kigielna-ah, ‘Tam mite in a kam pi-un kei ei zatah vua, hinanle a lungsim uh kei tawh kigamla hi;

⁷amate in mihingte’ bawltawm ngainate, zui ding ngaina bangin a hil vua, a mawhna-in kei ei bie uhi,’ a ci hi.

⁸Note in Pasien’ thupiehte taisanin mihingte’ tang ngainate na tukip uhi,” a ci hi.

⁹Tua ciengin ama in a kung vuah, “Na tang ngainate na zui thei nadingun Pasien’ thupiehte pampai dan na siem ta mama uhi!

¹⁰Azieh pen Moses in, “Na nu na pa na zatah un,’ ci hi; tuale, ‘A pa ahi sihle a nu a gensie poma si valon ding hi,’ ci hi.

¹¹Hizongle mi khatpo in a nu ahi sihle a pa kungah, ‘Keima tung pana na nga thei ding hunate pen Corban (Pasien tunga kipiesa a cina) ahi ta hi,’ a ci nah po leh,

¹²a nu le a pate adingin bangma khat beh na semsah nawn sih uhi.

¹³Tua bangin na luosuh uh na tang ngainate ziehun Pasien’ thu bangma lo na suo ta uhi. Tam bang danin note in na tampi na sem uhi,” a ci hi.

¹⁴Tua ciengin ama in mihonpite hlankia a, amate kungah, “Na unpi-un ngai unlen thei ta un:

¹⁵A pulam panin a sungah tumin mi a buasah thei bangma om lo hi, ahi vangin ang pusuoh nate in mi buasah theizaw hi,” a ci hi.

¹⁶Zah nading bil neite in za taheh,” a ci hi.[27]

¹⁷Ama in mihonpite a nuasie zaw ciengin inn sungah tum a, a nuazuite in tua thugentena thu a dong uhi.

¹⁸Ama in a kung vuah, “Tua ahile no zong a thei lo na hi bo uh amah? A pulam panin mihing sunga a tumsuh poma in mi buasah thei lo hi.

¹⁹Azieh pen lungtang sungah tum loin gilpi sunga a tumzawh ziehin khum panin a kithahkia thei lam thei lo na hi uh amah?” a ci hi. (Tua bangin ama in an zosie siengtho hi, ci-in a gen hi.)

²⁰Ama in, “A sung pana pusuohte in mihing buasah hi.

²¹Azieh pen mihing lungsim tawng panin tam bang a sie ngaisutnate ang pei ahi hi: Numei-pasal pahtatna, guhtatna, tuolthana,

²²angkawmna, huoihamna, gitlona, solna, thangtatna, thangsietna, mi daisahna, kihisahna, mottatnate ahi hi.

²³Tam gitlonate zosie a sung lam pana pusuoh hi a, tuate in mihing a buasah hi,” a ci hi.

²⁴Khum panin ama dingkhie-in Tyre[28] gam lamah a pei hi. Inn sungah ama lut a, tua sunga a op lam koima a theisah nuom sih hi. Hizongle mi thei lo dingin ama a kiphuol thei sih a,

²⁵ahi vangin a tanu hlabua nei numei khat in thakhatin ama thu za a, tuale ama pei-in a keng zungah a khupbawh hi.

²⁶Tua nu pen Gentile-te hi a, Syria gam Phoenicia khuo pieng ahi hi. Tua nu in ama kungah a tanu sung panin dawite a hawlkhiet pieh nadingin a thum hi.

²⁷Ama in tua nu kungah, “Naupangte an nesah masa vai, azieh pen naupangte neh ding lahpiehin uite pieh ding kilawm lo hi,” a ci hi.

²⁸Ahi vangin tua nu in, “Sie aw,[29] sabuoi nei-a om uite nangawn in naupangte’ khateneng teng a ne uhi,” a ci hi.

²⁹Tua ciengin ama in tua nu kungah, “Tua bang na ci ziehin na pei thei ta hi, na tanu sung panin dawi pusuoh zo hi,” a ci hi.

³⁰Tuaci’n tua nu inn ah pei-in, lupna tunga a lum a tanu mu a, tua dawi a na peikhie ta hi.

³¹Tua ciengin Tyre gam panin kilekia a, Decapolis gam sunga om Galilee Tuipi lam zuonin Sidon lampi zui-in a pei hi.

³²Amate in a bilbing a ham-awh mi khat ama kungah a peipi uhi; tuale ama pa tungah a khut a ngah nadingin a thum uhi.

³³Ama in mihonpi opna panin tua mipa a tuomin peipi a, a bil sungah a khutme guongin a cil nu-in a lei a thampieh hi.

³⁴Tua ciengin ama in van lam ento a, khuisa-in tua pa kungah, “Ephphatha,” a ci hi. Tua pen, “Kihong in,” a cina ahi hi.

³⁵Tuale a bil thakhatin kihong pai a, a lei zong kihlamin nuomtahin a ham thei pailien hi.

³⁶Tua ciengin Jesu in koima kungah a gen lo nadingin amate thu a pieh vangin, thu pie semsem le thanuom tahin a gen semsem uhi.

³⁷Gen thei lo za dongin amate in lamdang a sa vua, “Ama in na zosie a hoi-in bawl zo hi; bilbingte nangawn in khuo zasah a, a ham thei lote zong hamsah thei hi,” a ci uhi.