Read Zou LUKE 12 Bible Online

LUKE 12 - Zou bible

LUKE 12

¹Khatlekhat a kituoncil za dongin mihon tul tampite kikhawmin a op laitahun ama in a nuazuite kungah thugen masa a, “Kineitawmna ahi Pharisee-te’ tol kidawm un.

²A kilang lo dinga a ki tuomcip bangma a om sih a, a kithei lo dinga a kiphuoldap bangma a om sih hi.

³Tua ahi ziehin khuomiel lahah na gen popo uh khuovah sungah kiza ding a, inn sungtawnga na kidaphona popo uh inn khumvum ah kitangko ding hi.

⁴Lawmte aw, ke’n kang ci-in, pumpi a thazaw uh ciengin tua ban bangma a law thei lote na giing sih un.

⁵Na giin ding uh koi ahei ci kang hil ding hi: Pumpi a tha zaw ciengin hell [68]khuh sunga khieh thei nading thuneina[69] a neipa giingzaw un. Ahi hi, ke’n kang ci-in, tua pa na giing un!

⁶Vato nga ciengin dangkasan peh ni tawh kizua lel hi lo amah? Hinanle Pasien mai-ah tuate khat nangawn kimangngil lo hi.

⁷Ahi vangin na lu tung vua na samzamte nangawn uh a kisim siengsa ahi hi. Zau sih un; vato tampi sangin na manpha zaw uhi.

⁸“Ke’n kang ci-in, midangte mai-a keima ei sang poma, mihing Tapa in zong Pasien vantung mite mai-ah a sang ding hi;

⁹ahi vangin mi dangte mai-a kei ei nuol poma, Pasien’ vantung mite mai-ah kinuol ding hi.

¹⁰Mihing Tapa langpangain thu gen poma kimaisah ding a, hizongle Hlagau Siengtho a gensie poma kimaisah lo ding hi.

¹¹Amate in kikhopna innte-ah hile, vaihawmte le thuneite mai-ah hile ang peipi ciengun bangci kihutin bang thu gen ding ka hei ci-in lunghimaw sih un.

¹²Azieh pen, tua hun ciengin Hlagau Siengtho in na gen ding uh ang hil ding hi,” a ci hi.

¹³Mihonpi lah panin khat in ama kungah, “Siepa, ka sanggampa in gamh ei hop nading in ei genpieh in,” a ci hi.

¹⁴Ahi vangin Jesu in tuapa kungah, “Lawm aw, nogel tunga thukhen ding le gamh hawmpieh dingin kei koi in ei se ahei? a ci hi.

¹⁵Tuale ama in amate kungah, “Pilvang un! Huoihamna zosie panin na kikem un; azieh pen hau le dipna sungah mihing hinna om lo hi,” a ci hi.

¹⁶Tua ciengin ama in amate kungah thugentena khat a gen hi: “Mihaupa khat’ lo-ah an tampi a pieng hi.

¹⁷Tuale ama in, ‘Ka ankhol nading mun nei lo ka hi ziehin bang law ding ka hei,’ ci-in a lungsim sungah ngaisun hi.

¹⁸Tua ciengin ama in, ‘Tam bangin ka bawl ding hi: Ka ansaal phelin a golzaw khat ka lam ding a, tua sungah ka antang le ka van teng ka khol ding hi.

¹⁹Tuale ka hlagau kungah, “Ka hlagau aw, kum tampi khom ding van tampi na khol zo hi; ne-in dawn inlen, guolnuomin om hit hiet in, ka ci ding hi,” a ci hi.

²⁰Ahi vangin Pasien in tuapa kungah, “Nang mimawpa! Tuzan mama-in na hinna kila ta ding hi. Tuale na kholsa nate koi-a’ ahi ta diei?’ a ci hi.

²¹Tuaci’n amau adinga gou a kholte pen Pasien lamah mihau ahi sih hi,” a ci hi.

²²Ama in a nuazuite kungah, “Tua ahi ziehin ke’n kang ci-in, hinkhuo ading bang kine ding a, pumpi tungah bang kisil ding ahei, ci-in lunghimaw sih un.

²³Azieh pen an sangin hinna thupizaw a, puonsil sangin pumpi thupizaw hi.

²⁴Va-ahte ngaituo vawi un: Amate in vaw lah vaw lo, at lah at lo, an kholna inn le ansal zong a nei sih uhi, ahi vangin Pasien in amate a va hi. Vate sangin note nahpi tahin na manphazaw uhi!

²⁵Note lahah a lunghimaw ziehin a khankum nai khat sung beh a belap thei koi om na hi uh ahei?[70]

²⁶Khum banga sil neuno khat zong bawl thei lo na hi uleh bang dinga adangte lunghimawpi na hi uh ahei?

²⁷Unoh paate bangci khan ahei ngaisun un: Tuate in na sem loin vau zong a zom ngai sih uhi;[71] hizongle ke’n kang ci-in, Solomon nangawn a minthanna teng tawh a kizep vangin tua unoh paate lahah khat zong a pha zo sih hi.

²⁸Ahi vangin Pasien in tuni-in hing a, zing cienga meikhuh sunga a kihaltum ding gamlah lopate puonsil guon ahile ama in bangza tahin note puonsil hing guonzaw sem ding ahei, no upna neute aw!

²⁹Tua ahi ziehin na neh na dawn ding uh sui penin nei loin lunghimawpi den mielmuol sih un.

