Read Zou MARK 9 Bible Online

MARK 9 - Zou bible

MARK 9

¹Tuale ama in amate kungah, “A tahtah a kang ci-in, tam sunga a ding mi kimkhat in vanglietna tawh Pasien’ manggam ang tun a mu masangun sina a ciemkha sih ding uhi,” a ci hi.

²Ni guh zaw ciengin Jesu in Peter, James, John-te a tuomin muolsang tung khatah a zawpi hi. Tuale amate mai-ah a mel kikhelin

³a puonsilte tee lihlehin kang silsel a, leitungah puonsawp mi koima in a ngosah zawh lo ding za dongin a vam lihleh hi.

⁴Khum sungah Moses le Elijah kilaa a, Jesu tawh a kiho uhi.

⁵Tua ciengin Peter in Jesu kungah, “Siepa[34] aw, tam sunga i op ding uh a hoi hi; nang ading buh khat, Moses ading buh khat, le Elijah ading buh khat, buh thum ei lamsah in,” a ci hi.

⁶Amate a nahzau seng ziehun ama in ci nading mel a thei sih hi.

⁷Tua ciengin meiingo khat in amate tuomin meii lah panin, “Tam pa pen ka it mama ka Tapa ahi hi; ama’ thu na ngai un!” ci-in aw khat a ging hi.

⁸Thakhatin a kimkot a et uleh Jesu khat losie koima dang a mu nawn sih uhi.

⁹Muol tung pan a kumsuh laitahun sina panin Mihing Tapa a thawkia masangsie, a sil mute uh koima kungah a gen lo nadingun ama in thu a pie hi.

¹⁰Tuaci’n tami thu amate teng beh thei-in a koi vua, sina pana thawkiana a ci pen bang a cinopna ahei, ci-in khatlekhat a kidong uhi.

¹¹Tua ciengin amate in ama kungah, “Bang dinga thukham hil siete in Elijah ang pei masa ding hi, a ci uh ahei?” ci-in a dong uhi.

¹²Ama in a kung vuah, “Na zosie a bawlpha dingin Elijah ang pei masa tahpi ding hi. Tua ahile Mihing Tapa in zong gimna tampi a thuohdan ding le a kisimmawbawl dan ding teng a na kigielsa hi lo amah?

¹³Ahi vangin ke’n kang ci-in, Elijah ang pei zo a, ama’ thu a kigielsa bangin ama tungah a dei bangun a bawl zo ta uhi,” a ci hi.

¹⁴A nuazuite kungah a tun ciengun a kimkot vuah mihon tampite a mu vua, thukham hil siete pawlkhat tawh a na kisel uhi.

¹⁵Mihon buppi in ama a mu uh ciengin lamdang a sa vua, a hopi dingin a mailamah a tai uhi.

¹⁶Ama in a kung vuah, “Amate tawh bang thu kisel na hi uh ahei?”

¹⁷Mihon lah panin mi khat in ama dawng a, “Siepa aw, nangma kungah ka tapa kang peipi hi; ama dawi vei-in ham thei lo hi;

¹⁸tua dawi in ama a mat vanglah ciengin tuol satna-in nei a, a cilphuon buo-in a ha gawi-in a hui zong a kin zel hi; tuale na nuazuite kungah ei delmang pieh un, ci-in ka nget vangin a delmang zo sih uhi,” a ci hi.

¹⁹Ama in a kung vuah, “No upna nei lo khang mite aw, note lahah bang tanvei hing om nalai ding ka hei? Note bang tanvei hing thuoh zo lai ding ka hei? Ka kungah ama hing peipi un,” a ci hi.

²⁰Tuale amate in ama kungah tua naupang a peipi uhi. Tua hlagau in Jesu a mu ciengin thakhatthu-in tua naupang kinlawmsah a, ama tuolah pua-in kikhuleh a, a kam panin a cilphuon a buo hi.

²¹Jesu in a pa kungah, “A hici zaw bang tanvei a sawt tai?” ci-in a dong hi. Ama in, “A neu lai-a kipan hi ta bo.

²²Tua hlagau in tha sawmin meikhuh sung le tui sungah tamveipi sawnpua zo ta hi; ahi zongin na bawl thei ding khatpo a op leh ei hepi inlen ei panpi in,” a ci hi.

²³Jesu in ama kungah, “Na bawl thei leh na ci amah! A um mi adingin na zosie kibawl thei hi,” a ci hi.

