Read Zou MARK 8 Bible Online

MARK 8 - Zou bible

MARK 8

¹Tua hun laitahin neh ding nei lo mihon tampi a kikhopkia ciengun ama in a nuazuite hlanin a kung vuah,

²“Keima kungah mipite ni thum sung tahpi ang om zo ta vua, neh ding bangma zamtawng nei lo uh ahi ziehin hepihuoi ka sa mama hi.

³A gilkielin inn ah peisah mawh leng pawlkhatte a gamlapi pana ang pei uh ahi ziehin lamkalah lamba ta va uh,” a ci hi.

⁴Ama’ nuazuite in, “Tami gamlahah mi tam zapi koi in bangci va zo ding ahei?” ci-in a dawng uhi.

⁵Ama in a kung vuah, “Anlum bangza mawngmawng na nei vuoi?” ci-in dong hi. Amate in, “Sagi” a ci uhi.

⁶Tua ciengin ama in mipite tuolah tosah a, anlum sagite la-in lungdam a ko zaw ciengin phalsuo a, a hawm dingun a nuazuite a pie hi; tuale amate in mipite tungah tuate a hawmpieh uhi.

⁷Amate in nganeu themkhat zong a nei uhi; thupha a pieh zaw ciengin tua teng zong a hawmsah hi.

⁸Amate in ne-in a gil uh va mama hi; tuale a khamval teng uh a khawm vua, seu sagi a dim hi.

⁹Tua sungah mi tul li bang pha uhi. Tuale ama in amate a peisah hi.

¹⁰A nuazuite tawh thakhatin gunkuong tungah tuong a, Dalmanutha[30] gamah a pei uhi.

¹¹Pharisee-te pei-in ama tawh thu kiniel a kipan vua, vantung panin lim khat a ngen uhi.

¹²A lumgsim tawngah nahpi-in khuisa-in, “Bang dinga tam khang mite in lim a nget uh ahei? A tahtah a kang ci-in, tam khang mite tungah bangma lim a kipie poma sih ding hi,” a ci hi.

¹³Tuale amate nuasie-in gunkuong tungah katokia a, galkhat lamah a pei hi.

¹⁴A nuazuite in anlum puoh ding a mangngil vua, gunkuong sungah anlum pum khat beh a nei tabo uhi.

¹⁵Tuale ama in a kung vuah, “Pilvangun, Pharisee-te le Herod’[31] tol kidawm un,” a ci hi.

¹⁶Amate in, “An i nei lo zieh hi ngel va,” ci-in khatlekhat a kiho uhi.

¹⁷Jesu in tua thu thei ahi ziehin amate kungah, “Bang dinga na an nei lo uh gen talawm na hi uh ahei? Na lungtang vuah lut loin theicien nai lo na hi uh amah? Na lungtang uh a khau seng amah?

¹⁸Mit nei napi a mu lo na hi uh amah? Bil nei napi a za lo na hi uh amah? Note in na phawhkha ta sih uh amah?

¹⁹Mi tulnga ading anlum nga ka phalsuo lai-in khamval seu dim bangza na luoh vuoi?” a ci hi. Amate in ama kungah, “Sawm le ni,” a ci uhi.

²⁰“Tuale mi tul lite ading sagi ka phalsuo lai-in a khamval uh seu bangza na luoh vuoi?” a ci hi. Amate in ama kungah, “Sagi,” a ci uhi.

²¹Tua ciengin ama in a kung vuah, “Na telthei nai sih uh amah?” a ci hi.

²²Bethsaida ah a amate a pei uhi. Mi pawlkhat in ama kungah mittaw khat a peipi vua, ama a tham nadingin a thumpieh uhi.

²³Ama in tua mittaw pa a khut tawh tu-in khuo pulamah a peipi hi; ama in tua pa’ mitah a cil a nu zo ciengin ama tungah a khut ngam a, “Na khat popo na mu thei ei mah?” ci-in a dong hi.

²⁴Tua mipa khuodah a, “Mite ka mu thei hi, hinanle amate pen singkung lampei tawh a kibang uhi” a ci hi.

²⁵Tua ciengin Jesu in a mit tungah a khut ngam leuleu hi; tuale ama in teltahin a et ciengin khuo mukia a, na zosie cientahin a mu thei ta hi.

²⁶Tua ciengin a inn ah ama peisah a, “Khuo sung nangawnah lut nawn sin,”[32] a ci hi.

²⁷Jesu le a nuazuite, Caesarea Philippi gam sung khuotate ah a zin dingin a pei uhi; tuale lam a pei laitahun a nuazuite kungah, “Mite in kei koi hi ei ci vuoi?” ci-in a dong hi.

²⁸Amate in, “Baptize-pa John; adangte in, Elijah; adangte leuleu in, kamsangte lahah khat,” ang ci uhi, ci-in a dawngkia uhi.

²⁹Ama in a kung vuah, “Tua ahile note in kei koi hi nei ci vuoi? ci-in a dong hi. Peter in ama kungah, “Nang Messiah[33] na hi hi,” a ci hi.

³⁰Tuale ama’ tungtang thu koima tunga a gen lo nadingun khautahin thu a pie hi.

³¹Tua ciengin ama in Mihing Tapa in nahpitahin bawlsietna thuoh ding a, upate, siempu liente, le thukham hil siete in ama nielin kithat ding a, nithum zaw ciengin thokia ding hi, ci-in amate thuhil a kipan hi.

³²Ama in kicien tahin tam thu a gen hi. Tuale Peter in ama tuom peipi-in phawsiet a kipan hi.

³³Ahi vangin a nuazuite a etkawmin ama kihei-in Peter phawhsie a, “Satan aw, ka nua lamah kihem in! Azieh pen nang in Pasien’ thu ngaisun loin mihing’ thu na ngaisunzaw hi,” a ci hi.

³⁴Ama in a nuazuite le mihonpite hlanin amate kungah, “Mi khatpo ka nuazui a suo nop leh, ama le ama kinielin a singlamte puo-in ei zui taheh.

³⁵Azieh pen a hinna uh a hunkhie nuomte in a hinna uh tan ding a, keima zieh le lungdamna thu ziehin a hinna a taante in a hinna uh a hunkhie ding uhi.

³⁶Amate in leitung buppi a nga vangun a hinna uh suplaw uleh bang phatuom ding ahei?

³⁷A tahtahin, amate in a hinna uh bang tawh hleh theikia ding uh ahei?

³⁸Tami angkawm le mawna tawh a kidim khang mite lahah keima le ka thute ei maizumpi mite ahi ule, a Pa’ minthanna vang le a siengtho vantung mite tawh a minthangin Mihing Tapa ang peikia ciengin amate a zumpi ding hi,” a ci hi.