³⁰Bang ding ahei cile leitung minam zosie in tami nate a sui vua, na Pa un tuate na kisap lam uh a thei hi.

³¹Tuate sangin ama’[72] manggam suizaw un, tua hile note tungah tami nate ang kipiehbe ding hi.

³²“Tuuhon tawmnote aw, zau sih un, azieh pen note kang pieh ding kumpi’ gam khu na Pa uh’ lungkimna ahi hi.

³³Na neisate uh zua unlen mizawngte pie un. Noma adingin a tul thei lo sum-ip bawl un, gutate in a nai thei lona, nget in zong a suhsiet thei lona mun vantungah a mang thei lo dingin na gougil uh kholzaw un.

³⁴Azieh pen na gougil opna munah na lungsim uh a om ding hi.

³⁵Na kawng uh gahin na meivahte uh tangsah un.

³⁶Mopawi simna panin a kilekia a pu un kot a kiu ciengin thakhatin a hon thei pai dinga a ngah lenlon mite bangin om un.

³⁷A pupa uh a pei ciengin a kigingsa-a a mu nasemte mi hampha ahi uhi; a tahtah a kang ci-in, ama in a kawng gahin an ne dingin amate tosah ding a, tuale ama pei-in amate an a lui ding hi.

³⁸Zankim laitah hile, zingmawng khuovah kuon lam hile a pei hun sunga ama in a mu khah silate mi hampha ahi hi.

³⁹“Ahi vangin tami thu thei un: Inn neipa in gutate pei ding hun thei leh ama[73] in inn bulusah lo ding hi.

⁴⁰Note zong a kigingsa-in om zing un, azieh pen na muonmaw lo laitahun Mihing Tapa ang pei ding hi,” a ci hi.

⁴¹Peter in, “TOPA aw, tami thugentena ko dinga na gen amah, ahi sihle mi zosie ading ahei?” a ci hi.

⁴²Tuale TOPA in, “Tua ahile a silate uhin, a hunhuna amate an pie dinga a pupa in a koi, a muonhuoi le a pilvang inn sung vaisaipa koi ahei?

⁴³A pupa a tun ciengin tua banga a sem a mu silapa mi hampha ahi hi.

⁴⁴A tahtah a kang ci-in, ama in a neisa teng zosie a uh dingin tua mipa a koi ding hi.

⁴⁵Ahi vangin tua silapa in a lungsim sungah, “Ka pupa ang tungha lel ding hi,” ci-in sila numeite le pasalte sat gawpin, an ne tui dawnin zu na kham gawp leh,

⁴⁶a muonmaw lo ni le a thei khah lo hun laitahin tua silapa’ pupa tung ding a, tuale ama semnenin[74] mi thumanlote tawh a koiton ding hi.

⁴⁷A pupa’ dei dan thei napi-in, tua banga gamta nuom lo le a kigingkhol nuom lo tua silapa in satna nahpi-in a thuoh ding hi.

⁴⁸Ahi vangin a pupa’ deina a thei lo ziehin sat dinga kilawm mipa a kitawmsat zawdeu ding hi. Tampi a kipie pa tung panin tampi kikalh ding hi; tuale tampi a ki-ap pa tung panin a tamzaw kingenkia ding hi.

⁴⁹“Leitungah mei kuong hla dinga ang pei ka hi a, tua mei khu a kuong zo hi taleh ka nuom hi!

⁵⁰Ka ki-baptize nading baptize-na khat ka nei a, tuami a kicin masangsie ka lung a nuom thei sih ding hi!

⁵¹Leitungah kilemna puoh dinga ang pei nei sa uh amah? Ka hi sih hi. Ke’n kang ci-in, kikhenna a piengsah dinga ang pei ka hizaw hi!

⁵²Tu-a kipanin innkuon khat sungah mihing nga a phate, a langah thum, a langah ni-in a kido ding vua, thumte in nite do-in nite in thumte a langpang ding uhi.

⁵³Amate pen: A tapa langah a pa, a pa langah a tapa, a tanu langah a nu, a nu langah a tanu, monu langah innpi nu, innpinu langah monu kilangpan cietin, amate a kikhenthang ding uhi,” ci-in a dawng hi.

⁵⁴Ama in mihonpite kungah, “Nitumna lamah meii ang kai na mu ciengun, ‘Guo ang zu ding hi,’ na ci thei pai lien vua, tua bangin a pieng hi.

⁵⁵Tua ma bangin leitaw lam hui ang lan ciengin, ‘Ni sa ding hi,’ na ci uhi; tua bangin a pieng pai hi.

⁵⁶No mihoi kipangte aw, leitung pienzie le vantung pienziete a deina khie-in gen thei napi ucin, bang dingin tuhun thute gen thei lo na hi uh ahei?

⁵⁷“Tuale bang dingin thudihte khen thei lo na hi uh ahei?

⁵⁸Tua ahi ciengin no ang hehpa tawh thukhenmangpa kungah na peiton laitahun na thu uh a mai thei nadingin lamkalah hanciem[75] un, tua ahi sihle ama in thukhenmangpa kungah hing tutin, thukhen mangpa in vaihawm pa khutah ang tut ding a, vaihawm pa in thong sungah ang khum ding hi.

⁵⁹Ke’n kang ci-in, na lieu ding uh sum dangkasan na pieh sieng masangsie-un thong sung panin na suohta thei sih ding uhi,” a ci hi.