²⁴Thakhatthu-in naupang’ pa in, “Ka um ta hi; ka uplana ei panpi in!” ci-in a kiko hi.

²⁵Jesu in a hontai valuoi mihonpite a mu ciengin tua hlabua kungah, “Tami naupangno a ham thei nading le khuo a zah thei nading a khahtan nang hlabua aw, ama kung panin pusuoh in, ci-in thu kang pie hi!” ci-in a hosie hi.

²⁶Tua hlagau pengzahin naupangno nahpi-in a kinlawmsah zaw ciengin pusuoh a, tuale naupang misi tawh kibang ahi ziehin mi a tamzawte in, “Ama si ta,” a ci uhi.

²⁷Ahi vangin Jesu in a khut tawh ama tu-in a phongto leh a ding thei pai hi.

²⁸Inn sungah ama a tum zaw ciengin a nuazuite in, “Kote in bang dinga ka delmang zawh lo uh ahei?” ci-in a dapdawh uhi.

²⁹Ama in a kung vuah, “Tam bangte pawl pen antanna le thungetna[35] beh tawh a kinotmang thei pan ahi hi,” a ci hi.

³⁰Khumtah panin amate dingkhie-in Galilee gam a nawh uhi. Ama in koima’ thei ding a nuom sih hi;

³¹azieh pen ama in a nuazuite thuhil a, amate kungah, “Mihingte’ khut sungah Mihing Tapa kilehehin amate in that ding a, a kitha zaw a ni thum ciengin thokia ding hi,” ci thu a hil zieh ahi hi.

³²A nuazuite in a thugen a tel sih vua, hinanle a dong ngam sih uhi.

³³Tua ciengin amate Capernaum khuo-ah a tung vua, inn sungah a op laitahun ama in a kung vuah, “Lampi-a na kiselna uh bang thu ahei? ci-in a dong hi.

³⁴Amate a sip khinkhian uhi. Azieh pen lampi-ah a lienpen koi ahei, ci-in khatlekhat a kisel zieh uh ahi hi.

³⁵Ama to-in sawm le nite hlan a, amate kungah, “A masapen a suoh nuom poma in a nukhia pen le adang teng’ sila a suo phot kul hi,” a ci hi.

³⁶Tua ciengin naupang khat kai-in amate lahah koi a, a kangah tawi-in amate kungah,

³⁷“Keima zieha tam bang naupang khat a limbawl poma kei ei limbawl ahi a, kei ei limbawl poma in kei ei limbawl hi loin kei ei sawl pa limbawl ahi zaw hi,” a ci hi.

³⁸John in ama kungah, “Siepa aw, na min tawh dawite a hawlkhie mi khat ka mu vua, ama in eite ei zui lo ziehin ka kham uhi,” a ci uhi.

³⁹Ahi vangin Jesu in, “Ama kham sih un; azieh pen ka min tawh na lienpi a sem mi koima in ei nua gensiet thei pah sih ding hi.

⁴⁰Ei langdo lo poma i pawl ahi hi.

⁴¹Azieh pen a tahtah a kang ci-in, Khris’ min na puoh ziehun dawn ding tui hai khat ang pie popo thaman nga loin a om poma sih ding hi.

⁴²“Note khatpo in keima ei um tami naupangnote khat a puasah leh, a ngawng ah an gawina suong golpi khat khai-in tuipi sungah tummang dawh leh ama adingin hoizaw ding hi.

⁴³Na khut in ang puasah leh tansan in; khut kim keng kimin mei a mi thei lona hell[36] sungah na pei sangin khut sam keng samin hinna sunga na lut ding pen nang adingin hoizaw tham lai hi.

⁴⁴[37]

⁴⁵Na keng in ang puasah leh tansan in; keng kimin hell sunga ang kipai sangin keng langbai-a hinna sunga na lut ding nang adingin hoizaw tham lai hi.

⁴⁶[38]

⁴⁷Na mit in ang puasah leh khei dawh in; mittang kimin hell khuh sunga ang kipai sangin, mit langkhat beh tawh Pasien’ manggam sunga na lut ding nang adingin hoizaw hi.

⁴⁸Tua sungah a than nangawn uh si ngai lo a, a mei uzong a mit ngai sih hi.

⁴⁹“Azieh pen mi zosie cisaw bangin mei tawh a kisaw ding uhi.[39]

⁵⁰Ci hoi hi; ahi vangin ci a alna mang leh bang na ci alsahkia thei ding ahei? Note zong ci bangin al unlen, khatlekhat na kilem un,” a ci hi.