Read Zou LUKE 1 Bible Online

LUKE 1 - Zou bible

LUKE 1

¹Eite lahah a tangtungsa thu zosie mi tampi in na giel zo a,

²tuate pen a cil a kipanin mit tawh a mu mite le tua thu a na gente in ei na hilsawn bang tehteh ahi hi.

³A zatahhuoi Theophilus aw, keima in zong a kipatcil a kipanin[1] na zosie limtaha ka na kan zaw ciengin a thu a kizom diudeu-in nang adingin hing gielpieh leng hoi va, ci-in ka khensat hi.

⁴Tuaci’n nangma tunga ang kihilsa thute thuman thutah ahi lam na thei ding hi.

⁵Judea gam Kumpi Herod hun lai-in Abijah’ suon siempu gui sung panin a min Zechariah a kici siempu khat a om hi. Ama’ zi pen Aaron’ suon hi a, a min Elizabeth ahi hi.

⁶A ni gelin Pasien mai-ah midih ahi vua, TOPA’ thupiehte le zui ding ngaina zosie genbaang loin a zui uhi.

⁷Ahi vangin Elizabeth pen a ciing ahi ziehin ta nei lo a, a ni gelin a kum uh a tam mama ta hi.

⁸Khatvei ama’ pawlte sep hun ding a tun ciengin Zechariah in Pasien mai-ah siempu nasep sem a,

⁹siempute’ bawl zel ngaina a om bangin TOPA’ mun siengtho sungah lutin panamtui hal ding, ci-in ai a kisan ciengin ama kiteel kha hi.

¹⁰Panamtui a kihal hun sungin a kikhawm mi buppi in a pulamah thu a ngen uhi.

¹¹Tua ciengin ama kungah TOPA’ vantungmi khat kilang a, panamtui kihalna maitam zietlamah a ding hi.

¹²Zechariah in ama a mu ciengin lamdangsa-in zausi-in a kongawp hi.

¹³Ahi vangin vantungmi in ama kungah, “Zechariah aw, zau sin, bang ding ahei cile na thungetna ka za zo ta hi. Na zi Elizabeth in tapa khat nei ding a, a min John na phuo ding hi.

¹⁴Lungdamin na kipah ding a, ama ang pien ziehin mi tampi lungdam ding hi,

¹⁵azieh pen TOPA muna-ah ama milien ahi ding hi. Ama in lenggazu ahi sihle khamthei poma a dawn ngai sih ding hi; a suo masang nangawnin Hlagau Siengtho tawh a kidim ding hi.

¹⁶Ama in Israel mi tampitah, TOPA a Pasien uh kungah a kiheisah ding hi.

¹⁷Nu le pate’ lungtang a tate uh lamah, thumang lo mite’ lungtang a dih pilna lamah a kiheisah ding, TOPA adingin mite a baisa-a koikhol dingin Elijah’ hlagau le vanglietna tawh a mai-ah a pei ding hi,” a ci hi.

¹⁸Zechariah in vantungmi kungah, “Tami thu bangci bangin theithei ding ka hei? Azieh pen kei lah vuoi ta’ng a, ka zi zong kum tam ta hi,” a ci hi.

¹⁹Tua vantungmi in, “Kei Pasien’ nasem Gabriel ka hi hi. Nangma ang hopi ding le nang kunga tami lungdamna thu puoh dinga ei kisawl ka hi hi.

²⁰Hinanle tu-in nang in a hun tun cienga ang tangtung ta valon ding ka thugente na up lo ziehin tami thute ang tangtun masangsie a ham thei loin na om ding hi,” ci-in a dawng hi.

²¹Tua hun sung teng, mite in Zechariah a na ngah vua, biehinn sungah a kiheh ziehin lamdang a sa uhi.

²²Ama a pusuo ciengin amate a hopi thei ta sih a, tua bepin biehinn sunga mangmu ahi lam a thei uhi. Ama a ham thei loin om den a, a khut tawh amate a hopi hi.

²³A siempu nasep hun a man ciengin a inn ah ama a pei hi.

²⁴Tam teng zaw ciengin a zi Elizabeth gai a, hla nga sung innkui den hi. Ama in,

²⁵“TOPA in kei dinga a sep tami ahi a, ka mite lahah ka thuoh maizumnate ei lah pieh a, maipha ei pie ta hi,” a ci hi.

²⁶A hla guhna ciengin, Pasien in Galilee gam Nazareth kici khuopi khatah,

²⁷David’ suon Joseph min nei pasal khat tawh kinung dinga zuthawl kipiesa ngahnu siengtho khat kungah vantungmi Gabriel a sawl hi. Tua ngahnu siengtho’ min pen Mary ahi hi.

²⁸Ama pei-in tua nu kungah, “Maipha nga nu aw, nang kang hopi hi! TOPA in nang ang ompi hi,”[2] a ci hi.

²⁹Hizongle ama’ thugenna ziehin lungmang mama a, bangci kihopi dan ahi ta bep diei, ci-in a lungsan dedu hi.

³⁰Tua vantungmi in ama kungah, “Mary aw, zau sin, azieh pen Pasien’ maipha na mu zo hi.

³¹Tu-in nang gai-in tapa khat na nei ding a, a min Jesu na vaw ding hi.

³²Ama milien hi ding a, Sang pen Pasien’ Tapa kici ding hi, TOPA Pasien in a pa David’ kumpi topha ama a pie ding hi.

³³Jacob suonte tungah kumpi-in maang den ding a, a kumpi gam tawp hun ci om ngai lo ding hi,” a ci hi.

³⁴Mary in vantungmi kungah, “Kei lah ngahnu siengtho khat hi bo ing a, tam thu bangci pien thei ding ahei?” a ci hi.

³⁵Vantungmi in, “Nangma tungah Hlagau Siengtho ang tung ding a, Sang pen Pasien’ vanglietna in nang ang lie ding hi; tua ahi zieh in ang suoh ding nausen pen siengtho ding a, Pasien’ Tapa kici ding hi.

³⁶Na tanau nu Elizabeth zong a teh a vuoi nua-in gai zo a, tu-in a ciing a kici nu a gai zaw a hla guhna ahi ta hi.

³⁷Azieh pen Pasien ading in a pieng thei lo bangma om lo hi,” a ci hi.

³⁸Tua ciengin Mary in, “TOPA’ nasem nu keima tanah om ing; na gen bangin ka tungah pieng taheh,” a ci hi. Tua ciengin ama kung panin vantungmi a peikhie hi.

³⁹Tua hunin Mary kisa mengmengin Judah muoltung gam khuo khatah haw a,

⁴⁰Zechariah inn ah ama lutin Elizabeth a hopi hi.

⁴¹Elizabeth in Mary’ hopina a zah ciengin a gil sunga nausen kitom a, Elizabeth zong Hla siengtho tawh kidimin,

⁴²awging pi tawh, “Numeite lahah thupha nga nu na hi a, na gil sunga na paai nausen zong thupha nga ahi hi.

⁴³TOPA’ nu ang haw nadingin bang dingin tami thu kei tunga hing tung adiei?

⁴⁴Nei hopina awging ka bil tawh ka zah behin ka sunga nausen kipahin a kitom hi.

⁴⁵TOPA in ama kunga a gensate a tangtung valon ding hi, ci-in a um tua numei khu thupha nga ahi hi,” a ci hi.

⁴⁶Tuale Mary in, “Ka lungsim in TOPA phat a,

⁴⁷ka hundam pa Pasien sungah ka hlagau a kipah hi.

⁴⁸A nasem nu’ tuolniemna ei enin maipha ei pei zo ahi ziehin, tu-a kipanin a khang a khanga mi zosie in thupha nga nu ei ci ding uhi;

⁴⁹azieh pen vanglien pa in kei adingin na lienpite bawl zo a, ama’ min pen siengtho ahi hi.

⁵⁰Ama a zatah mite tungah a khuotuona a khangkhangin a tung hi.

⁵¹Ama in a ban tawh a thahatna lah a, kiphatsahna lungsim neite a thethang hi;

⁵²kumpi vangliente a kumpi topha pan khiesuhin, mi tuolniemte a tawisang hi;

⁵³a gilkiel mite na hoi tawh dim a, mihaute khutguohin a peisah hi.

⁵⁴A khuotuona a phaw zing nadingun ama in a nasem Israel-te panpi zo a,

⁵⁵i pute i pate tunga a gensa ma bangin Abraham le a suonlehlahte a khuotuo zing ding hi,” a ci hi.

⁵⁶Elizabeth kungah hla thum bang a tam zaw ciengin inn ah Mary a peikia hi.

⁵⁷Elizabeth a nausuo ding hun tung a, ta pasal khat nei hi.

⁵⁸TOPA in ama tungah a khuotuona lah zo hi, ci thu a innvengte le a tanaute in thei-in Elizabeth tawh a lungdamton uhi.

⁵⁹Ni gietna ni-in nausen teptan dingin a pei vua, a min dingin a pa min Zechariah ma phuo a sawm uhi.

⁶⁰Ahi vangin a nu in, “Hi lo ding hi; ama pen John kici ding hi bo,” a ci hi. Amate in Elizabeth kungah,

⁶¹“Na be sung vuoh tam bang min koima’n phuo ngai sih,” a ci uhi.

⁶²Tua ciengin a pa kungah bang min na phuo nuom ei, ci-in khut lim tawh a dong uhi.

⁶³Ama in suonglai khat ngen a, “A min John ahi hi,” a ci leh amate a unpi-in a ciza uhi.

⁶⁴Tuale thakhatin a kam kihongin a leii kihlam a, ama hamin Pasien a phat hi.

⁶⁵A innvengte zau-in Judea gam muoltung tengah tami thu zosie a gengen uhi.

⁶⁶Tami thute a za mi zosie in, “Tua ahile tami nausen khu bangci nausen ang hi mawh diei?” ci-in a lungsan uhi. Azieh pen TOPA’ khut in ama a ompi tahpi hi.

⁶⁷Tua ciengin a pa Zechariah, Hlagau Siengtho tawh kidimin tam bangin thu a gen hi:

⁶⁸“Israel TOPA Pasien in thupha nga taheh, azieh pen ama in a mite ve-in, a tankhie hi.

⁶⁹Ama in a nasempa David’ suon sung panin eite adingin a vanglien hundampa[3] khat piengsah zo ta hi.

⁷⁰Bangzieh ahei cile ama in tanglai-a kipan a siengtho a kamsangte tung panin a na gensa bangin,

⁷¹i galte le ei mudate zosie’ khut sung panin hutdam a i op thei nading uh ahi hi.

⁷²Tua bangin i pu i pate tunga a kamciemsa ahi, lungsietna a lah nading le, a siengtho ama’ thuciemna phawden nading ahi zongin,

⁷³i pu Abraham tunga a ciemsa tua kiciemna,

⁷⁴i galte khut sung pana ei hutkhiet nading, zau vawt lo-a ama’ na i sep thei nading,

⁷⁵i hin sung teng ama mai-ah siengthona le dihna tawh ama’ na i sep thei nading uh ahi hi.

⁷⁶Tuale nang, nausen aw, Sangpen Pasien’ kamsang pa ang kici ding hi; azieh pen a lampi siel dingin TOPA mai-ah na pei ding a,

⁷⁷amau’ mawnate a maisahna tungtawnin a mite tungah hutdamna thu theitheina pieh thei nading ahi hi.

⁷⁸A nunnem i Pasien uh’ ei hepina ziehin a sangna panin eite tungah phalvah ang tang ding a,

⁷⁹khuomiel lahah a to mite le sina hlim nei-a om mite tungah khuovah pie-in kilemna lampi-ah ei pui ding hi,” a ci hi.

⁸⁰Nausen khanglienin hlagau lamah thahat a, Israel mihonpi lahah a kilaa masangsie gamlahah a om hi.